1 जेबे मनश्शे यहूदा दे राज करने लगेया, तेबे से बारा साला रा था ओर यरूशलेम शईरो दे पचूँजा साला तक राज करदा रया। 2 तिने से कित्तेया जेतेते यहोवा नफरत करो था, मतलब तिना दूजी जातिया रे बुरे कामो रे मुताबिक जो यहोवे इस्राएली लोका रे सामणे ते देशो ते बारे निकयाल़ी तिया थिया। 3 तिने सेयो ऊच्ची जगा जो तेसरे बाओ हिजकिय्याहे तोड़ी तिया थिया, फेर बणाईया ओर बाल नाओं रे देवतेया खे बेदिया ओर अशेरा नाओं री देविया खे मूर्तिया बणाईया ओर सर्गो रे सारे तारेया खे देवता मानी की तिना गे माथा टेकणे लगेया ओर तिना री आराधना बी करने लगेया। 4 तिने यहोवे रे तेस मन्दरो दे बेदिया बणाईया जेतेरे बारे दे यहोवे बोलेया था, "यरूशलेम शईरो दे मेरा नाओं सदा बणेया दा रणा।" 5 बल्कि यहोवे रे दुँईं आँगणा दे बी तिने सर्गो रे सारे तारेया खे देवता मानी की तिना खे बेदिया बणाईया। 6 तेबे तिने हिन्नोमो रे पाऊए री काअटिया रे आपणे माठे आगी रे बलि करी की चढ़ाए ओर शुभ-अशुभ मुर्ह्त मानो था ओर जादू-टोणा ओर तंत्र-मंत्र करो था ओर आत्मा ओर पूत सिद्धिवाल़ेया साथे दोस्ती राखो था। बल्कि तिने एड़े बऊत सारे काम कित्ते, जो यहोवे री नजरा रे बुरे थे ओर जिना ते से बऊत रोषे ओआ। 7 ओर तिने आपणी कअड़ी री अशेरा नाओं री मूर्ति परमेशरो रे तेस मन्दरो रे स्थापित कित्ती जेतेरे बारे रे परमेशरे दाऊद ओर तेसरे पाऊ सुलैमानो खे बोलेया था, "एते मन्दरो रे ओर यरूशलेम शईरो रे, जो मैं इस्राएलो रे सबी गोत्रा बीचे चूणी ला था, मां आपणा नाओं सदा राखणा, 8 ओर मां एड़ा नि करना कि जो देश मैं तुसा रे बुजुर्गा खे देई राखेया था, तिदे इस्राएल फेर पटकदा फिरो, बस इतणा जरूर ओ कि सेयो मेरी सारी आज्ञा खे, मतलब मूसे री दित्ती री सारी बिधान ओर बिधिया ओर नियमा खे मानणे रे चौकसी करो।" 9 मनश्शे यहूदा ओर यरूशलेम शईरो रे रणे वाल़े एथो तक पटकाईते कि तिने तिना जातिया ते बी बढ़ी की बुराई कित्ती, जो यहोवे इस्राएली लोका सामणे ते नाश कित्तिया थिया।

10 यहोवे मनश्शे ओर तेसरी प्रजा साथे गल्ला कित्तिया, पर तिने कोई त्यान नि दित्तेया। 11 तेबे यहोवे तिना पाँदे अश्शूरो रे राजे रे सेनापतिया ते चढ़ाई कराई ओर यो मनश्शे खे नकेल पाई की ओर पीतल़ी रिया बेड़िया दे जकड़ी की, तेसखे बाबेलो खे लईगे। 12 तेबे मुसीबता दे पड़ी की से आपणे यहोवा परमेशरो खे मानणे लगेया ओर आपणे बुजुर्गा रे परमेशरो सामणे बऊत दीन ऊआ ओर तेसते बिनती कित्ती। 13 तेबे तिने खुश ऊई की तेसरी प्रार्थना सुणी ओर से यरूशलेम शईरो रे पऊँचाई की तेसरा राज्य वापस कराईता। तेबे मनश्शे खे निश्चा ऊईगा कि यहोवा ई परमेशर ए। 14 इजी ते बाद तिने दाऊदो रे शईरो ते बारे गीहोनो रे पश्चिम कनारे ओर नाल़े रे मच्छलिया रे बड़े द्वारो तक एक दवाल बणवाई, तेबे ओपेल केरी की बऊत ऊच्चा करी ता ओर यहूदा रे सारे गढ़वाल़े शईरो रे सेनापति ठराईते। 15 तेबे तिने पराये देवता ओर यहोवे रे मन्दरो री मूर्ति ओर जितणी बेदिया तिने यहोवे रे मन्दरो रे पाह्ड़ो पाँदे ओर यरूशलेम शईरो रे बणवाईया थिया, सेयो सब दूर करी की शईरो ते बारे सेटी तिया। 16 तेबे तिने यहोवे री बेदिया री मरम्मत कित्ती ओर तेते पाँदे मेलबलि ओर तन्यवादो रिया बलिया चढ़ाणे लगेया ओर यहूदिया खे इस्राएलो रे परमेशर यहोवे री आराधना करने री आज्ञा दित्ती। 17 तेबे बी प्रजा रे लोक ऊच्ची जगा रे बलिदान करदे रये, पर बस आपणे परमेशर यहोवे खे।

18 मनश्शे रे ओर काम ओर तिने जो प्रार्थना आपणे परमेशरो ते कित्ती ओर तिना दर्शिया रे वचन, जो इस्राएलो रे परमेशर यहोवे रे नाओं ते तेस साथे गल्ला करो थे, ये सब इस्राएलो रे राजेया रे इतियासो री कताबा रे लिखी राखेया। 19 ओर तेसरी प्रार्थना ओर से किंयाँ सुणी ओर तेसरा सारा पाप, ओर विश्वासघात ओर तिने दीन ऊणे ते पईले केई-केई ऊच्ची जगा बणवाईया ओर अशेरा नाओं ओर कअड़ी रिया मूर्तिया खड़िया करवाईया, ये सब होशे रे वचनो रे लिखी राखेया। 20 अन्तो रे मनश्शे मरी गा ओर तेसखे तेसरे ई कअरो रे माट्टी दित्ती ओर तेसरा पाऊ आमोन तेसरी जगा पाँदे राज करने लगेया।

21 जेबे आमोन राज करने लगेया, तेबे से बाई साला रा था ओर यरूशलेम शईरो रे दो साला तक राज करदा रया। 22 आमोने आपणे बाओ मनश्शे रे जेड़ा से कित्तेया जो यहोवे री नजरा रे बुरा था ओर जितणी मूर्तिया तेसरे बाओ मनश्शे कअड़ी की बणवाईया थिया, से बी तिना सबी सामणे बलिदान करो था ओर तिना सबी री आराधना बी करो था। 23 जेड़ा तेसरा बाओ मनश्शे यहोवे रे सामणे दीन ऊआ, तेड़ा से दीन नि ऊआ, बल्कि आमोन जादा दोषी ऊँदा गया। 24 तेसरे कर्मचारिये द्रोह री साजिश करी की, से तेसरे ई मईलो रे काई ता। 25 तेबे आम माणूंए सेयो सारे काईते, जिने राजा आमोनो साथे द्रोह री साजिश कित्ती थी ओर लोके तेसरा पाऊ योशिय्याह तेसरी जगा पाँदे राजा बणाया।