2 इतिआस 29

यहूदा दे हिजकिय्याह रा राज्य

1 जेबे हिजकिय्याह राज करने लगेया, तेबे से पच्ची साला रा था ओर उणत्ती साला तक यरूशलेम शईरो रे राज करदा रया। तेसरी माया रा नाओं अबिय्याह था, जो जकर्याह री बेटी थी। 2 जेड़ा तेसरे मूलमर्द दाऊदे कित्तेया था, मतलब जो यहोवे री नजरा दे ठीक था, तेड़ा ई तिने बी कित्तेया।

मन्दरो खे शुद्ध करना

3 आपणे राज्य रे पईले सालो रे पईले मीन्ने रे तिने यहोवे रे मन्दरो रे द्वार खुलाईते ओर तिना री मरम्मत बी कराई। 4 तेबे तिने पुरोईत ओर लेवी ल्याई की पूर्वो रे चौको रे कट्ठे कित्ते 5 ओर तिना खे बोलणे लगेया, "ओ लेवियो, मेरी सुणो! एबे आपू-आपू खे पवित्र करो ओर आपणे बुजुर्गा रे परमेशर यहोवे रे मन्दरो खे फेर पवित्र करो ओर पवित्र जगा ते मैल निकयाल़ो। 6 देखो, म्हारे बुजुर्गे विश्वासघात करी की से काम कित्तेया, जो म्हारे यहोवा परमेशरो री नजरा रे बुरा था ओर तिने से छाडी की तेसरे मन्दरो ते मूँ फेरी की तेसखे पीठ दखाई थी। 7 तेबे तिने बरांडे रे द्वार बन्द कित्ते ओर दिऊए बजयाई ते ओर पवित्र जगा रे इस्राएलो रे परमेशरो खे ना तो तूप बाल़ेया ओर ना ई होमबलि चढ़ाया था।"

8 इजी री खातर यहोवे रा रोष यहूदा ओर यरूशलेम शईरो पाँदे पड़केया ओर तिने एड़ा कित्तेया कि सेयो मारे-मारे फिरे ओर सेयो लोका बीचे मजाको री बजा बणे, जेड़ा कि तुसे आपणी आखी ते देखणे लगी रे। 9 देखो, इजी बजा ते म्हारे बुजुर्ग तलवारी साथे मरे ओर म्हारे माठे-बेटिया ओर जवाणसा गुलामिया रे चली गे। 10 इजी री खातर मैं हिजकिय्याहे ये फैंसला करी राखेया कि इस्राएलो रे परमेशर यहोवे साथे वाचा बानूँ, ताकि तेसरा पड़केया रा गुस्सा आसा पाँदा ते दूर ऊई जाओ। 11 ओ मेरे माठेयो, सुस्त नि बणो, देखो, यहोवे तुसे आपू सामणे खड़े रणे ओर आपणी सेवा-टईल करने ओर तूप बाल़ने रा काम करने खे चूणी राखे।

12 तेबे लेवीए परमेशरो रे मन्दरो दे काम करना शुरू कित्तेया। कहातिया रे कुलो बीचा ते अमासै रा पाऊ महत ओर अजर्याह रा पाऊ योएल। मरारिया रे कुलो बीचा ते अब्दिये रा पाऊ कीश, ओर यहल्लेलेलो रा पाऊ अजर्याह। गेर्शोनिया रे कुलो बीचा ते जिम्मा रा पाऊ योआह ओर योआह रा पाऊ एदेन। 13 ओर एलीसापानो रे कुलो ते शिम्री ओर यूएल। आसापो रे कुलो ते जकर्याह ओर मत्तन्याह। 14 ओर हेमानो रे कुलो बीचा ते यहीएल ओर शिमी। ओर यदूतूनो रे कुलो बीचा ते शमायाह ओर उज्जीएल। 15 इने आपणे पाई कट्ठे कित्ते ओर आपू-आपू खे पवित्र करी की राजे री तेसा आज्ञा रे मुताबिक यहोवे रे मन्दरो खे शुद्ध करने खे से साफ कित्तेया, जेते रे बारे दे यहोवे राजा हिजकिय्याहो खे बोलेया था। 16 तेबे पुरोईत परमेशरो रे मन्दरो रे पीतरले इस्से दे गये ओर तेतेखे शुद्ध करने खे तेती जितणिया बी अशुद्ध चीजा मिलिया तिना सबी खे निकयाल़ी की यहोवे रे मन्दरो रे आँगणो रे ली आए ओर लेविये सेयो चकी की बारे किद्रोनो रे नाल़े रे पऊँचाईया। 17 पईले मीन्ने रे पईले दिने तिने पवित्र करने रा काम शुरू कित्तेया ओर तेस ई मीन्ने रे आठुए दिने यहोवे रे बरांडे तक आईगे। ईंयाँ तिने यहोवे रा मन्दर आठ दिना रे पवित्र कित्तेया ओर पईले मीन्ने रे सोल़ूए दिने तिने से काम पूरा कित्तेया। 18 तेबे तिने राजा हिजकिय्याह गे पीतरे जाई की बोलेया, "आसे यहोवे रा पूरा मन्दर, पांडे समेत होमबलिया री बेदी ओर पेंटा री रोटिया री मेज बी शुद्ध करी ती री। 19 जितणे पांडे आहाज राजे आपणे राज्य दे विश्वासघात करी की सेटी ते थे, सेयो बी आसे कट्ठे करी की पवित्र करीते ओर सेयो यहोवे री बेदिया सामणे राखी ते रे।"

