1 हाय मां पाँदे! आऊँ फसला रे बाडणे ते बाद फल तोड़ने वाल़े जेड़ा महसूस करूँआ, जेसखे खाणे खे कुछ नि मिलदा। आपणी पूख मिटाणे खे अंगूरा रा एक गुच्छा या एक बी दाऊगल़ा नि मिलदा। 2 तर्मी लोक सब राची गे रे ए; तरतिया पाँदे एक बी ईमानदार माणूं नि बची रा ए। सेयो सारे अत्यारे ए, जो आपणे ई पाईया खे जाल़ बछाओए। 3 सेयो पूरे दिलो ते दूनी आथे बुराई करोए। परदान रिश्वत माँगोआ ओर न्यायी रिश्वत लणे खे त्यार रओआ ओर अमीर आपणे मनो री बुराई बताओआ, सेयो सारे मिली की न्याय खे बिगाड़ने री कोशिश करेया करोए। 4 एथो तक कि सबी ते खरे लोक बी कांडेवाल़े जाड़ो जेड़े बेकार ए; जिना लोका खे ओर लोक ईमानदार बोलोए, सेयो कांडेवाल़े जाड़ो ते बी बेकार ए। पर यहोवे छोड़ ई तिना रा न्याय करना; एबे से बखत आ जेबे तेस लोका खे सजा देणी, एक एड़ा बखत जेबे सेयो आरने रिया बजा ते बऊत हैरान ऊणे।

5 इजी री खातर दोस्ता पाँदे परोसा नि करो, बऊत प्यारे दोस्तो पाँदे बी परोसा नि राखो, बल्कि आपणी लाड़िया साथे बी सोची समजी की बोलो। 6 कऊँकि माठा बाओ री बेज्जती करोआ ओर बेटी माया रे ओर बऊ सासूआ रे खलाफ उठोई, माणूंआ रे दुश्मण तेसरे कअरो रे लोक ई ओए। 7 पर मां परमेशरो खे मतादा रिया तँईं ताकदे रणा, मां आपणे उद्धार करने वाल़े परमेशरो री बाट न्याल़दे रणा, मेरे परमेशरो मेरी सुणनी। 8 ओ मेरी दुश्मण, मां पाँदे खुशी नि ओ, कऊँकि जिंयाँ ई आऊँ रूड़ना, तिंयाँ ई उठणा ओर जिंयाँ ई आऊँ न्हेरे दे पड़ना, तिंयाँ ई परमेशरो माखे प्रयासे रा काम करना। 9 मैं परमेशरो रे खलाफ पाप करी राखेया, इजी बजा ते मां तेसरा रोष तेस बखतो तक सयींदे रणा, जदुओ तक से मेरा मुकद्दमा लड़ी की मेरा न्याय नि करोगा। तेस बखते तेस आऊँ प्रयासे दे निकयाल़ी की ल्याऊणा ओर मां तेसरी तार्मिकता देखणी। 10 तेबे मेरे दुश्मणा देखणा कि यहोवा मेरिया तरफा खे ए। सेयो बेज्जत ऊणे कऊँकि तिने ये बोली की मेरा मजाक कित्तेया था, "तो तुसा रा परमेशर यहोवा केई ए?" मां आपणी आखी ते तिना रा नाश देखणा; सेयो सड़का दे चीकड़ो जेड़े केसे जाणे।

11 ओ यरूशलेम, तेरी दवाला रे बनाणे रा दिन आऊणा। तेस दिने तेरे बन्ने बड़ी जाणे। 12 तेस बखते अश्शूर ओर मिस्र देशो रे शईरा ते बऊत लोक तुसा गे आऊणे। मिस्र ओर फरात नदिया रे बीचले लोक तुसा गे आऊणे। सेयो सारी तरतिया ते, समुद्रो ते समुद्रो तक ओर पाह्ड़ा ते पाह्ड़ा तक तुसा गे आऊणे। 13 तेबे बी तरती आपणे रणे वाल़ेया रिया बजा ते, तिना रे बुरे कामा रे फला रिया बजा ते ऊजड़ ऊई जाणी। 14 ओ यहोवा, आपणी प्रजा री रक्षा आपणे गवाल़े रे डण्डे की कर; आपणी पेडा-बाकरिया खे जो तेरी आपणी सम्पति ए, लई चल। जेबे कि सेयो करमेल पाह्ड़ो री उचिया जगा दे कांडे वाल़े जाड़ो दे कल्ले रंदे ओ, तेबे बी तिना खे बाशान ओर गिलादो री पजणे वाल़ी काईणी दे चरने दे, जेड़े सेयो बऊत पईले चरो थे। 15 जेबे तूँ आसा खे मिस्र देशो ते बारे निकयाल़ी की ल्याया, तेबे ते नौखे काम दखाए थे। तेड़े ई आसा खे एबे फेर दखाई दे। 16 दुनिया रे सारे देश या जातिया ये देखी की हैरान रई जाणे कि यहोवे तुसा रिया तँईं क्या करना। सेयो आपणी कमजोर तागती पाँदे शर्मिंदा ऊई जाणे। तिना चुपचाप आपणे मूँ टकी लणे, ओर सेयो टऊणे ऊई जाणे। 17 सेयो सापो जेड़े माट्टी चाटणे खे मजबूर ऊई जाणे। सेयो एड़े प्राणिया जेड़े ऊई जाणे जिना खे जमीना पाँदे लूरना पड़ोआ। सेयो डरो रे मारे कांबदे ऊए आपणियां डैणी ते बारे आऊणे। तिना म्हारे परमेशर यहोवे खे आदर दखाणा। तिना तेसरे लोका रा बी आदर करना।

18 ओ यहोवा, तेरे जेड़ा कोई परमेशर नि ए; तूँ तिना लोका रे पापा खे माफ करेया जो बची गे दे ए, मतलब तेरे लोक। तूँ सदा गुस्से दे नि रंदा; तूँ आसा खे ये दखाणे दे बऊत खुश रओआ कि तूँ आसा ते सच्चा प्यार करेया। 19 एक बार फेर तां आसा पाँदे दया दखाणी। तां आसा रे जरीये कित्ते रे बुरे काम पूरी तरआ ते मिटाई देणे। तां आसा रे सारे पाप गईरे समुद्रो दे सेटी देणे। 20 तां याकूबो रे बारे दे से सच्चाई ओर अब्राहमो रे बारे दे से करूणा पूरी करनी, जेतेरी कसम तूँ पुराणे बखतो ते लई की एबुए तक म्हारे पितरा ते खांदा आई रा।