1 जेबे योशिय्याह यहूदा दे राज करने लगेया, तेबे से आठ साला रा था ओर यरूशलेम शईरो रे कत्तीया साला तक राज करदा रया। 2 तिने से कित्तेया जो यहोवे री नजरा रे ठीक था ओर जिना बाटा रे तेसरा मूलमर्द दाऊद चलदा रया, तिना पाँदे ई से बी चलेया करो था ओर तेते ते से ना तो खूँजे ना दाँणे मुड़ेया।

3 से बाल़क ई था, मतलब तेसखे गद्दिया पाँदे बैठे रे आठ साल पनि ऊई रे थे कि आपणे मूलमर्द दाऊदो रे परमेशरो खे टोल़ने लगेया ओर बारूए साले से ऊच्ची जगा ओर आशेर नाओं री मूर्तिया ओर कअड़ी री ओर बणाई रिया मूर्तिया दूर करी की यहूदा ओर यरूशलेम शईरो खे शुद्ध करने लगेया। 4 बाल देवतेया रिया वेदिया तेस सामणे तोड़िया ओर सूरजो रिया मूर्तिया जो तिना सामणे ऊच्चिया पाँदे थिया, तिने बाडी तिया ओर अशेरा नाओं, कअड़ी रिया ओर बणाई रिया मूर्तिया तिने तोड़ी की पीसी तिया ओर तिना रा चूरा तिना लोका रिया कब्रा पाँदे सटयाई ता, जो तिना खे बलि चढ़ाओ थे। 5 तिना रे पुजारिया रिया आड्डिया तिने तिना रिया बेदिया पाँदे ई फूकिया। ईंयाँ तिने यहूदा ओर यरूशलेम शईरो खे शुद्ध कित्तेया। 6 तेबे मनश्शे, एप्रैम ओर शिमोनो रे बल्कि नप्तालिया तको रे शईरा रे खण्डहरा दे, तिने बेदिया तोड़ी तिया। 7 योशिय्याह राजे अशेरा ओर कअड़ी रिया मूर्तिया पीसी की चूरा बणाईता ओर इस्राएलो रे सारे देशो रिया सूरजो रिया मूर्तिया बाडी की यरूशलेम शईरो खे वापस ऊईगा।

8 तेबे आपणे राज्य रे ठारूए साले जेबे से देश ओर यहोवे रे मन्दरो दुँईं खे शुद्ध करी चुकेया, तेबे तिने असल्याह रे पाऊ शापान ओर शईरो रे परदान मासेयाह ओर योआहाजो रा पाऊ इतियासो खे लिखणे वाल़ा योआह खे आपणे परमेशर यहोवे रे मन्दरो री मरम्मत करने खे पेजीता। 9 तेबे तिने हिल्किय्याह बड़े पुरोईतो गे जाई की जो पैसा परमेशरो रे मन्दरो रे ल्याया था, मतलब जो लेवी द्वारपाले मनश्शे, एप्रैमी ओर सारे बचे रे इस्राएली लोका ते ओर सारे यहूदा, ओर बिन्यामीन ओर सारे यरूशलेम शईरो रे रणे वाल़ेया रे आथो ते लई की कट्ठा कित्तेया था, तेसगे सम्बाल़ी था। 10 मतलब तिने से तिना काम करने वाल़ेया रे आथो रे सम्बाल़ी ता जो यहोवे रे मन्दरो रे कामो पाँदे मुखिये थे ओर यहोवे रे मन्दरो दे काम करने वाल़ेया तेस मन्दरो रे जो कुछ टूटी-फूटी रा था, तिजी री मरम्मत करने खे लगाया। 11 मतलब तिने से मिस्त्री ओर राजमिस्त्रिया खे देईता, ताकि सेयो कअड़े रे पात्थर ओर जोड़ने खे लकड़ी खरीदो ओर तिना कअरा खे छवाओ, जो यहूदा रे राजेया नाश करीते थे। 12 सेयो माणूं सच्चाईया साथे काम करो थे ओर तिना रे अधिकारी मरारीय, यहत ओर ओबद्याह, लेवी ओर कहाती, जकर्याह ओर मशुल्लाम, काम चलाणे वाल़े ओर गाणे-बजाणे रा पेत सब जाणने वाल़े लेविये बी थे। 13 तेबे सेयो बोजा टोणे वाल़ेया रे परदान थे ओर कई प्रकारा री सेवा ओर काम चलाणे वाल़े थे ओर कुछ लेविये मुंशी, सरदार ओर द्वारपाल थे।

14 जेबे सेयो तेस पैसे खे जो यहोवे रे मन्दरो रे पऊँचाया था, काडणे लगी रे थे, तेबे हिल्किय्याह पुरोईतो खे मूसे रे जरीये दित्ती री यहोवे रे बिधि-बिधानो री कताब मिली। 15 तेबे हिल्किय्याहे राजे रे मंत्री शापानो खे बोलेया, "माखे यहोवे रे मन्दरो दे बिधानो री कताब मिली री।" तेबे हिल्किय्याहे शापानो खे से कताब देईती। 16 तेबे शापान तेसा कताबा खे राजे गे लईगा ओर ये सन्देश दित्तेया, "जो-जो काम तेरे कर्मचारिया गे सम्बाल़ेया था, सेयो तिजी खे करने लगी रे। 17 जो पैसा यहोवे रे मन्दरो रे मिलेया, से तिने निकयाल़ी की मुखिये ओर कारीगरा रे आथो रे सम्बाल़ी ता।" 18 तेबे शापान मंत्रीए खे ये बी बताईता कि हिल्किय्याह पुरोईते माखे एक कताब देई राखी, तेबे तिने तिजी बीचा ते राजे गे पढ़ी की सुणाया। 19 बिधानो रिया तिना गल्ला खे सुणी की राजे दु:खो रिया बजा ते आपणे टाल्ले फाड़े। 20 तेबे राजे हिल्किय्याह, शापानो रा पाऊ अहीकाम, मीका रा पाऊ अब्दोन, शापान मंत्री ओर असायाह नाओं रे आपणे कर्मचारिये खे आज्ञा दित्ती, 21 "तुसे जाई की मेरी तरफा ते ओर इस्राएल ओर यहूदा रे रणे वाल़ेया रिया तरफा ते एसा मिली रिया कताबा रे वचनो रे बारे दे यहोवे ते पूछो; कऊँकि यहोवे री बड़ी-पारी जल़न आसा पाँदे इजी खे पड़की री कऊँकि म्हारे बुजुर्गे यहोवे रा वचन नि मानेया ओर एसा बिधानो री कताबा रे लिखी री सबी आज्ञा रा पालण नि कित्तेया।"

