2 इतिआस 19

यहोशापातो खे येहू नबीए री फटकार

1 यहूदा रा राजा यहोशापात यरूशलेम शईरो खे आपणे मईलो दे सई-सलामत वापस ऊईगा। 2 तेबे हनानी नाओं रे दर्शीये रा पाऊ येहू भविष्यवक्ता यहोशापात राजे गे मिलणे खे आया ओर तेसखे बोलणे लगेया, "क्या दुष्टा री मताद करनी ओर यहोवे रे दुश्मणा साथे प्यार राखणा चाईयो? एस कामो रिया बजा ते यहोवे रा रोष तां पाँदे पड़की रा। 3 तेबे बी तांदे कुछ अच्छिया गल्ला ए। तैं तो देशो ते अशेरा री बेदिया खे नाश कित्तेया ओर आपणा मन परमेशरो री टोल़ा रे लगाया।"

यहोशापातो रे सुदार

4 यहोशापात यरूशलेम शईरो दे रओ था। पर एक बार, जेड़ा कि तिने एक बार पईले बी कित्तेया था, से सुदूर दक्खणा दे बेर्शेबा शईरो ते लई की सुदूर उत्तरा दे एप्रैमो रे गोत्रो रे पाह्ड़ी इलाके तक, देशो रे सबी लोका बीचे गया, ओर तिने सेयो वापस आऊणे खे मनाई ले। यहोवे री आराधना करो, जेस परमेशरो री तिना रे बुजुर्ग आराधना करो थे। 5 फेर तिने यहूदा रे एक-एक गढ़वाल़े शईरो दे न्यायी ठराए। 6 ओर यहोशापाते न्यायिया खे बोलेया, "सोचो कि क्या करोए, कऊँकि तुसा जो न्याय करना, से माणूंआ खे नि, यहोवे खे करना ओर से न्याय करदे बखते तुसा साथे रणा। 7 एबे यहोवे रा डर तुसा दे बणेया दा रओ; चौकसिया साथे काम करना, कऊँकि म्हारे परमेशर यहोवे दे कोई बुराई नि ए ओर ना से केसी रा पक्ष लओआ ओर ना रिश्वत लंदा।"

8 यरूशलेम शईरो रे बी यहोशापाते लेवी ओर पुरोईत ओर इस्राएलो रे पितरा रे कराने रे कुछ खास मर्द यहोवे री तरफा ते न्याय करने ओर मुकद्दमे परखणे खे ठराए। तिना रा न्याय-आसण यरूशलेम शईरो रे था। 9 तिने तिना खे आज्ञा दित्ती, यहोवे रा डर मानी की, सच्चाई ओर निष्कपट मनो साथे एड़ा करना। 10 तुसा रे पाई जो आपणे-आपणे शईरो रे रओए, तिना बीचा ते जेसरा कोई मुकद्दमा तुसा गे आओ, चाए से खूनो रा ओ, चाए बिधानो रा या केसी आज्ञा रा या बिधि या नियमो रे बारे रे ओ, तिना गे बताई देणा कि यहोवे रे बारे रे दोषी नि ओ। एड़ा नि ओ कि तुसा पाँदे ओर तुसा रे पाईया पाँदे तेसरा गुस्सा पड़को। एड़ा करोगे तो तुसे दोषी नि ठईरने। 11 ओर देखो, यहोवे रे बारे दे सारे मुकद्दमेया दे तो अमर्याह बड़ा पुरोईत ओर राजे रे बारे दे सारे मुकद्दमेया दे यहूदा रे कराने रा परदान इश्माएलो रा पाऊ जबद्याह तुसा पाँदे अधिकारी ए ओर लेविया तुसा सामणे मुखिये रा काम करना। इजी री खातर याओ बानी की काम करो ओर खरे माणूंए साथे यहोवा रणा।