2 इतिआस 35

योशिय्याह रा कित्तेया दा फसह रा त्योआर

1 योशिय्याहे यरूशलेम शईरो रे यहोवे खे फसह रा त्योआर मनाया ओर पईले मीन्ने रे चौदुए दिने फसह रा डांगर बलि कित्तेया। 2 तिने पुरोईत आपणे-आपणे कामो पाँदे ठराए ओर यहोवे रे मन्दरो री सेवा करने खे तिना खे ईम्मत दित्ती। 3 तेबे लेविये जो सबी इस्राएली लोका खे सिखाओ थे ओर यहोवे खे पवित्र ठईरे थे, तिना खे तिने बोलेया, "तुसे पवित्र सन्दूको खे तेस मन्दरो दे राखो जो दाऊदो रे पाऊ इस्राएलो रे राजा सुलैमाने बणवाया था; एबे तुसा खे से कान्दा पाँदे नि चकणा पड़ना। एबे आपणे परमेशर यहोवे री ओर तेसरी प्रजा इस्राएलो री सेवा करो। 4 इस्राएलो रे राजा दाऊद ओर तेसरे पाऊ सुलैमान दुँईं री लिखी री बिधिया रे मुताबिक, आपणे-आपणे पितरा रे मुताबिक, आपणे-आपणे दलो दे सेवा रा काम करने खे त्यार रओ। 5 तुसा रे पाईया रे पितरा रे करानेया रे इस्सेया रे मुताबिक पवित्र जगा रे खड़े रओ, मतलब तिना रे एक इस्से खे लेविया रे एक-एक पितरा रे कराने रा एक इस्सा ओ। 6 फसह रे डांगरा खे बलि करो ओर आपू-आपू खे पवित्र करी की आपणे पाईया रिया तँईं त्यारी करो, ताकि सेयो यहोवे रे तेस वचनो रे मुताबिक करी सको, जो तिने मूसे रे जरीये बोलेया था।" 7 तेबे योशिय्याहे सबी लोका खे जो तेती आजीर थे, 30,000 पेडा-बाकरिया रे बच्चे ओर 3,000 बल़द दित्ते थे; यो सब फसह रे बलिदानो खे राजे रिया सम्पत्तिया बीचा ते दित्ते थे। 8 तेसरे परदाने प्रजा रे लोक, पुरोईत ओर लेविया खे आपणी इच्छा रे मुताबिक बलिया खे डांगर दित्ते। ओर हिल्किय्याह, जकर्याह ओर यहीएल नाओं रे परमेशरो रे मन्दरो रे परदाने पुरोईता खे 2,600 पेडा-बाकरिया ओर 300 बल़द फसह रे बलिदानो खे दित्ते। 9 कोनन्याह, शमायाह ओर नतनेल जो तेसरे पाई थे, ओर हशब्याह, यीएल ओर योजाबाद नाओं रे लेविया रे परदाने लेविया खे 5,000 पेडा-बाकरिया ओर 500 बल़द फसह रे बलिदानो खे दित्ते।

10 ईंयाँ आराधना री त्यारी ऊई गी ओर राजे री आज्ञा रे मुताबिक पुरोईत आपणी-आपणी जगा पाँदे काम करो थे ओर लेविये आपणे-आपणे दलो दे खड़े ऊए। 11 तेबे फसह रे डांगर बलि कित्ते ओर पुरोईत बलि करने वाल़ेया रे आथो ते खून लई की छिड़की देयो थे ओर लेविये तिना री खाल उतारो थे। 12 तेबे तिने होमबलिया रे डांगर इजी री खातर लग कित्ते, ताकि तिना खे लोका रे पितरा रे करानेया रे इस्से रे मुताबिक देयो कि सेयो यहोवे खे चढ़त देयो जेड़ा कि मूसे री कताबा रे लिखी राखेया ओर बल़द बी तिने एड़े ई कित्ते। 13 तेबे तिने फसह रे डांगरा रा मास बिधिया रे मुताबिक आगी रे पूजेया ओर पवित्र चीजा, टोकणी ओर टोकणेया रे ओर थाल़िया दे राखी की फुर्तिया साथे लोका तक पऊँचाई ता। 14 तेबे तिने आपू खे ओर पुरोईता खे त्यारी कित्ती, कऊँकि हारूणो री ल्वादा रे पुरोईत होमबलिया रे डांगर ओर चर्बी राथियो तक चढ़ांदे रये, इजी बजा ते लेविये आपू खे ओर हारूणो री ल्वादा रे पुरोईता खे त्यारी कित्ती।

