1 तेबे सुलैमाने यरूशलेम शईरो रे मोरिय्याह नाओं रे पाह्ड़ो पाँदे तेसा ई जगा रे यहोवे रा मन्दर बनाणा शुरू कित्तेया, जो तेसरे बाओ दाऊदे दर्शण पाई की यबूसी ओर्नानो रे खल्याणो रे त्यार कित्तेया था। 2 तिने आपणे राजो रे चौथे सालो रे दूजे मीन्ने दे, दूजे दिनो दे काम करना शुरू कित्तेया। 3 परमेशरो रा जो मन्दर सुलैमाने बणाया, तेतेरी लम्बाई तो पुराणे नापो रे मुताबिक नब्बे फूट ओर चौड़ाई ती फूट थी। 4 मन्दरो रे सामणे बरांडे री लम्बाई तो मन्दरो री चौड़ाईया रे बराबर तीई फूट थी ओर तेतेरी ऊचाई तीई फूट थी। सुलैमाने से मन्दर पीतरा ते शुद्ध सूईने साथे मढ़वाया। 5 मन्दरो रे बड़े इस्से री छत तिने केली री लकड़िया ते बणवाई ओर से अच्छे सूईने साथे मढ़वाई ओर तेते पाँदे खजूरी री डाल़िया री ओर साँकल़ो री नक्काशी कराई। 6 तेबे सजाणे खे तिने मन्दरो दे मणि जड़वाए। ओर ये सूईना पर्वेम देशो रा था। 7 तिने मन्दरो रे सारे इस्से खे टखणे खे सूईने रा इस्तेमाल कित्तेया, मतलब एतेरे छतो रिया कड़िया, देऊल़ी, कांदा ओर दरवाजे। तिने कांदा दे करूबा रे चित्रा री नक्काशी करवाई।

8 तेबे तिने मन्दरो री परम पवित्र जगा बणाई; तेतेरी लम्बाई मन्दरो री चौड़ाईया रे बराबर तीई फुट थी ओर तेतेरी चौड़ाई तीई फुट थी ओर तिने से लगभग 20 टन शुद्ध सूईने साथे मढ़वाया। 9 सूईने री परेगा रा बजन लगभग 600 ग्राम था। तिने अटारिया खे बी सूईने साथे मढ़वाया। 10 तेबे मन्दरो री परम पवित्र जगा रे तिने नक्काशी करी की दो करूब बणाए ओर सेयो सूईने साथे मढ़वाए। 11 करूबो रे सारे पंख मिलाई की तीई फुट लाम्बे थे, मतलब एकी करूबो रा एक पंख साडे सात फुट था ओर मन्दरो री कांदा तक पऊँची रा था ओर तेतेरा दूजा पंख साडे सात फुट था ओर दूजे करूबो रे पंखो साथे मिलेया रा था। 12 दूजे करूबो रा बी एक पंख साडे सात फुट था ओर मन्दरो री दूजी कांदा तक पऊँचेया रा था ओर दूजा पंख साडे सात फुट था ओर पईले करूबो रे पंखो साथे लगेया रा था। 13 इना करूबा रे पंख तीई फुट फैले दे थे ओर सेयो आपणे-आपणे पैरा रे पारे खड़ी रे थे ओर आपणा-आपणा मूँ पीतरली तरफा खे कित्तेया रा था। 14 तेबे तिने बीचला पर्दा नीले, बैंगणी ओर लाल रंगो रे रेशमो रे टाल्लेया रा बणवाया ओर तिदे करूबा रे चित्र कढ़ाए।

15 मन्दरो रे सामणे तिने बूँजा-बूँजा फुट ऊच्चे दो खम्बे बणवाए ओर जो काँगणी एकी-एकी पाँदे थी से साडे सात फुट थी। 16 तेबे तिने पीतरले कमरे रे साँगल़ा बणवाई की खम्बेया पाँदे लगाईया ओर 100 अनार बी बणवाई की साँगल़ा पाँदे लटकाए। 17 तिने यो खम्बे मन्दरो रे सामणे, एक तो दाँणे कनारे ओर दूजा खूँजे कनारे खड़ा कराया ओर दाँणे तरफा रे खम्बे रा नाओं याकीन ओर खूँजे खम्बे रा नाओं बोअज राखेया।