1 अन्तो रे दिना दे, यहोवे रा पाह्ड़ तरतिया पाँदे सबी ते ऊच्चा ओर खास ऊणा। इजी खे ओरी पाह्ड़िया ते ऊच्चा चकेया जाणा, ओर सारी दुनिया ते लोक तेती आराधना करने खे आऊणे। 2 बऊत जातिया रे लोक जाणे ओर तिना आपू बीचे बोलणा, "आओ, आसे यहोवे रे पाह्ड़ो पाँदे चढ़ी की, याकूबो रे परमेशरो रे मन्दरो दे जाऊँए, तेती तेस आसा गे आपणी बाट बताणी, ओर आसा तेसरी बाटा दे चलणा।" कऊँकि यहोवे रा बिधान सिय्योन ते ओर तेसरा वचन यरूशलेमो ते निकल़ना। 3 तेस कईया देशा रे लोका रा न्याय करना। तेस हर जगा तागतबर देशा बीचे समस्या रा समाधान करना। तिना आपणी तलवारी कूटी की अल़ो रे फाल़े बनाणे। तिना आपणे बड़छेया खे तोड़ी की काआ बाडणे खे दाचिया बनाणियां। देशा एकी दूजे रे खलाफ लड़ाई नि लड़नी। लोका आगो खे लड़ाई करने खे शिक्षा नि लणी। 4 सबी गे आपणे-आपणे अंगूरा रे बगीचे ओर दाऊगल़ेया रे डाल़ ऊणे। ओर केसी बी सेयो नि डराणे। ये सेई गल्ल ये जेते रे बारे दे सर्वशक्तिमान यहोवे वादा करी राखेया ए। 5 सबी राज्य रे लोक तो आपणे-आपणे देवतेया रा नाओं लई की हांडोए, पर आसे लोक आपणे परमेशर यहोवे रा नाओं लई की हमेशा तक चलदे रणे।

6 यहोवा ये बोलोआ, "से बखत आऊणे लगी रा, जेबे मां सेयो लोक कट्ठे करने जो सई ए।" मां सेयो लोक कट्ठे करने जिना खे बन्दी बणाई की लईगे थे। मां सेयो लोक कट्ठे करने जिना खे मैं दु:ख दित्तेया था। 7 लंगड़े मां आपणी परोसे वाल़ी प्रजा बनाणे। मां तिना लोका रे जरीये एक तागतबर देश बनाणा जो आपणे कअरो ते काडीते दे ए। मां यहोवे सिय्योनो रे पाह्ड़ो पाँदे तिना पाँदे राज करना। आऊँ तेस बखतो ते लई की सदा तक तिना रा राजा रणा। 8 ओ यरूशलेम, तूँ मेरे लोका खे एक बचाणे वाल़ा खम्बे जेड़ा था। सिय्योन शईर, तूँ मेरे लोका खे एक बचाणे वाल़ी जगा था। से कमण्डो वाल़ा राज्य जो पईले तुसा रा था, से तुसा खे फेर देई देणा। एकी बार फेर एकी राजे तुसा पाँदे राज करना। 9 पर एबे तूँ कऊँ डरी की चींगणे लगी री? क्या तेरा कोई राजा नि ए, जो तेरे आगे चलो? क्या तेरे सारे समजदार लोक मरीगे दे ए? जमणे री जी पीड़े तूँ पकड़ी ली दी ए जेड़े एक जवाणस बच्चा पैदा करने री पीड़ सईन करोई।

10 ओ सिय्योनो रे लोको, पीड़ा ते चींगणे लगो। एकी बच्चे खे जमाणे वाल़ी जवाणसा जेड़े रोओ। छोड़ ई ताखे आपणा शईर छाडणा पड़ना। ताखे खुले मैदानो दे रणा पड़ना। ताखे बेबीलोनो रिया तरतिया दे जाणा पड़ना। पर तेथी यहोवे तुसे तुसा रे दुश्मणा री तागती ते बचाणे। 11 पर एबे बऊत देशा तां पाँदे अमला करने खे कट्ठे ऊई रे। सेयो बोलोए, "यरूशलेमो खे अशुद्ध करी देयो। आसे सिय्योनो खे दु:ख सईंदे देखी की आसणा चाओए!" 12 पर सेयो परमेशरो री योजना नि जाणदे, ना तेसरी योजना समजदे कि तेस सेयो एड़े कट्ठे करी लणे जेड़े खल्याणो दे पूल़े कट्ठे करोए। 13 परमेशर बोलोआ, "ओ सिय्योन, उठ ओर युद्ध कर, मां तेरे सींग लोए रे ओर तेरे खुर पीतल़ी रे बणाई देणे, ताकि तूँ बऊत सारी जातिया खे दबाई सको। तां तिना री चोरी दी तअन-दौल़त यहोवे खे, तिना री तअन-दौल़त सारी तरतिया रे यहोवे खे चढ़ाई सको।"