1 आऊँ नहूम जो एल्कोशी गाँवो रा रणे वाल़ा ए, ये सन्देस नीनवे शईरो रे बारे दे माखे परमेशरे एक दर्शणो री कताबा रे जरीये दित्तेया।

2 परमेशर जल़न करने वाल़ा ओर बदला लणे वाल़ा ईश्वर ए, परमेशर बदला लणे वाल़ा ओर रोष करने वाल़ा ए, परमेशर आपणे बिरोदिया ते बदला लओआ ओर आपणे दुश्मणा रे पाप नि पूलदा। 3 परमेशर देरिया ते रोष करने वाल़ा ओर बऊत शक्तिशाली ए, तेस दोषी किंयाँ बी निर्दोष नि ठराणे। परमेशर पऊण-चूखाना ओर तूफानो बीचे आपणी तागत बताओआ। बादल़ तेसरे पैरा थालली तूड़ ए। 4 जेबे से समुद्र ओर नदिया खे आज्ञा देयोआ कि सूकी जाओ, तो सेयो सकूँ जाओए। से बाशान जगा रे डोरूआ दे ओर कर्मेल पाह्ड़ो री उतराईया पाँदले काओ खे सुकाई देओआ, ओर लबानोनो रे फुला खे मुरझाई देओआ। 5 तेसरे छूँणे ते पाह्ड़ा खे थूरनी छूटी जाओई ओर पाह्ड़िया गल़ी जाओईया; तेसरे प्रतापो ते तरती, बल्कि सारी दुनिया आपणे सबी रणे वाल़ेया समेत डरो रे मारे काँबी जाओई।

6 तेसरे रोषो रा सामणा कुण करी सकोआ? जेबे तेसखे रोष आओआ, तेबे कुण ठईरी सकोआ? तेसरा रोष आगी जेड़ा पड़की जाओआ ओर पाह्ड़ तेसरे सामणे तूड़ा दे मिली जाओए। 7 परमेशर खरा ए, मुसीबता रे बखते से म्हारी रक्षा करोआ ओर जो तेसरी शरणा दे आओए, तिना रा ख्याल राखोआ। 8 पर तेस उमड़दे ऊई खाड्डा रे पाणिये ते बिरोदिया रा पूरी तरआ ते नाश करी देणा, ओर आपणे दुश्मण न्हेरे दे खदेड़ी देणे। 9 तुसे परमेशरो रे खलाफ क्या योजना करने लगी रे? तेस तुसा रा अन्त करी देणा, मुसीबत दूजी बार नि पड़नी। 10 कऊँकि चाए सेयो कांडेया साथे फसे दे ओ ओर शराबो रे नशे दे बी डूबे दे ओ, तेबे बी सेयो सूके रे डण्डे जेड़े आगी दे फूकी की पस्म ऊई जाणे। 11 नीनवे शईरो ते एक एड़ा आदमी निकल़ी रा जो लोका खे यहोवे रे खलाफ बऊत बुरे काम करने री सला देओआ।

12 परमेशर ईंयाँ बोलोआ, "चाए सेयो गिणतिया दे अणगिणत ओर तागती दे बऊत जादा बलवान कऊँ नि ओ, मां सेयो नाश करी देणे ओर सेयो तरतिया पाँदा ते राची जाणे। ओर मेरे आपणे लोको, मैं तुसे बमारिया ते दु:खी करी राखे, पर एबे मां तुसे दु:खी नि करने। 13 कऊँकि एबे मां तेसरे पारो रा जूँगड़ा तेरी क्याड़िया ते उतारी की तोड़ी देणा, मां सेयो रस्सिया तोड़ी देणियां जो ताखे पकड़ोईया।"

14 नीनवे, परमेशरे तेरे बारे दे एक ये आज्ञा देई राखी ए। तिने बोली राखेया ए, "तुसा रा नाओं आगे बढ़ाणे खे कोई ल्वाद नि ऊणी। मां तुसा रे देवतेया रे मन्दरो री लकड़ी ओर कअड़ी रिया मूर्तिया नाश करी देणियां। मां तुसा खे तुसा री कब्रा त्यार करनिया। कऊँकि तूँ दुष्ट ए।" 15 देखो! एक दूत पाह्ड़ो पाँदा ते खुशखबरी लई की आऊणे लगी रा! से शान्तिया रा सन्देश लई की आऊणे लगी रा। शुभ समाचार खे सुनाणे वाल़ा ओर शान्तिया रा प्रचार करने वाल़ा आऊणे लगी रा! ओ यहूदा रे लोको, आपणे त्योआर मनाओ ओर आपणी सारिया मान्नता पुरिया करो, कऊँकि तुसारे दुष्ट दुश्मणा फेर कदी बी तुसा पाँदे अमला नि करना। सेयो पूरी तरआ ते नाश ऊई जाणे।