मन्दरो री दुबारा प्रतिष्ठता

20 तेबे राजा हिजकिय्याह प्यागा उठी की यरूशलेम शईरो रे परदाना खे कट्ठे करी की, परमेशरो रे मन्दरो खे गया। 21 तेबे सेयो आपू साथे सात बाच्छू, सात पेड-बाकरिया, सात पेडा रे बच्चे ओर सात बाकरिया रे बच्चे लईगे। तिने सेयो जानवर राज्य, पवित्र जगा ओर यहूदा रे लोका रिया तँईं पापबलिया खे चढ़ाए। राजे हारूणो रे कुलो रे पुरोईता ते बोलेया, कि सेयो यहोवे रिया वेदिया पाँदे बलिदान चढ़ाओ। 22 तेबे पुरोईते सात बाच्छू बलि कित्ते ओर पुरोईते तिना रा खून लई की बेदिया पाँदे छिड़की ता, तेबे तिने खाड्डू चढ़ाए ओर तिना रा खून बी बेदिया पाँदे छिड़की ता, तेबे तिने पेडा रे बच्चे बलि कित्ते ओर तिना रा खून बी बेदिया पाँदे छिड़की ता। 23 तेबे सेयो पापबलिया रे बाकरेया खे राजा ओर मण्डल़िया रे नेड़े ल्याये ओर तिना पाँदे आपणे-आपणे आथ राखे। 24 तेबे पुरोईते सेयो बलि करी की, तिना रा खून बेदिया पाँदे छिड़की की पापबलि कित्तेया, जेते कि सारे इस्राएलो रिया तँईं प्राश्चित करेया जाओ, कऊँकि राजे सारे इस्राएलो रिया तँईं होमबलि ओर पापबलि चढ़ाणे री आज्ञा दित्ती थी। 25 इजी ते बाद तिने दाऊद ओर राजे रे दर्शी गाद ओर नातान नबीए री आज्ञा रे मुताबिक जो यहोवे रिया तरफा ते नबिया रे जरीये आई थी, खंजरी, सारंगिया ओर बीणा लई की लेवी यहोवे रे मन्दरो रे खड़े कित्ते। 26 तेबे लेविये दाऊदो रे चलाए रे बाजे लई की ओर पुरोईत तुरहिया लई की खड़े ऊए। 27 तेबे हिजकिय्याह राजे बेदिया पाँदे होमबलि चढ़ाणे री आज्ञा दित्ती ओर जेबे होमबलि चढ़ने लगी, तेबे यहोवे रा गीत शुरू ऊआ ओर तुरहिया ओर इस्राएलो रे दाऊद राजे रे बाजे बजणे लगे; 28 ओर मण्डल़िया रे सारे लोक माथा टेकदे ओर गाणे वाल़े गांदे ओर तुरहिया बजाणे वाल़े बजांदे रये, ये सब तदुओ तक ऊँदा रया, जदुओ तक होमबलि चढ़ी नि चूकी। 29 जेबे बलि चढ़ी चूकी, तेबे राजा ओर जितणे जणे तेस साथे तेती थे, तिने सबी सिर चुकाई की माथा टेकेया। 30 हिजकिय्याह राजे ओर परदाने लेविया खे आज्ञा दित्ती कि दाऊद ओर आसाप दर्शिये रे पजन गायी की यहोवे री स्तुति करो ओर तिने खुशिया साथे स्तुति कित्ती ओर सिर चुकाई की माथा टेकेया। 31 तेबे हिजकिय्याह राजा बोलणे लगेया, "एबे तुसे यहोवे खे आपणा सब कुछ अर्पण करी राखेया, इजी री खातर नेड़े आई की यहोवे रे मन्दरो दे मेलबलि ओर तन्यवाद-बलि पऊँचाओ।" तेबे मण्डल़िया रे लोके मेलबलि ओर तन्यवाद-बलि पऊँचाए ओर जितणे आपणी इच्छा साथे देणा चाओ थे तिने बी होमबलि पऊँचाई। 32 आपणी होमबलिया रिया तँईं, लोक सत्तर बल़द, 100 खाडू ओर 200 मिन्टू ल्याए। 33 पवित्र कित्ते रे डांगर 600 बल़द ओर 3,000 पेडा-बाकरिया थिया। 34 पर पुरोईत इतणे थोड़े थे कि सेयो सबी होमबलिया रे डांगरा रिया खाला नि उतारी सके, तेबे तिना रे लेवी पाई तेस बखतो तक तिना री मताद करदे रये जदुओ तक से काम पूरा नि ऊई चुकेया ओर पुरोईते आपू खे पवित्र नि कित्तेया, कऊँकि लेविये आपू खे पवित्र करने खे पवित्र पुरोईता ते जादा सीदे मनो रे थे। 35 तेबे होमबलिया रे डांगर बऊत थे ओर मेलबलिया रे डांगरा री चर्बी बी बऊत थी ओर एक-एक होमबलिया साथे अर्घ बी देणा पड़ेया। ईंयाँ यहोवे रे मन्दरो री आराधना ठीक कित्ती। 36 तेबे राजा हिजकिय्याह ओर सारी प्रजा रे लोक तेस कामो रिया बजा ते खुश ऊए, जो यहोवे आपणी‍ प्रजा खे त्यार कित्तेया था, कऊँकि से काम फटाफट ऊईगा था।