2 इतिआस 25

यहूदा दे अमस्याह रा राज्य

1 जेबे अमस्याह राज करने लगेया तेबे से पच्चीया साला रा था ओर यरूशलेम शईरो दे ऊणत्तिया साला तक राज करदा रया। ओर तेसरी माया रा नाओं यहोअद्दान था, जो यरूशलेम शईरो री थी। 2 तिने से कित्तेया जो यहोवे री नजरा रे ठीक ए, पर खरे मनो ते नि कित्तेया। 3 जेबे राज्य तेसरे आथो रे आईगा, तेबे तिने आपणे सेयो कर्मचारी काईते, जिने तेसरा बाओ राजा काया था। 4 पर तिने तिना रे बाल़क नि काये, कऊँकि तिने यहोवे री तेसा आज्ञा रे मुताबिक कित्तेया, जो मूसे री बिधानो री कताबा दे लिखी राखेया, "पाऊआ रिया बजा ते माये-बाओ नि काणे ओर ना माया-बाओ रिया बजा ते बच्चे काणे, जिने पाप करी राखेया ओ, सेई तेस पापो रिया बजा ते काणा।"*25:4 बिध. 24:16

एदोमो रे खलाफ अमस्याहो रा युद्ध

5 तेबे अमस्याहे यहूदा प्रदेशो रे सारे लोक कट्ठे कित्ते। तिना रे हर एकी कुलो खे तिने 1,000 मर्दा पाँदे ओर 100 मर्दा पाँदे तिना री अगुआई करने खे अधिकारी राखे। तिने यहूदा रे गोत्रो रे कुला ओर बिन्यामीन गोत्रो रे कुला खे एड़ा कित्तेया। तिने तिना सबी मर्दा री गिणती कित्ती जो बी साल या तेते ते जादा उम्रा रे थे जो बड़छे ओर ढाला लई की लड़ी सको थे। तिना री गिणती 300,000 थी। 6 तेबे तिने 100,000 इस्राएली शूरवीर बी 3,400 किलो चाँदी देई की बुलाए। 7 पर परमेशरो रे एकी पग्ते तेसगे आई की बोलेया, "ओ राजा इस्राएलो री सेना तां साथे जाई नि सकणी, कऊँकि यहोवा इस्राएल, मतलब एप्रैमो री सारी ल्वादा साथे नि रंदा। 8 अगर तूँ जाई की आपू खे तागतबर बणाए ओर युद्ध करने खे ईम्मत दखाए, तेबे बी परमेशरो तूँ दुश्मणा सामणे रूड़ाणा, कऊँकि जीत ओर आर तो परमेशरो रे आथो देई ए।"

9 अमस्याहे परमेशरो रे दासो ते पूछेया, "तेबे जो 34,000 किलो चाँदी आऊँ इस्राएली दलो खे देई चुकेया रा, तेतेरे बारे दे क्या करुँ?" परमेशरो रे दासे बोलेया, "यहोवा ताखे तिजी ते बी जादा देई सकोआ।" 10 तेबे अमस्याहे से दल जो एप्रैमो री तरफा ते तेसगे आया था, लग कित्तेया ताकि सेयो आपणी जगा खे वापस ऊई जाओ। तेबे तिना रा रोष यहूदिया पाँदे बऊत पड़केया ओर सेयो बऊत रोषे ऊई की आपणी जगा खे वापस ऊईगे। 11 पर अमस्याह याओ बानी की आपणे लोका खे लई चलेया ओर लूणो रिया काअटिया गे जाई की, 10,000 सेईरी लोक काईते। 12 यहूदिये 10,000 बन्दी बणाई की चट्टानी री चूँडिया पाँदे लईगे ओर चट्टानी रिया चूँडिया पाँदा ते रूड़ाईते ओर सेयो सारे चूर-चूर ऊईगे। 13 पर तेस दलो रे मर्द जो अमस्याहे वापस करीते थे कि सेओ तेस साथे युद्ध करने खे नि जाओ, सामरिया ते बेथोरोन तक यहूदा रे सारे शईरा दे टूटे ओर तेती 3,000 रणे वाल़े लोक काईते ओर बऊत लूट लई ली। 14 जेबे अमस्याह एदोमिया रा नाश करी की वापस आया, तेबे तिने सेईरिया रे देवतेया खे ल्याई की आपणे देवता करी की खड़ा कित्तेया ओर तिना रे ई सामणे माथा टेकणे ओर तूप बाल़ने लगेया।

