2 इतिआस 9

शेबा री राणिया रा सुलैमानो ते मिलणा

1 जेबे शेबा री राणिये सुलैमानो री कीर्ति सुणी, तेबे से कठण-कठण प्रश्ना साथे तेसरी परीक्षा करने खे यरूशलेम शईरो खे चली गी। से बऊत बड़ा दल ओर मसाले ओर बऊत सूईना ओर मणिया साथे लादे रे ऊँट साथे लई की यरूशलेम शईरो खे आई ओर सुलेमानो गे पऊँची की तेस साथे आपणे मनो री सारिया गल्ला रे बारे दे गल्ला कित्तिया। 2 सुलैमाने तेसा रे सबी प्रश्ना रे ज्वाब दित्ते, कोई गल्ल सुलैमानो री बुद्धिया ते एड़ी बारे नि रई कि से तिजी खे नि बताई सकेया। 3 जेबे शेबा री राणिये सुलैमानो री बुद्धि ओर तेसरा बणाया रा मईल, 4 से तेस खाने खे देखी की बऊत ई हैरान थी जो तेसे मेजो पाँदे देखेया था, ओर तेसरे कर्मचारी किंयाँ मेजो पाँदे बैठोए ओर तेसरी सेवा करने वाल़े सेवक किंयाँ खड़े रओए, ओर केड़े-केड़े टाल्ले पईनी राखोए, ओर तेसरे पल्याणे वाल़े केड़े ए, ओर सेयो केड़े टाल्ले पईनोए ओर से केड़ी चढ़ाई ए जिदे से यहोवे रे मन्दरो दे बलिदान चढ़ाणे खे जाओआ, जेबे तेसे ये सब देखेया, तेबे से हैरान ऊई। 5 तेबे तेसे राजे खे बोलेया, "मैं तेरे कामो री ओर तेरी अक्ला री जो कीर्ति आपणे देशो रे सुणी से सच्च ईए। 6 पर जदुओ तक मैं आपू आई की आपणी आखी ते ये नि देखेया, तदुओ तक मैं तिना रा परोसा नि कित्तेया; बल्कि तेरी बुद्धिया री आदी तारीफ बी माखे नि बताई थी; तूँ तेसा कीर्तिया ते बढ़ी की ए जो मैं सुणी थी। 7 तन्य ए इस्राएलो रे माणूं, तन्य ए तेरे यो सेवक, जो हर रोज तां सामणे आजीर रई की तेरी बुद्धिया रिया गल्ला सुणोए। 8 तन्य ए तेरा यहोवा परमेशर, जो तांते एड़ा खुश ऊआ कि तूँ आपणी राजगद्दिया पाँदे इजी खे बठयाल़ेया कि तूँ आपणे परमेशर यहोवे री तरफा ते राज करे; तेरा परमेशर जो इस्राएलो साथे प्यार करी की तिना खे सदा खे स्थिर करना चाओ था, इजी बजा ते तिने तूँ न्याय ओर तर्म करने खे तिना रा राजा बणाया।" 9 ये सब बोलणे ते बाद तेसे राजे खे लगभग 4,500 किलो सूईना, बऊत सारा खुशबूदार द्रव्य ओर मणि दित्ते, जेड़े खुशबूदार द्रव्य शेबा री राणिये सुलैमान राजे खे दित्ते, तेड़े देखणे दे पनि आए। 10 तेबे हीराम ओर सुलैमान दुँईं रे जाह्जी जो ओपीरो ते सूईना ल्याओ थे, सेयो चन्दनो री लकड़ी ओर मणि बी ल्याओ थे। 11 राजे चन्दनो री लकड़िया साथे यहोवे रा मन्दर ओर राजमईलो खे चबूतरे ओर गाणेवाल़ेया खे बीणा ओर सारंगिया बणवाईया; एड़ी चीजा तेसते पईले यहूदा प्रदेशो रे नि देखिया थिया। 12 फेर शेबा री राणिये जो कुछ चाया सेई सुलैमान राजे तेसा री इच्छा रे मुताबिक दित्तेया; ये तेसते जादा था, जो से राजे गे ल्याई थी। तेबे से आपणे माणूंआ समेत आपणे देशो खे वापस ऊई गी।

