2 इतिआस 10

इस्राएलो रे राज्य रे दो इस्सा ऊई जाणे

1 तेबे रहूबियाम शकेम शईरो खे गया, कऊँकि सारे इस्राएली तेसखे राजा बनाणे खे तेथी गये थे। 2 जेबे नबातो रे पाऊ यारोबामे ये सुणेया, कऊँकि से तो मिस्र देशो दे रओ था, जेती से सुलैमान राजे रे डरो रे मारे नठी गा था तेबे से मिस्रो ते वापस आई गा। 3 इस्राएलो रे उत्तरी इस्से रे लोके यारोबामो गे दूत पेजे; तेबे यारोबाम ओर सारी इस्राएली प्रजा नवें राजा रहूबियामो ते मिलणे खे गई। ओर बोलणे लगे, 4 "तेरे बाओ राजा सुलैमाने तो आसा ते पारी काम करवाया ए, पर जे तूँ आसा रा काम अल़्का करी दे तो आसा तां ई साथे रणा ओर जेड़ा तूँ बोले तेड़ा ई आसा सेवा करनी।" 5 रहूबियामे तिना सबी खे बोलेया, "तीऊँ दिना ते बाद मांगे फेर आऊणा।" तेबे सेयो चली गे।

6 तेबे रहूबियाम राजे तिना स्याणेया ते जो तेसरे बाओ सुलैमानो री पूरी जिन्दगी तेस सामणे आजीर रया करो थे, ये बोली की सलाह् लई, "एसा प्रजा खे केड़ा ज्वाब देणा ठीक ए, इदे तुसे क्या सलाह् देओए?"

7 तिने तेसखे ये ज्वाब दित्तेया, "जे तूँ एसा प्रजा रे लोका साथे अच्छा बर्ताओ करी की तिना खे खुश करे ओर तिना खे मीठिया गल्ला बोले, तेबे सेयो सदा तेरे वशो दे बणे रे रणे।" 8 पर तिने से सलाह् जो स्याणेया तेसखे दित्ती थी छाडी ती ओर तिना जवाना ते सलाह् लई, जो तेस साथे बड़े ऊए थे ओर तेस सामणे आजीर रया करो थे। 9 तिना ते तिने पूछेया, "आऊँ प्रजा रे लोका खे केड़ा ज्वाब देऊँ, इदे तुसे क्या बोलोए? तिने तो माखे बोलेया था कि जो पारी काम तेरे बाओए आसा ते कराई राखे, तिजी खे तूँ अल़्का कर।" 10 जवाने जो तेस साथे बड़े ऊए थे तेसखे ये ज्वाब दित्तेया, "तिने लोके ताखे बोली राखेया कि तेरे बाओए आसा ते पारी काम कराई राखेया था, पर तिजी खे आसा खे अल़्का कर।" तैं तिना खे ईंयाँ बोलणा, "जे मेरा बाओ सेर था तो आऊँ सवा सेर आ। 11 मेरे बाओए तुसा ते जो पारी काम कराई राखेया था, से मां ओर बी पारी करना; मेरा बाओ तो तुसा खे कोड़ेया साथे सजा देयो था, पर मां कांडेया वाल़े डण्डे साथे सजा देणी।"

12 तीजे दिने जिंयाँ राजे बोलेया था, "तीजे दिने मांगे फेर आऊणा, तिंयाँ ई यारोबाम ओर सारी प्रजा राजा रहूबियामो गे आजीर ऊई।" 13 तेबे राजे तिना साथे कड़क गल्ला कित्तिया ओर रहूबियाम राजे स्याणेया री सलाह् छाडी की 14 जवाना री सलाह्यी रे मुताबिक तिना खे बोलेया, "मेरे बाओए तो तुसा ते पारी काम कराई राखेया था, पर मां से ओर बी पारी करना; मेरा बाओ तो तुसा खे कोड़ेया साथे सजा देयो था, पर मां कांडेया वाल़े डण्डे साथे सजा देणी।" 15 ईंयाँ राजे प्रजा री बिनती नि मानी; इजी री बजा ये कि जो वचन यहोवे शीलो रे रणे वाल़े अहिय्याह रे जरीये नबातो रे पाऊ यारोबामो खे बोलेया था, तिजी खे पूरा करने खे परमेशरे एड़ा ई ठराया था।

16 जेबे सारे इस्राएलिये देखेया कि राजा म्हारी नि सुणदा, तेबे तिने बोलेया,

"दाऊदो साथे म्हारा क्या अंश?

म्हारा तो यिशै रे पाऊए दे कोई इस्सा नि ए।

ओ इस्राएलियो, आपणे-आपणे डेरे खे चली जाओ!

एबे ओ दाऊद, आपणे ई कराने री फिकर कर।"

17 तेबे सारे इस्राएली आपणे डेरे खे चली गे। बस जितणे इस्राएली यहूदा रे शईरो रे बसी रे थे, तिना पाँदे ई रहूबियाम राज करदा रया। 18 तेबे रहूबियाम राजे हदोरामो खे जो सबी काम करने वाल़ेया पाँदे अधिकारी था पेजीता ओर इस्राएलिये तेस पाँदे पात्थर बाई की से काई ता। तेबे रहूबियाम फटाफट आपणे रथो पाँदे चढ़ी की, यरूशलेम शईरो खे नठी गा। 19 तेस दिनो ते, इस्राएलो रे लोके दाऊदो रे कराने रे खलाफ बिद्रोह कित्तेया। ओर आजो तक तेड़ा ई ए।