2 इतिआस 6

सुलैमानो री प्रार्थना

1 तेबे सुलैमान बोलणे लगेया,

"यहोवे बोलेया था कि मां अन्दकूप न्हेरे दे वास करना।

2 पर मैं तेरिया तँईं रणे खे एक बऊत ई बांका मन्दर बणाया,

जिदे तूँ युगो-युगो तक रये।"

3 तेबे राजे इस्राएलो री पूरी सभा रिया तरफा खे मूँ करी की तिना खे आशीर्वाद दित्तेया ओर इस्राएलो री पूरी सभा खड़ी रई। 4 तेबे तिने बोलेया, "तन्य ए इस्राएलो रा यहोवा परमेशर, जिने आपणे मुंए ते मेरे बाओ दाऊदो खे ये वचन दित्तेया था, ओर आपणे आथो साथे ये पूरा कित्तेया" 5 जेस दिनो ते आऊँ आपणी प्रजा खे मिस्र देशो ते निकयाल़ी की ल्याई राखेया, तदुओ ते मैं ना तो इस्राएलो रे केसी गोत्रो रा कोई शईर चूणेया, जिदे मेरे नाओं रा रणे खे मन्दर बणाया जाओ ओर ना कोई माणूं चूणेया कि से मेरी इस्राएली प्रजा रा परदान ओ। 6 पर मैं यरूशलेम इजी खे चूणेया, ताकि मेरा नाओं तेती ओ ओर दाऊद इजी खे चूणेया कि से मेरी इस्राएली प्रजा पाँदे परदान ओ। 7 मेरे बाओ दाऊदो री ये इच्छा थी कि इस्राएलो रे परमेशर यहोवे री महिमा खे एक मन्दर बणाओ। 8 पर यहोवे मेरे बाओ दाऊदो खे बोलेया, "तेरी जो इच्छा ए कि परमेशरो रे नाओं रा एक मन्दर बणाऊँ, एड़ी इच्छा करी की तैं खरा तो कित्तेया; 9 तेबे बी तूँ तेस मन्दरो खे बणाई नि सकदा, तेरा जो आपणा पाऊ ऊणा, तेस ई मेरे नाओं रा मन्दर बनाणा।" 10 ये वचन जो यहोवे बोलेया था, से तिने पूरा बी कित्तेया ओर आऊँ आपणे बाओ दाऊदो री जगा पाँदे उठी की यहोवे रे वचनो रे मुताबिक इस्राएलो री गद्दिया पाँदे राजे रे रूपो दे विराजमान ए ओर इस्राएलो रे परमेशर यहोवे री महिमा खे ये मन्दर बणाया। 11 इदे मैं से सन्दूक राखी ता रा, जिदे यहोवे री से वाचा ए, जो तिने इस्राएली लोका साथे बानी थी।

