1 तेबे सुलैमाने यहोवे खे एक मन्दर ओर आपणा राजमईल बनाणे रे बारे दे सोचेया। 2 इजी री खातर सुलैमाने 70,000 बोजा टोणे वाल़े लोक ओर 80,000 पाह्ड़ो ते पात्थर तोड़ने वाल़े ओर डाल़ बाडणे वाल़े लोक ओर इना पाँदे 3,600 मुखिये गिणती करी की ठराए। 3 तेबे सुलैमाने सोरो रे राजा हीरामो गे सन्देसा पेजेया, "कुछ साल पईले जेड़ा तैं मेरे बाओ दाऊदो साथे बर्ताव कित्तेया, मतलब तेसरे रणे रा मईल बनाणे खे देवदार पेजे थे, तेड़ा ई एबे मां साथे बी बर्ताव कर। 4 देख, आऊँ आपणे परमेशर यहोवे रा एक मन्दर बनाणे वाल़ा ए, ताकि आऊँ तिजी खे पवित्र करुँ ओर तेसरे सामणे खुशबूदार तूप बाल़ू ओर हर रोज पेंटा री रोटी तिदे राखी जाओ ओर हर रोज प्यागा ओर साँजा, राम ओर नये चाँदो रे त्योआरो रे दिने ओर म्हारे परमेशर यहोवे रे सब ठीक बखतो दे होमबलि चढ़ाया जाओ। इस्राएलो खे एड़ी ई सदा री बिधि ए। 5 जो मन्दर आऊँ बनाणे वाल़ा ए, से महान् ऊणा; कऊँकि म्हारा परमेशर सबी देवतेया ते बड़ा ए। 6 पर केसदे इतणी तागत ए कि तेसखे मन्दर बणाओ, से तो स्वर्गो रे बल्कि सबी ते ऊच्चे स्वर्गो दे पनि समांदा? आऊँ क्या ए कि तेस सामणे तूप बाल़ने खे छाडी की ओर कुछ सोची की तेसरा मन्दर बणाऊँ? 7 इजी री खातर एबे तूँ मांगे एक एड़ा माणूं पेजी दे, जो सूईना, चाँदी, पीतल़, लोआ ओर बैंगणी, लाल ओर नीले टाल्लेया दे कडाई करने री कारीगरिया दे निपुण ओ ओर जो नक्काशी बी जाणदा ओ, ताकि से मेरे बाओ दाऊदो रे ठराए रे निपुण माणूंआ साथे ऊई की जो मांगे यहूदा ओर यरूशलेम शईरो दे रओए, काम करो। 8 तेबे लबानोनो ते मांगे देवदार, सनौबर ओर चन्दनो री लकड़ी पेजणी, कऊँकि माखे पता ए कि तेरे दास लबानोनो रे डाल़ बाडणा जाणोए ओर तेरे दासा साथे मेरे दासा बी रई की काम करना, 9 माखे बऊत सारी लकड़िया री जरूरत ए, कऊँकि जो मन्दर आऊँ बनाणा चाऊँआ, से बड़ा ओर नऊखा ऊणा। 10 मां तेरेया दासा खे जिना लकड़ी बाडणी तिना खे 2,000 टन कणक, ओर तिथणा ई जौ देणा, 440,000 लीटर शराब देणी ओर तिथणा ई तेल बी देणा।"

11 तेबे सोरो रे राजा हीरामे चिट्ठी लिखी की सुलैमानो गे पेजी, "यहोवा आपणी प्रजा साथे प्यार राखोआ, इजी ते तिने तूँ तिना रा राजा बणाईता।" 12 फेर हीरामे ये बी लिखेया, "तन्य ए इस्राएलो रा यहोवा परमेशर, जो सर्ग ओर तरतिया खे बनाणे वाल़ा ए ओर तिने दाऊद राजे खे एक अक्लमंद, उशयार ओर समजदार पाऊ दित्तेया, ताकि से यहोवे रा एक मन्दर ओर आपणा राजमईल बी बणाओ। 13 इजी री खातर एबे आऊँ एक अक्लमंद ओर समजदार मर्दो खे, मतलब हूराम-अबीए खे पेजुँआ, 14 जो इस्राएलो रे एक दानी गोत्रो री जवाणसा रा पाऊ ए ओर तेसरा बाओ सोरो रा रणे वाल़ा था। से सूईना, चाँदी, पीतल़, लोआ, पात्थर, लकड़ी, बैंगणी ओर नीले, लाल, छोटे रेशमो रे टाल्ले दे कडाई करने रा काम ओर हर प्रकारा री नक्काशी जाणोआ ओर हर प्रकारा री कारीगरी बणाई सकोआ इजी री खातर तेरे उशयार माणूंआ साथे ओर मेरे प्रभु तेरे बाओ दाऊदो रे उशयार माणूंआ साथे, तेसखे बी काम मिलो। 15 मेरे मालके जो कणक, जौ, तेल ओर शराब पेजणे रे बारे दे वायदा करी राखेया, से आपणे दासा गे पेजी दे। 16 ओर आसा लोका जितणी लकड़ी ताखे चाईयो तितणी लबानोनो रे पाह्ड़ो ते बाडणी ओर बेड़े बणाई की समुद्रो रिया बाटा ते याफा शईरो रे पऊँचाणी ओर तैं से यरूशलेम शईरो खे लई जाणी।"

17 तेबे राजा सुलैमाने इस्राएल देशो रे सबी परदेशिया री गिणती लई, ये तेसा गिणतिया ते बाद ऊई जो तेसरे बाओ दाऊदे लई थी ओर सेयो 153,600 मर्द निकल़े। 18 तिना बीचा ते तिने 70,000 बोजा टोणे वाल़े, 80,000 पाह्ड़ो पाँदे पात्थर तोड़ने वाल़े ओर डाल़ बाडणे वाल़े ओर 3,600 तिना लोका ते काम कराणे वाल़े मुखिये नियुक्त कित्ते।