2 इतिआस 22

यहूदा दे अहज्‍याहो रा राज्य

1 यहोरामो रे मरने ते बाद तेबे यरूशलेम शईरो रे रणे वाल़ेया तेसरा छोटा पाऊ अहज्याह तेसरी जगा पाँदे राजा बणाया, कऊँकि जो दल अरबिया साथे डेरे रे आया था, तिने तेसरे सारे बड़े पाऊ काईते थे, तेबे यहूदा रे राजा यहोरामो रा पाऊ अहज्याह राजा बणेया। 2 जेबे अहज्याह राजा बणेया, तेबे से बाई साला रा था ओर तिने यरूशलेम शईरो रे एक ई साल तक राज कित्तेया। तेसरी माया रा नाओं अतल्याह था, जो ओम्रीये री पोती थी। 3 तिने अहाबो रे कराने री जी चाल चली, कऊँकि तेसरी माये तेसखे बुरा करने री सलाह् देयो थी। 4 से अहाबो रे कराने जेड़ा काम करो था जो यहोवे री नजरा रे बुरा ए, कऊँकि तेसरे बाओ री मौता ते बाद सेयो तेसखे एड़ी सलाह् देयो थे, जेते कि तेसरा नाश ऊआ। 5 से तिना री सलाह् रे मुताबिक चलो था ओर इस्राएलो रे राजा अहाबो रे पाऊ यहोरामो साथे गिलाद इलाके रे रामोत शईरो रे अरामो रे राजा हजाएलो साथे लड़ने खे गया ओर अरामिये यहोराम कायल कित्तेया। 6 तेबे राजा यहोराम इजी खे वापस ऊईगा, ताकि यिज्रेल शईरो दे तिना जख्मा रा लाज कराओ, जो तेसखे अरामिया रे आथो ते तेस बखते लगे थे जेबे से रामोत गिलगालो दे हजाएलो साथे लड़ने लगी रा था। कऊँकि राजा अहाबो रा पाऊ यहोराम जो यिज्रेलो दे बमार था, इजी बजा ते यहूदा रे राजा यहोरामो रा पाऊ अहज्याह तेसखे देखणे गया।

7 अहज्याहो रा नाश परमेशरो री तरफा ते ऊआ, कऊँकि से यहोरामो गे गया था। जेबे से तेथी पऊँचेया, तेबे यहोरामो साथे निमशीए रा पाऊ येहूए रा सामणा करने खे निकल़ेया, जेसरा अभिषेक यहोवे इजी खे कराया था कि से अहाबो रे कराने रा नाश करो। 8 जेबे येहू अहाबो रे कराने खे दण्ड देणे लगी रा था, तेबे तेसखे यहूदा रे परदान ओर अहज्याह रे पतीजे जो अहज्याह री सेवा-टईल करने वाल़े थे मिले ओर तिने सेयो काईते। 9 तेबे तिने अहज्याह टोल़ेया। से शोमरोनो दे लूकी रा था, तेबे लोके से पकड़ेया ओर फेर येहूए गे पऊँचाई की से कायी ता। तेबे ये बोली की तेसखे माट्टी दित्ती, "ये यहोशापातो रा पोता ए, जो आपणे पूरे मनो ते यहोवे खे टोल़ो था।" ओर अहज्याह रे कराने दे राज करने खे कोई नि रया।

अतल्याह रे जरीये राज्य छुड़ाणा

10 जेबे अहज्याह री माये अतल्याहे देखेया कि मेरा पाऊ मरी गा, तेबे तेसे उठी की यहूदा रे सारे कराने रा नाश कित्तेया। 11 पर यहोशावत जो राजे री बेटी थी, तेसे अहज्याह रा पाऊ योआश, मरने वाल़े राजकुमारा बीचा ते चोरी की दाईया समेत बछौणे राखणे री कमरे रे राखी ता। ईंयाँ राजा यहोरामो री बेटी यहोशावत जो यहोयादा पुरोईतो री लाड़ी ओर अहज्‍याहो री बईण थी, तेसे योआश अतल्याह ते एड़ा लकोई की राखेया कि से तेसखे काई नि सकी। 12 से तेसा गे परमेशरो रे मन्दरो रे छे साल तक लूकेया रा रया, इतणे दिना तक अतल्याह देशो पाँदे राज करदी रयी।