22 तेबे हिल्किय्याहे राजे रे कई दूता समेत हुल्दा नबीया गे जाईकी तेसा साथे तेसा ई गल्ला रे मुताबिक गल्ला कित्तिया, से तो तेस शल्लूमो री लाड़ी थी जो तोखतो रा पाऊ ओर हस्रा रा पोता ओर टाल्लेया रा रखवाल़ा था ओर से जवाणस यरूशलेम शईरो दे नवीं टोलिया दे रओ थी। 23 तेसे तिना खे बोलेया, "इस्राएलो रा यहोवा परमेशर ईंयाँ बोलोआ कि जिने मर्दे तुसे मांगे पेजे, तेसखे ईंयाँ बोलो, 24 यहोवा ईंयाँ बोलोआ कि सुण, आऊँ एते जगा दे ओर एथो रे रणे वाल़ेया लोका पाँदे मुसीबत पाणी। मां सेयो सब स्राप तिना पाँदे पाणे जिना रा जिक्र यहूदा रे राजे रे सामणे जो कताब पढ़ी तिदे लिखी राखेया ए। 25 तिने लोके आऊँ छाडी की पराये देवतेया खे तूप बाल़ेया ओर आपणी बणाई रिया सबी मूर्तिया रे जरीये माखे गुस्सा चढ़ाया, इजी बजा ते मेरी जल़न एते जगा पाँदे पड़की री ओर शान्त नि ऊणी। 26 पर यहूदा रा राजा जिने तुसे यहोवे ते पूछणे खे पेजी राखे तेसखे तुसे ईंयाँ बोलो कि इस्राएलो रा यहोवा परमेशर ईंयाँ बोलोआ, 27 कऊँकि तूँ तिना गल्ला खे सुणी की दीन ऊआ ओर परमेशरो सामणे आपणा सिर चुकाया ओर तेसरिया गल्ला सुणी की जो तिने एते जगा रे बारे दे ओर एथो रे रणे वाल़ेया लोका रे खलाफ बोलिया, तैं मां सामणे आपणा सिर चुकाया ओर टाल्ले फाड़ी की मां सामणे रोया, इजी बजा ते मैं तेरी बिनती सुणी; यहोवे री ये बाणी ए। 28 सुण, आऊँ ताखे तेरे बुजुर्गा साथे एड़ा मलाऊँगा कि तूँ शान्तिया साथे आपणी कब्रा दे पऊँचाया जाणा ओर जो मुसीबत आऊँ एते जगा पाँदे ओर एथो रे रणे वाल़ेया लोका पाँदे पाणा चाऊँआ, तिजी बीचा ते ताखे कुछ बी देखणा नि पड़ना।" तेबे तिने लोके वापस ऊई की राजे खे येई सन्देस दित्तेया।

29 तेबे राजे यहूदा ओर यरूशलेम शईरो रे सब बुजुर्ग कट्ठे करने खे बोलेया। 30 राजा यहूदा रे सारे लोका ओर यरूशलेम शईरो दे सब रणे वाल़े ओर पुरोईत, लेविये, बल्कि छोटे-बड़े सारी‍ प्रजा रे लोका खे साथे लई की यहोवे रे मन्दरो दे गया, तेबे तिने जो वाचा री कताब यहोवे रे मन्दरो दे मिली थी तेते बीचा ते सारिया गल्ला पढ़ी की तिना खे सुणाईयां। 31 तेबे राजे आपणी जगा पाँदे खड़े ऊई की, यहोवे साथे इजी गल्ला रे बारे दे वाचा बानी कि मां यहोवे पीछे-पीछे चलणा ओर आपणे सारे मन ओर सारे प्राणो साथे तेसरी आज्ञा, चतौणी ओर बिधिया रा पालण करना ओर इना वाचा रिया गल्ला खे जो एते कताबा दे लिखी राखिया, पुरिया करनिया। 32 तेबे तिने तिना सबी खे जो यरूशलेम शईरो रे ओर बिन्यामीनो रे थे तेड़ी ई वाचा बणवाई ओर यरूशलेम शईरो रे रणे वाल़े, परमेशर जो तिना रे पितरा रा परमेशर था, तेसरी वाचा रे मुताबिक करने लगे। 33 योशिय्याहे इस्राएलो रे सारे देशो दे अशुद्ध मूर्तिया दूर करी कित्तिया जिना ते यहोवा नफरत करो था, फेर इस्राएलो दे जितणे बी इस्राएली लोक ओर गुलाम लोक मिले, तिना सबी ते यहोवा परमेशरो री सेवा कराई, मतलब तिना रे परमेशर यहोवे री आराधना कराई, तेसरी पूरी जिन्दगी तिने आपणे बुजुर्गा रे यहोवा परमेशरो पीछे चलणा नि छाडेया।