मन्दरो दे सुलैमानो री प्रार्थना

12 तेबे से इस्राएलो री सारी सभा रे सामणे यहोवे री बेदिया सामणे खड़ा ऊआ ओर आपणे आथ फैलाए। 13 सुलैमाने साडे सात फुट लाम्बी, साडे सात फुट चौड़ी ओर साडे चार फुट ऊच्ची पीतल़ी री एक चौकी बणाई की आँगणो बीचे रखाई थी; तेते पाँदे ई खड़े ऊई की तिने सारी इस्राएली सभा सामणे जानू थाले करी की स्वर्गो रिया तरफा खे आथ फैलाई की प्रार्थना करने लगेया, 14 "ओ यहोवा, ओ इस्राएलो रे परमेशर, तां जेड़ा ना तो कोई स्वर्गो रे ओर ना कोई तरतिया पाँदे परमेशर ए, तेरे जो दास आपणे सारे मनो ते आपू खे तां सामणे जाणी की हांडोए, तिना रिया तँईं तूँ आपणी वाचा पूरी करेया ओर करूणा करदा रया। 15 तैं जो वादा मेरे बाओ दाऊदो साथे कित्तेया था, तैं से पूरा कित्तेया, जेड़ा तैं आपणे मुंए ते बोलेया था, तेड़ा ई आपणे आथो साथे से म्हारी आखी सामणे पूरा बी कित्तेया।" 16 इजी री खातर एबे ओ इस्राएलो रे यहोवा परमेशर एस वादे खे बी पूरा कर, जो तैं आपणे दास मेरे बाओ दाऊदो ते कित्तेया था, "तेरे कुलो रे मां सामणे इस्राएलो री गद्दिया पाँदे राजे रे जेड़े विराजणे वाल़े सदा बणे दे रणे, एड़ा ओ कि जेड़ा तूँ आपू खे मेरे सामणे जाणी की चलदा रया, तेड़े ई तेरे कुलो रे लोक आपणे चाल-चलणो दे एड़ी चौकसी करो कि मेरे बिधानो पाँदे चलो।" 17 एबे ओ इस्राएलो रे यहोवा परमेशर जो वचन तैं आपणे परोसे जोगे दास दाऊदो खे दित्तेया था, से पूरा कित्तेया जाओ। 18 पर क्या परमेशरो सच ई माणूंआ साथे तरतिया पाँदे रणे खे आऊणा? स्वर्गो दे बल्कि सबी ते ऊच्चे स्वर्गो रे बी तूँ नि समांदा, फेर मेरे बणाए रे एस मन्दरो दे तूँ किंयाँ समाणा? 19 तेबे बी ओ मेरे यहोवा परमेशर, आपणे दासो री प्रार्थना ओर गिड़गिड़ाणे रिया तरफा खे त्यान दे ओर मेरी आका ओर ये प्रार्थना सुण, जो आऊँ तां सामणे करने लगी रा। 20 से ये कि तेरिया आखी एस मन्दरो रिया तरफा खे, मतलब एसा ई जगा खे जेतेरे बारे दे तैं बोलेया था कि मां तिदे आपणा नाओं राखणा, दिन-रात खुलिया रओ ओर जो प्रार्थना तेरा दास एसा जगा रिया तरफा खे करो, तेसा खे तूँ सुणी लो। 21 ओर आपणे दास ओर आपणी इस्राएली प्रजा री प्रार्थना जो सेयो एसा जगा रिया तरफा खे मूँ करी की गिड़गिड़ाई की करो, तेसा खे सुणी लया; स्वर्गो ते जो तेरी रणे री जगा ए, सुणी लया ओर सुणी की माफ करेया। 22 जेबे कोई माणूं केसी दूजे रे खलाफ अपराध करो ओर तेसखे कसम खुल़ाई जाओ ओर से आई की एस मन्दरो दे तेरी बेदिया सामणे कसम खाओ, 23 तेबे तैं स्वर्गो ते सुणनी ओर मानणी ओर आपणे दासो रा न्याय करी की दुष्टा ते बदला लणा ओर तेसरी चाल तेसरे ई सिरो पाँदे वापस करी देणी ओर निर्दोषो खे, निर्दोष ठराई की, तेसरे तर्मो रे मुताबिक तेसखे फल देणा।

24 ओर जेबे तेरे इस्राएली लोक तेरे खलाफ पाप करने रिया बजा ते आपणे दुश्मणा ते अरी जाओ, ओर केसी दूजे देशो खे जाणे खे मजबूर ऊई जाओ, तेबे जे सेयो आपणे पापो खे मानी की तिजी ते फिरी जाओ ओर एस मन्दरो रिया तरफा खे फिरी जाओ ओर ये मानी लो कि तैं तिना खे ठीक सजा देई राखी, ओर बिनती करो कि तूँ तिना खे माफ करी देगा, 25 तेबे तूँ स्वर्गो ते तिना री प्रार्थना सुणेया ओर आपणे इस्राएली लोका रा पाप माफ करेया ओर सेयो एते देशो दे वापस ली आऊणे, जो तैं तिना खे ओर तिना रे बुजुर्गा खे देई राखेया। 26 जेबे सेयो तेरे खलाफ पाप करो ओर इजी बजा ते सर्ग इतणा बन्द ऊई जाओ कि बर्खा नि ओ, एड़े बखते जे सेयो एसा ई जगा रिया तरफा खे प्रार्थना करी की तेरे नाओं खे मानो ओर तूँ जो तिना खे दु:ख देया, इजी बजा ते सेयो आपणे पापो ते फिरो, 27 तो तूँ स्वर्गो ते तिना री प्रार्थना सुणेया ओर आपणे दासा खे ओर आपणे इस्राएली लोका रे पापा खे माफ करेया; तूँ जो तिना खे से खरी बाट दखाएया, जेते पाँदे तिना खे चलणा चाईयो, इजी री खातर आपणे एस देशो पाँदे जो तैं आपणी प्रजा रा इस्सा करी की देई राखेया, पाणी बरसाई देया।