सुलैमानो रा तअन ओर शक्ति

13 जो सूईना हर साल सुलैमानो गे पऊँचेया करो था, तिजी रा बजन लगभग 23,000 किलो था। 14 ये तिजी ते जादा था जो सौदागर ओर बपारी ल्याओ थे ओर अरब देशो रे सारे राजा ओर देशो रे सेनापति बी सुलैमानो गे सूईना-चाँदी ल्याओ थे। 15 सुलैमान राजे सूईना कअड़ाई की 200 बड़ी-बड़ी ढाला बणवाईया; एक-एक ढाली दे साडे तीन किलो सूईना लगेया। 16 तेबे तिने सूईना कअड़ाई की 300 छोटी ढाला ओर बी बणवाईया, एक-एक छोटी ढाला दे लगभग दो किलो सूईना लगेया, ओर राजे सेयो लबानोनी बण नाओं रे मईलो दे राखी तिया। 17 राजे आथी दाँदो रा एक बड़ा सिंहासन बणवाया ओर शुद्ध सूईने साथे मढ़वाया। 18 तेते सिंहासनो रे छे पईड़िया ओर सूईने रा एक पायदान था; यो सब सिंहासनो साथे जुड़े रे थे ओर बैठणे री जगा रे दुँईं तरफा खे टासणे लगी रे थे ओर दुँईं टासणेया गे एक-एक शेरो री मूर्ति बणाई राखी थी। 19 छे पईड़िया री दुँईं तरफा खे एक-एक शेर खड़ेया रा बणी रा था, सेयो सारे बारा थे। केसी राज्य दे एड़ा सिंहासन कदी नि बणेया। 20 सुलैमान राजे रे पीणे रे सारे पांडे सूईने रे थे ओर लबानोनी बण नाओं रे मईलो रे सब पांडे बी शुद्ध सूईने रे थे, सुलैमानो रे दिना दे चाँदिए री कोई कीमत नि थी। 21 कऊँकि समुद्रो दे हीरामो रे जाह्जा साथे राजा बी तर्शीशो दे जाह्ज राखो था ओर तीऊँ-तीऊँ साला तक तर्शीशो रे जाह्ज सूईना, चाँदी, आथी दाँद, बान्दर ओर मोर लई की आओ थे।

22 ईंयाँ सुलैमान राजा तअन ओर बुद्धिया साथे तरतिया रे सबी राजेया ते बढ़ी की ऊईगा। 23 तरतिया रे सब राजा सुलैमानो री तेसा बुद्धिया री गल्ला सुणने खे, जो परमेशरे तेसरे मनो दे दित्ती थी तेसरा दर्शण करना चाओ थे। 24 सेयो हर साल आपणी-आपणी पेंट, मतलब सूईने ओर चाँदिए रे पांडे, टाल्ले, शस्त्र, खुशबूदार द्रव्य, कोड़े ओर खच्चरा ल्याओ थे। 25 आपणे रथो रे कोड़ेया खे सुलैमानो रे 4,000 कोड़ेया री गवाईणी ओर तिना गे 12,000 कोड़े बी थे, जो तिने रथो रे शईरो दे ओर यरूशलेम शईरो दे राजे गे राखे। 26 से फरात नदिया ते लई की पलिश्तिया रे देश ओर मिस्रो रे बन्ने तको रे सबी राजेया पाँदे राज करो था। 27 तेबे राजे एड़ा कित्तेया कि बऊत जादा ऊणे रिया बजा ते यरूशलेम शईरो रे चाँदिए री कीमत पात्थरा जेड़ी ओर देवदारो री कीमत थालले देशो रे गूलरा जेड़ी ऊई गी। 28 सुलैमान मिस्रो ते आपू खे कोड़े ल्याया ओर बाकी सारे देशा ते बी ल्याया।

सुलैमानो री मौत

29 शुरूओ ते अन्तो तक सुलैमानो रे ओर सारे कामा रे बारे दे नातान नबीए री कताबा दे ओर शीलो शईरो दे रणे वाल़े अहिय्याह री प्रचारो री कताबा रे ओर नबातो रे पाऊ राजा यारोबामो रे बारे दे इद्दो दर्शिये रे दर्शणो री कताबा दे लिखी राखे। 30 सुलैमाने यरूशलेम शईरो रे सारे इस्राएली लोका पाँदे चाल़ी साल तक राज कित्तेया। 31 तेबे सुलैमान मरी गा ओर से यरूशलेम शईरो री तेसा जगा दे दबाया जेतेखे दाऊदो रा शईर बोलेया जाओ था। ओर तेसते बाद तेसरा पाऊ रहूबियाम तेसरी जगा पाँदे राजा बणेया।