नहूम 2

नीनवे रा नाश

1 ओ नीनवे शईर, सेना तां पाँदे अमला करने खे आऊणे लगी रिया ए। आपणे किलेया री रक्षा करो! सड़का रिया तरफा खे नजर राखो! त्यार ऊई जाओ! आपणी पूरी तागत बढ़ाओ। 2 परमेशर याकूबो री बढ़ोतरी इस्राएलो री बढ़ोतरिया जेड़ी जिंयाँ की तिंयाँ करने लगी रा, कऊँकि उजाड़नेवाल़े सेयो उजाड़ी ते रे ओर अंगूरा रिया डाल़िया नाश करी ती रिया। 3 तेसरे शूरवीरा रिया ढाला लाल रंगो साथे रंगी राखिया, ओर तेसरे योद्धा लाल रंगो रे टाल्ले पईने दे ए। त्यारिया रे दिने रथा रे लोए आगी जेड़े चमकोए, ओर सिपाई आपणे भाल़े अवा दे इलाओए। 4 रथ सड़का दे बऊत तेज दौड़ोए ओर चौको दे ओरे-पोरे चलाए जाओए, तिना रे रथ बऊत तेज दौड़ोए, जेड़े सर्गो दे बिजल़ी चमकोई। 5 इजी बीचे, तुसा रे राजे आपणे अधिकारी बुलाणे जो छोड़ आऊणे रिया बजा ते लड़खड़ाई जाणे। तिना आपणे आपू खे बचाणे रिया तँईं आपणियां ढाला खे पकड़ी की शईरो री दवाला रिया तरफा खे नठणे। 6 नदिया रे द्वार खोले जाओए ओर राजे रे मईलो खे तोड़ने लगी रे। 7 नीनवे खे कैद करने री आज्ञा देई राखी ए, ओर सब दासिया तेसरे कब्जे पाँदे शोग करने लगी रिया ए। सेयो कबूतरा जेड़े रोणे लगी रिया ए ओर दु:खो रिया बजा ते आपणी छाती पीटणे लगी रिया ए। 8 नीनवे एड़े तलाबो जेड़ा ऊईगा दा ए जेतेरा पाणी बह्ई की बारे निकल़ने लगी रा ओ। सेयो लोक आका पाई की बोलणे लगी रे, "रूको! रूको! ठईरी जाओ, केथी नठी नि जाणा।" पर कोई ना तो रूको आ ओर ना ई कोई तिना पाँदे त्यान देओआ। 9 ओ सिपाईयो, तुसे जो नीनवे रा नाश करने लगी रे! तुसे चाँदी लई लो ओर ये सूईना बी लई लो! एती लणे खे बऊत सारिया चीजा ए। एती बऊत सारे खजाने बी ए! 10 एबे नीनवे खाली ए, सब कुछ लूटी ला दा ए। शईर बर्बाद ऊईगा दा ए! लोके ईम्मत खोई ती दी ए। सेयो बऊत डरीगे दे ए, जेतेरिया बजा ते तिना रे जानू आपू बीचे टकराणे लगी रे। तिना रा शरीर कांबणे लगी रा, ओर डरो रे मारे मूँ पिऊँल़ा पड़ीगा दा ए। 11 शेरा री से गुफा ओर जवान शेरो रे शिकारो री से जगा केयी रयी, जेती शेर ओर शेरनी आपणे बच्चेया समेत नशंग कूमोए। 12 शेर आपणी तागती साथे बऊत शिकार फाड़ो था ओर आपणी शेरनिया खे शिकारो रा गल़ा कोटी-कोटी की लई जाओ था ओर आपणी गुफा खे शिकारो साथे परी देयो था। 13 सर्वशक्तिमान यहोवा बोलोआ, "आऊँ तुसा रे खलाफ ए। मां तुसा रे रथ फूकी देणे ओर तलवारी की तुसा रे जवान शेर काई देणे। मां सेयो सब जानवर लई जाणे जिना पाँदे तुसे अमला करोए। केसी बी तुसा रे दूता री आवाज नि सुणनी।"