1 जेबे योताम राज करने लगेया, तेबे से पच्ची साला रा था ओर यरूशलेम शईरो रे सोल़ा साला तक राज करदा रया। ओर तेसरी माया रा नाओं यरूशा था, जो सादोक पुरोईतो री बेटी थी। 2 तिने से कित्तेया, जो यहोवे री नजरा रे ठीक ए, मतलब जेड़ा तेसरे बाओ उज्जियाहे कित्तेया था, ठीक तेड़ा ई तिने बी कित्तेया, तेबे बी से यहोवे रे मन्दरो रे नि कूसेया ओर प्रजा रे लोका री चाल तेबे बी बिगड़ी री थी। 3 तिने ई यहोवे रे मन्दरो पाँदला बड़ा द्वार बणाया ओर ओपेल पाह्ड़ो री दवाला पाँदे बी बऊत कुछ बणाया। 4 तेबे तिने यहूदा री पाह्ड़िया पाँदे कई शईर मजबूत कित्ते ओर बणो दे किले ओर गुम्मट बणाए। 5 से अम्मोनिया रे राजे साथे युद्ध करी की तिना पाँदे तागतबर ऊआ। तेस ई साले अम्मोनिये तेसखे लगभग 3,400 किलो चाँदी ओर लगभग 1,000 टन कणक ओर लगभग 1,000 टन जौ दित्तेया। तेबे दूजे ओर तीजे साले बी तिने तेसखे तिथणा ई दित्तेया। 6 ईंयाँ योताम सामर्थी ऊईगा, कऊँकि से आपणे आपू खे परमेशरो सामणे जाणी की सीदी चाल चलो था। 7 योतामो रे ओर काम ओर तेसरे सारे युद्ध ओर तेसरा चाल-चलण, इना सबी गल्ला रा लेखा इस्राएल ओर यहूदा रे राजेया री इतियासो री कताबा रे लिखी राखेया। 8 जेबे से राजा बणेया, तेबे से पच्ची साला रा था ओर से यरूशलेम शईरो रे सोल़ा साल तक राज करदा रया। 9 अन्तो रे योताम मरी गा ओर से दाऊदो रे शईरो दे दबाईता। तेबे तेसरा पाऊ आहाज तेसरी जगा पाँदे यहूदा देशो दे राज करने लगेया।