2 इतिआस 31

मूर्तिया री पूजा बन्द करना

1 त्योआरो रे आखरी दे, जो इस्राएली तेती आजीर थे, सेयो यहूदा रे सबी शईरा दे गए, ओर मूर्तिया रिया पूजा रिया तँईं लगे दे पात्थर ओर खम्बे तोड़ी ते, ओर अशेरा देविया री पूजा खे खम्बे बाडी ते। तिने तिना सबी जगा दे जेती यहूदा ओर बिन्यामीन गोत्रो रे लोक रओ थे, ओर एप्रैम ओर मनश्शे रे गोत्रा रे लोका रिया जगा दे बी, पाह्ड़िया रिया चूँडिया पाँदे बणे दे मन्दरा ओर बालो रिया बेदिया नाश करी तिया। तिना सबी खे नाश करी की सेयो आपणे शईरा खे वापस आए।

लेविया रिया तँईं पेंट

2 हिजकिय्याहे पुरोईता रे दलो खे ओर लेविया रे कुलो खे बल्कि पुरोईत ओर लेविये दोनो, हर एक दलो रे मुताबिक ओर हर एकी माणूंए खे तेसरी सेवा रे कामो रे मुताबिक इजी री खातर ठराईते, ताकि सेयो यहोवे रे तम्बूए रे द्वारो ते पीतरे होमबलि, मेलबलि, सेवा-टईल, तन्यवाद ओर स्तुति करेया करो। 3 तेबे तिने आपणी सम्पत्तिया बीचा ते राजे रा इस्सा होमबलिया खे ठराईते; मतलब प्यागा ओर साँजा री होमबलिया खे ओर रामो रे ओर नये चाँदो रे दिन ओर ठराए रे बखतो री होमबलिया खे जेड़ा कि यहोवे रे बिधानो रे लिखी राखेया। 4 तिने यरूशलेम शईरो दे रणे वाल़े पुरोईत ओर लेविया खे तिना रा इस्सा देणे री आज्ञा दित्ती, ताकि सेयो यहोवे रे बिधानो रे काम मन लगाई की करी सको। 5 ये आज्ञा सुणदे ई इस्राएली, नज्ज, नया शराब, जैतूनो रा तेल, सयीत बगैरा री उपजा री सब प्रकारा री पईली उपज बऊत जादा देणे ओर सारिया चीजा रा दशमांश जादातर ल्याऊणे लगे। 6 जो इस्राएली ओर यहूदी, यहूदा रे शईरो रे रओ थे, सेयो बी बल़दा ओर पेडा-बाकरिया रा दशमांश ओर तिना पवित्र चीजा रा दशमांश, जो तिना रे परमेशर यहोवे रिया तँईं पवित्र करी राखिया थिया, ल्याई की टेरा रे टेर करी की राखणे लगे। 7 एड़े टेर लगाणा तिने तीजे मीन्ने ते शुरू कित्तेया ओर सातुए मीन्ने पूरा कित्तेया। 8 जेबे हिजकिय्याह राजे ओर परदाने आई की सेयो टेर देखे, तेबे यहोवा ओर तेसरी इस्राएली प्रजा रा तन्यवाद कित्तेया। 9 तेबे हिजकिय्याहे पुरोईत ओर लेविया रे कुलो ते तिना टेरा रे बारे दे पूछेया। 10 अजर्याह बड़े पुरोईते जो सादोको रे कराने रा था, राजे खे बोलेया, "जदुओ ते लोक यहोवे रे मन्दरो रे पेंटा ल्याऊणे लगी रे, तदुओ ते आसा लोका खे पेट परी की रोटी मिलोई, बल्कि बऊत बची बी जाओआ, कऊँकि यहोवे आपणी प्रजा खे आशीष देई राखी ओर जो बाकी रई गा रा, तेतेरा ई ये बड़ा टेर ए।" 11 तेबे हिजकिय्याहे यहोवे रे मन्दरो दे पण्डार बनाणे री आज्ञा दित्ती ओर सेयो बणाए। 12 तेबे लोके चकी री पेंट, दशमांश ओर पवित्र कित्ती रिया चीजा, सच्चाईया साथे पऊँचाईया ओर तिना रे मुख्य अधिकारी तो कोनन्याह नाओं रा एक लेवी था ओर दूजा तेरा पाई शिमी था; 13 ओर कोनन्याह ओर तेसरे पाई शिमिये ते थाले, हिजकिय्याह राजा ओर परमेशरो रे मन्दरो रे परदान अजर्याह दुँईं री आज्ञा ते यहीएल, अजज्याह, नहत, असाहेल, यरीमोत, योजाबाद, एलीएल, यिस्मक्याह, महत ओर बनायाह अधिकारी थे।

14 परमेशरो खे आपणी इच्छा रे मुताबिक बलिया रा अधिकारी यिम्ना लेविये रा पाऊ कोरे था, जो पूर्वो रे बड़े द्वारो रा द्वारपाल था, ताकि से यहोवे रिया पेंटा ओर परम पवित्र चीजा बांडेया करो। 15 तेसरे अक्को रे एदेन, बिन्यामीन, येशुअ, शमायाह, अमर्याह ओर शकन्याह पुरोईता रे शईरो रे रओ थे, ताकि सेयो क्या बड़े, क्या छोटे, आपणे पाईया खे तिना रे दलो रे मुताबिक सच्चाईया साथे देया करो। 16 ओर तिना ते अलावा तिना खे बी देयो, जो मर्दा री वंशावलिया रे मुताबिक गिणी की तीऊँ साला री उम्रा रे या तेते ते जादा री उम्रा रे थे ओर आपणे-आपणे दलो रे मुताबिक आपणे-आपणे सेवा रे कामो खे हर रोज कामो रे मुताबिक यहोवे रे मन्दरो रे जाया करो थे। 17 तिना पुरोईता खे बी देयो, जिना री वंशावली तिना रे पितरा रे कराने रे मुताबिक कित्ती ओर लेविया खे बी जो बीई साला रिया उम्रा ते लई की बादो ते आपणे-आपणे दलो रे मुताबिक, आपणे-आपणे काम करो थे। 18 सारी सभा रे तिना रे बाल-बच्चे, जवाणसा, माठे-बेटिया खे बी देयो, जिना री वंशावली थी, कऊँकि सेयो सच्चाईया साथे आपू खे पवित्र करो थे।

19 तेबे हारूणो री ल्वादा रे पुरोईता खे बी जो आपणे-आपणे शईरो रे चराईया रे मैदानो रे रओ थे, देणे खे सेयो मर्द राखे थे, जिना रे नाओं ऊबे लिखी राखे थे ताकि सेयो पुरोईता रे सबी मर्दा खे ओर तिना सबी लेविया खे बी तिना रा इस्सा देया करो जिना री वंशावली थी। 20 सारे यहूदा दे बी हिजकिय्याहे एड़ा ई प्रबन्द कित्तेया ओर जो कुछ तेसरे परमेशर यहोवे री नजरा रे खरा ओर ठीक ओर सच्चाईया रा था, से तिजी खे करो था। 21 जो-जो काम तिने परमेशरो रे मन्दरो री आराधना, बिधान ओर आज्ञा रे बारे दे आपणे परमेशरो री टोल़ा खे कित्ते, सेयो तिने आपणा सारा मन लगाई की कित्ते ओर तिदे सफल बी ऊआ।