नहूम 3

नीनवे रा स्राप

1 ओ नीनवे शईर तां पाँदे लाणत ए, तूँ पक्का ई नाश ऊई जाणा! तांदे लोक अत्या करने वाल़े ओर खून बाह्णे वाल़े बऊत जादा ए। तेरे लोक चूठ बोलणे ओर लूटणे वाल़े ए। तेरे लोक हर बखत दूजेया साथे लड़ाई चगड़ा करदे रओए। 2 कोड़ेया री, रथा, टईरा ओर कोड़ेया रे पैरा री तेज आवाज सुणो। रथ नीनवे रिया तरफा खे बढ़ने लगी रे। 3 कोड़ेया पाँदे सवार लोका रे आथो दे चमकणे वाल़िया तलवारा ओर भाल़े देखे जाई सकोए। सड़का दे लाशा पड़ी रिया ए। हर जगा लाशा रे टेर लगी रे। इतणिया लाशा ए कि लोक तिना पाँदे रुड़ने लगी रे। 4 ये सब कुछ नीनवे रिया बजा ते ऊईरा। नीनवे तेसा सुन्दर वेश्या जवाणसा जेड़ा ए जो कदी बी रजदी नि ए, तेसा खे ओर जादा, ओर जादा चाईयो था। तिने आपणे आपू खे बऊत सारे देशा खे बेचीता दा था, ओर तिने सेयो कुल आपणे दास बनाणे खे तिना पाँदे तंत्र-मंत्र करी राखेया था।

5 सेना रे यहोवे री ये बाणी ए, "आऊँ तेरे खलाफ ए, मां तेरे टाल्ले मुंए तक ऊबे चकणे। तेरा नांगा शरीर मां सारेया देशा खे दखाणा। तिना सबी देशा तेरी बेशर्मी देखणी। 6 मां तां पाँदे घिनौनिया चीजा सेटी देणियां। मां तां साथे कृणा रा बर्ताओ करना। लोका तूँ देखणी ओर तां पाँदे आसणे। 7 जितणेया तूँ देखणी, सबी तांगा गे ते नठी की बोलणा कि नीनवे नाश ऊई गी, तेरिया तँईं केस रोणा? मां केथा ते ताखे ईम्मत देणे वाल़े खे ल्याऊँ?" 8 क्या तूँ तेबेस शईरो ते बढ़ी की ए, जो नील नदिया बीचे बसी री थी ओर तेसा रे चऊँ कनारे पाणी था ओर समुद्र तेसा खे किले रा ओर दवाला रा काम करो था। 9 कूश ओर मिस्री तेसा खे बऊत जादा तागत देयो थे, पूत ओर लूबी तेसा रे मतदगार थे। 10 तेबे बी तेसा खे बन्दी बनाई की गुलामिया दे लईगे, तेसा रे छोटे-छोटे बच्चे सड़का रे कनारे पाँदे टुकड़े-टुकड़े करीते; तेसा रे प्रतिष्ठित लोका खे तिने चिट्ठी पाईया ओर तेसा रे सारे बड़े लोक साँगल़ा दे बानी ते दे ए। 11 तुसे नीनवे रे लोका जेड़े ई मतवाल़े ऊई जाणे, ओर आपणे दुश्मणा ते बचणे रिया तँईं शरण लणे खे जगा टोल़ने लगणे।

12 तुसा री सारिया मजबूत जगा दाऊगल़े रे डाल़ा जेड़िया ए। जेबे दुश्मणा सेयो ईलाणे तो तिना रे पईले फल बड़ी सानिया ते थाले पड़ी जाणे। ओर तुसा रिया किमती चीजा दाऊगल़ेया जेड़िया ऊणिया जो लोका रे मुंए दे पड़ी जाणिया। 13 देख, तेरे शईरो रे पीतरे तेरे सिपाईए लड़ने री तागत खोई ती दी ए। तेरे देशो रे जाणे रिया बाटा तेरे दुश्मणा खे बिल्कुल खुलिया पड़ी रिया, तेरे द्वारा दे लगी रे लकड़िया रे डण्डे आग लगाई की नाश करीते दे ए। 14 तेरे दुश्मणा रे केरने ते पईले ई तूँ आपणे शईरो दे पीतरे पाणी कट्ठा करी लो, ओर आपणे किले जादा मजबूत करी लो। गड्डेया दे जाई की माट्टी केसो ओर तिजी खे सांचेया दे पाओ, दवाला री मरम्मत करने खे ईटा बणाओ। 15 तेती तूँ आगी दे फूकी की पस्म ऊई जाणी ओर तूँ तलवारी साथे नाश ऊई जाणी। तेसा तूँ येलेक नाओं री टिड्डिया जेड़ी निगल़ी लणी, चाए तूँ अर्बे नाओं री टिड्डिया जेड़ी अणगिणत बी ऊई जाए! 16 तेरे बपारी सर्गो रे अणगिणत तारेया ते बी जादा ऊए, सेयो तिना टिड्डिया जेड़े बऊत ऊईगे जो सब कुछ चट करी की उडी जाओईया। 17 तेरे अधिकारी लोक टिड्डिया जेड़े ओर तेरे सेनापति टिड्डिया रे दलो जेड़े ठईरने, जो ठण्डी रे दिना दे दवाला पाँदे बैठी जाओईया, पर जेबे सूरज दिशोआ, तेबे नठी जाओईया ओर कोई नि जाणदा कि सेयो केयी गईया।

18 ओ अश्शूरो रे राजा, तेरे ठराए रे परदान सयी जाओए, तेरे शूरवीर पारी नींजा दे पड़ी गे रे। तेरी प्रजा पाह्ड़ो पाँदे तित्तर-बित्तर ऊई गी री ओर तिना खे फेर कोई कट्ठा नि करदा। 19 तेरे जख़्म नि परी सकदे, तेरी बमारिया रा लाज नि ऊई सकदा। हर कोई जो तेरे नाशो रिया खबरा खे सुणोआ, चाड़िया बजाओआ। सेयो सब खुश ए! कऊँकि तिने सबी तेसा पीड़ा खे सईन करी राखेया ए, जिना खे तूँ सदा तिना खे देया करे था।