15 तेबे यहोवे रा रोष अमस्याह पाँदे पड़केया ओर तिने तेसगे एक नबी पेजेया जिने तेसखे बोलेया, "जो देवता आपणे लोका खे तेरे आथो ते नि बचाई सको, तिना री टोल़ा दे तूँ कऊँ लगी रा?" 16 से तेसखे बोलणे ई लगी रा था कि तिने तेसते पूछेया, "क्या आसे तूँ राजे खे सला देणे वाल़ा बणाई राखेया? चुप रओ! क्या तूँ मरना चाएआ?" तेबे से नबी ये चतौणी देई की चुप ऊईगा, "माखे पता ए कि परमेशरे तेरा नाश करने री ठाणी ली दी ए, कऊँकि तैं एड़ा करी राखेया ओर मेरी सलाह् नि मानी।"

इस्राएलो रे खलाफ अमस्याह रा युद्ध

17 तेबे यहूदा रे राजे अमस्याहे सलाह् लई की, इस्राएलो रे राजा योआशो गे, जो येहूए रा पोता ओर यहोआहाजो रा पाऊ था, ये सन्देसा पेजेया, "आओ आसे एकी दूजे रा सामणा करूँए।" 18 इस्राएलो रे राजा योआशे यहूदा रे राजा अमस्याह गे ये सन्देसा पेजेया, "लबानोनो री एक झड़बेरिये एक देवदारो गे सन्देसा पेजेया, ‘आपणी बेटी मेरे माठे खे ब्यायी दे, तदुओ खे लबानोनो रा एक बणो रा जानवर तिसिये गया ओर से झड़बेरी आपणे पैरे की केसी ती।’ 19 तूँ बोलेया कि मैं एदोमी जीती ले रे, इजी बजा ते तूँ फूलणे लगी रा ओर ओछपण करने लगी रा! आपणे कअरे रयी जा; तूँ आपणे नुकशाण करने खे एती आथ कऊँ पाणे लगी रा, इजी ते तां तो क्या यहूदा खे बी निठा देखणा पड़ना।" 20 पर अमस्याह नि मानेया। ये तो परमेशरो री तरफा ते ऊआ, ताकि से तिना खे तिना रे दुश्मणा रे आथो दे करी देयो, कऊँकि सेयो एदोमो रे देवतेया री टोल़ा रे लगी गे थे। 21 तेबे इस्राएलो रे राजा यहोआशे चढ़ाई कित्ती ओर तिने ओर यहूदा रे राजा अमस्याहे यहूदा प्रदेशो रे बेतशेमेश शईरो दे एकी-दूजे रा सामणा कित्तेया। 22 यहूदा इस्राएलो ते आरी गा ओर हर एक आपणे-आपणे डेरे खे नठी गा। 23 तेबे इस्राएलो रे राजे योआशे यहूदा रे राजे, अमस्याह खे जो यहोआहाजो रा पोता ओर यहोआशो रा पाऊ था, बेतशेमेशो रे पकड़ेया ओर यरूशलेम शईरो खे लईगा ओर यरूशलेम शईरो री दवाला खे एप्रैमी बड़े द्वारो ते कूणे वाल़े बड़े द्वारो तक 600 फुट टाल़ी ती। 24 ओर जितणा सूईना चाँदी ओर जितणे पांडे परमेशरो रे मन्दरो रे ओबेदेदोमो गे मिले ओर राजमईलो रे जितणा खजाना था, तिना सबी खे ओर बन्दी लोका खे बी लई की से सामरिया खे वापस ऊईगा।

अमस्याहो री मौत

25 यहोआहाजो रे पाऊ इस्राएलो रे राजा योआशो रे मरने ते बाद तेसरा पाऊ यहूदा रा राजा अमस्याह पंद्रा साल तक जिऊँदा रया। 26 शुरूओ ते लई की अन्तो तक अमस्याह रे ओर काम, यहूदा ओर इस्राएलो रे राजेया रे इतियासो री कताबा रे लिखी राखे। 27 जेस बखते अमस्याहे परमेशरो पीछे चलणा छाडीता था तेस बखतो ते यरूशलेम शईरो रे तिना रे खलाफ साजिश ऊणे लगी ओर से लाकीश शईरो खे नठी गा। तेबे दूते लाकीशो तक तेसरा पीछा करी की, से तेथी काई ता। 28 सेयो तेसरी लाशा खे कोड़ेया पाँदे राखी की यरूशलेम शईरो खे वापस लई की आए। ओर से तेसरे बुजुर्गा साथे यहूदा रे शईरो दे दबाईता।