28 जेबे एते देशो रे अकाल़ या मरी, जल़न, गेरुई या टिड्डिया या कीड़े लगो या तिना रे दुश्मण तिना रे देशो रे बड़े द्वारो दे तिना खे केरी देयो, या कोई मुसीबत या बमारी ओ; 29 तेबे जे कोई माणूं या तेरी सारी‍ प्रजा इस्राएल जो आपणा-आपणा दु:ख जाणी की ओर गिड़गिड़ाई की प्रार्थना करी की आपणे आथ एस मन्दरो रिया तरफा खे फैलाओ; 30 तेबे तैं आपणे स्वर्गिय रणे रिया जगा ते सुणी की माफ करना ओर एकी-एकी रे मनो री जाणी की तेसरी चाला रे मुताबिक तेसखे फल देणा, तूँ ई तो माणूंआ रे मनो खे जागणे वाल़ा ए; 31 ताकि सेयो जितणे दिन तक एते देशो रे रओ, जो तैं तिना रे बुजुर्गा खे दित्तेया था, तितणे दिन तक तेरा डर मानदे ऊए तेरी बाटा रे चलदे रओ।

32 तेबे परदेशी बी जो तेरी इस्राएली प्रजा रा नि आ, जेबे से तेरे बड़े नाओं, तागतबर आथ ओर बडाई री बांयी रिया बजा ते दूर देशो ते आओ ओर आई की एस मन्दरो रिया तरफा खे मूँ करी की प्रार्थना करो, 33 तेबे तूँ आपणे स्वर्गो दे रणे री जगा ते तिना री प्रार्थना सुणेया ओर जेसा गल्ला खे से परदेशी ताखे आका पाओ, तेतेरे मुताबिक करेया; जेते कि तरतिया रे सबी देशा रे लोक तेरा नाओं जाणी की, तेरी इस्राएली प्रजा जेड़े तेरा डर मानो ओर निश्चा करो कि ये मन्दर जो मैं बणाई राखेया, से तेरा ईए।

34 जेबे तेरी प्रजा रे लोक जेती-केथी तूँ तिना खे पेजे तेती आपणे दुश्मणा साथे लड़ाई करने खे निकल़ी जाओ ओर तेस शईरो रिया तरफा खे जो तैं चूणी राखेया ओर एस मन्दरो रे कनारे जो मैं तेरे नाओं रा बणाई राखेया, मूँ करी की तांते प्रार्थना करो, 35 तेबे तैं स्वर्गो ते तिना री प्रार्थना ओर गिड़गिड़ाणा सुणना ओर तिना रा न्याय करना। 36 निष्पाप तो कोई माणूं नि ए, जे सेयो बी तेरे खलाफ पाप करो ओर तूँ तिना पाँदे रोष करी की तिना खे दुश्मणा रे आथो दे करी दे ओर सेयो दुश्मण तिना खे बन्दी बणाई की केसी देशो खे, चाए से दूर ओ, चाए नेड़े, लई जाओ, 37 तो जे सेयो बन्दुआईया रे देशो दे जाई की सोच-बिचार करो ओर फिरी कि आपणे बन्दी बनाणे वाल़े रे देशो दे तांते गिड़गिड़ाई की बोलो, "आसे पाप करी राखेया ओर बुराई ओर दुष्टता करी राखी" 38 इजी री खातर सेयो जे आपणे बन्दुआईया रे देशो रे जेती सेयो तिना खे बन्दी बणाई की लईगे ओ आपणे पूरे मन ओर सारे प्राणो ते तेरी तरफा खे फिरो ओर आपणे एस देशो रिया तरफा खे जो तैं तिना रे बुजुर्गा खे दित्तेया था ओर एस शईरो रिया तरफा खे जो तैं चूणी राखेया ओर एस मन्दरो रिया तरफा खे जो मैं तेरे नाओं रा बणाई राखेया, मूँ करी की प्रार्थना करो, 39 तेबे तैं आपणे स्वर्गो दे रणे रिया जगा ते तिना री प्रार्थना ओर गिड़गिड़ाणा सुणना ओर तिना रा न्याय करना ओर जो पाप तेरी प्रजा रे लोक तेरे खलाफ करो, तिना खे माफ करना। 40 ओ मेरे परमेशर! जो प्रार्थना एते जगा दे करी जाओ तेसरी तरफा खे आपणिया आखी खोली की राख ओर आपणे कान लगाई की राख।

41 एबे, ओ यहोवा परमेशर, उठी की आपणी सामर्था रे सन्दूको समेत आपणी रामो री जगा दे आओ,

ओ यहोवा परमेशर तेरे पुरोईत उद्धारो रे टाल्ले पईनी की राखो

ओर तेरे परोसे वाल़े पग्त पलाईया रिया बजा ते खुशी मनांदे रओ।

42 ओ यहोवा परमेशर, आपणे अभिषिक्तो री प्रार्थना अणसुणी नि कर,

तूँ आपणे दास दाऊदो पाँदे कित्ती री दया रे काम याद राख।