मीका 1

परमेशरो रा आपणे लोका खे सजा देणा

1 जेबे योताम, आहाज ओर हिजकिय्याह यहूदा प्रदेशो रे राजा थे, तेबे यहोवे मीके खे दर्शणो दे ये सन्देश दित्तेया, जो मोरेशेत शईरो रा रणे वाल़ा था। यहोवे मीके खे सामरिया ओर यरूशलेमो रे बारे दे यो सारिया गल्ला बताईया, 2 ओ जातिया-जातिया रे सब लोको, सुणो! ओर तरती, तूँ तिना सबी समेत जो तांदे ए, तन्यवाद दे! परमेशर यहोवा तुसा रे खलाफ आपणे पवित्र मन्दरो ते तुसा रे खलाफ गवाई देयो।

3 कऊँकि देख, यहोवा आपणी पवित्र जगा ते बारे निकल़ने लगी रा ओर तेस उतरी की तरतिया रिया ऊच्ची जगा पाँदे चलणा। 4 पाह्ड़ तेस निठे गल़ी जाणे ओर तराईया एड़िया फटणियां, जेड़ा मोम आगी ते ओर केसी टल़ान वाल़िया जगा दे पाणी सेटी राखेया ओ। 5 ओर एड़ा कऊँ ऊणे लगी रा? इस्राएलो रे बरोदो रिया बजा ते, आ सारे देशो रे पापो रिया बजा ते। इस्राएलो रे बरोदो रिया तँईं कुण दोषी ए? सामरिया शईर! यहूदा दे मूर्तिपूजा री जगा केई ए? पक्का यरूशलेम शईर, 6 इजी री खातर परमेशर बोलोआ, "मां सामरिया कूड़े रे टेरो दे बदली देणा। ये अंगूरा रे बगीचे लगाणे री जगा बणी जाणा। मां इजी रे पात्थर काअटिया दे सेटी देणे। ओर मां ये निऊँआ ते ई नाश करी देणा। 7 एतेरी सारी कअड़ी रिया मूर्तिया रे टुकड़े-टुकड़े करी देणे, मन्दरो री वेश्या खे देई राखी सबी चीजा आगी दे फूकी देणियां, ओर इजी रिया सारिया मूर्तिया माट्टिया रा टेर बणी जाणिया। सामरिये सेयो वेश्या रे कामो ते कमाई की सेयो कट्ठिया कित्तिया थिया, वेश्या रे कामो री कमाईया जेड़े तिना रा नाश बी ऊणा।"

8 मीका नबीए बोलेया, "मां रोणा ओर विलाप करना कऊँकि सामरिया नाश ऊई जाणा। मां नांगे पैर ओर बिना टाल्ले पईने कूमणा। मां गीदड़ा जेड़ा चींगणा ओर शुतुरमुर्गेया जेड़ा रोणा। 9 कऊँकि सामरिया रा जख़्म ठीक ऊणे वाल़ा नि ए ओर मुसीबत यहूदा पाँदे बी आईगी, बल्कि से मेरे इस्राएली पाईया पाँदे पड़ी की यरूशलेम शईरो रे बड़े द्वारो तक पऊँची गी री।" 10 गत शईरो दे इजी रे बारे दे चर्चा नि करो। तेती रो पनि। पर ओ बेतआप्रा रे लोको, जमीना पाँदे मरेली की दखाओ कि तुसे कितणे दु:खी ए।

11 ओ शापीरो रे लोको, तुसे नांगे ओर बेशर्म ऊई की चली जाओ, जो लोक सानानो री जगा दे रओए, सेयो आपणे शईरो ते बारे आऊणे री ईम्मत नि करदे। जेबे तुसा बेतसेलो रे लोक रोंदे ऊए सुणने, तो तुसा खे पता लगी जाणा कि तेती कोई आसरा नि ए। 12 कऊँकि मारोतो रे लोक पलाईया री बाट देखदे-देखदे तड़फणे लगी रे, कऊँकि यहोवे री तरफा ते यरूशलेम शईरो रे बड़े द्वारो तक मुसीबत आईगी दी ए।

13 ओ लाकीशो रे लोको, आपणे रथा दे तेज चलणे वाल़े कोड़े जोड़ो, तांते ई सिय्योनो री प्रजा रा पाप शुरू ऊआ, कऊँकि इस्राएलो रे पाप तांदे ई मिले। 14 यहूदा रे लोको, तुसे गतो रे नेड़े मोरेशेतो खे अलविदा बोली सकोए। अकजीब शईरो इस्राएलो रे राजेया री कोई मताद नि करनी। 15 ओ मारेशा रे लोको, मां तुसारे खलाफ एक सेना लई की आऊणा, तुसा रे शईरो ते लड़ने खे। ओर से जीती जाणी। ओर इस्राएलो रे इज्जतदार लोका खे अदुल्लाम शईरो दे लूकणा पड़ना। 16 ओ यहूदा रे लोको, दु:खो दे आपणे सिर गँजे करो, कऊँकि जिना बच्चेया ते तुसे प्यार करोए, सेयो छुड़ाई लणे। आपणे आपू खे ईला जेड़े गँजा करी लो, कऊँकि तुसा रे बच्चे दूर देशा दे गुलामिया दे लई जाणे।