15 आसापो रे कुलो रे गाणे वाल़े, दाऊद, आसाप, हेमान ओर राजे रे दर्शी यदूतूनो री आज्ञा रे मुताबिक आपणी-आपणी जगा दे रये ओर द्वारपाल एक-एक बड़े द्वारो गे रये। तिना खे आपणा-आपणा काम नि छाडणा पड़ेया, कऊँकि तिना रे लेवी पाईए तिना खे त्यारी कित्ती। 16 ईंयाँ तेस ई दिने राजा योशिय्याह री आज्ञा रे मुताबिक फसह मनाणे ओर यहोवे री बेदिया पाँदे होमबलि चढ़ाणे रे कामो खे यहोवे री सारी आराधना री त्यारी कित्ती। 17 जो इस्राएली तेथी आजीर थे तिने फसह खे तेसी बखते ओर बिना सजेड़े री रोटिया रा त्योआर सात दिना तक मनाया। 18 एस फसह रे बराबर शमूएल नबीए रे दिना ते इस्राएलो रे कोई फसह नि मनाया था ओर ना इस्राएलो रे केसी राजे एड़ा मनाया, जेड़ा योशिय्याह ओर पुरोईते, लेविये ओर जितणे यहूदी ओर इस्राएली तेती आजीर थे, तिने ओर यरूशलेम शईरो रे रणे वाल़ेया मनाया। 19 ये फसह योशिय्याह रे राज्य रे ठारूए साले मनाया।

योशिय्याह री मौत ओर तेसरे राज्य रा अन्त

20 इजी ते बाद जेबे योशिय्याह मईलो खे त्यार करी चुकेया, तेबे मिस्रो रा राजा नको फरात नदिया रे नेड़े कर्कमीश शईरो ते लड़ने खे आया ओर योशिय्याह तेसरा सामणा करने खे गया। 21 पर नको राजे योशिय्याह गे आपणे दूता रे जरीये सन्देस पेजेया, "ओ यहूदा रे राजा मेरा तां साथे क्या काम! आज आऊँ तां पाँदे नि तेस कुलो पाँदे ई चढ़ाई करने लगी रा, जेस साथे आऊँ युद्ध करूँआ, तेबे परमेशरे माखे फुर्ती करने खे बोली राखेया। इजी री खातर परमेशर जो मां साथे ए, तेसते लग रओ, केथी एड़ा नि ओ कि से ताखे नाश करो।" 22 पर योशिय्याहे तेसते मूँ नि फेरेया, बल्कि तेस साथे लड़ने खे पेष बदलेया ओर नको रिया सेयो गल्ला नि मानिया जो तिने परमेशरो रिया तरफा ते बोलिया थिया ओर मगिद्दो री तराईया दे तेस साथे युद्ध करने खे गया। 23 तेबे धनुष चलाणे वाल़ेया योशिय्याह राजे रिया तरफा खे तीर छाडे ओर राजे आपणे सेवका खे बोलेया, "आऊँ बऊत कायल ऊईगा रा, ओर एबे माखे एथा ते फटाफट लई चलो।" 24 तेबे तेसरे सेवके से रथो ते उतारी की तेसरे दूजे रथो पाँदे चढ़ाया ओर यरूशलेम शईरो खे लईगे। तेती से मरी गा ओर तेसरे बुजुर्गा रे कब्रिस्तानो रे तेसखे माट्टी दित्ती। यहूदी ओर यरूशलेमिये योशिय्याह खे शोग मनाया। 25 यिर्मयाहे योशिय्याह खे शोगो रा गाणा बणाया ओर सब गाणे वाल़े ओर गाणे वाल़िया आपणे शोगो रे गाणे रे योशिय्याह री चर्चा आजो तक करोईया। इना रा ये गाणा इस्राएलो दे एक बिधिया जेड़ा ठराया ओर यो गल्ला शोगो रे गाणेया रे लिखी राखिया।

26 योशिय्याह रे ओर काम ओर पलाईया रे जो काम तिने तेतेरे ई मुताबिक कित्ते जो यहोवे रे बिधानो दे लिखी राखे, 27 शुरूओ ते लई की अन्तो तक तेसरे सारे काम इस्राएल ओर यहूदा रे राजेया रे इतियासो री कताबा दे लिखी राखे।