1 लाणत ए तुसा पाँदे, तुसे जो राती जागदे रओए, बुरिया योजना बणांदे रओए। तुसे प्यागा तड़के उठोए ओर तिना खे पूरा करने खे छोड़ करोए, सिर्फ इजी री खातर कि तुसा दे एड़ा करने री तागत ए। 2 जेबे तुसे जमीना रा एक इस्सा चाओए, तो तुसे तिजी खे आपणा बनाणे खे कोई ना कोई योजना बणाई लओए। जेबे तुसे केसी रा कअर चाओए, तो तुसे तिजी खे तोखा देई की या चगड़ा करी लई लओए। तुसे केसी माणूंए ते तेसरी जमीन जायदात तोखा देई की लई लओए। 3 पर यहोवा ईंयाँ बोलोआ, "मां तेरे कुलो री बुराईया रा बदला बुराईया ते देणा; तां आपणी क्याड़ी गल़फाओ ते नि छुड़ाई सकणी। तूँ फेर कदी कमण्डो साथे नि कूमणा, कऊँकि से बखत बऊत ई कठण ऊणा।" 4 तेस दिने तुसारे दुश्मणा तुसा रा मजाक उड़ाणा, तुसा रे बारे दे ये गीत गायी की; आसे खत्म ऊईगे, पूरी तरआ ते बर्बाद ऊईगे! परमेशरे आसा री जमीन आपणे कब्जे दे करिती दी ए, ये आसा ते छुड़ाई ली ए। तिने म्हारे डोरू तिना लोका खे देईते दे ए जिने आसा खे तोखा दित्तेया। 5 परमेशरो री मण्डल़िया दे पर्ची पायी की ओर रस्सिये की नापी की जमीन बांडणे वाल़ा कोई नि ऊणा ओर तुसा खे जमीना रा इस्सा पनि मिलणा।
6 लोक मांते बोलोए, "आसा रे खलाफ भविष्यबाणी नि करो! एड़ा नि बोलो कि आसा पाँदे मुसीबत आऊणी। ओर आसा खे बेज्जत नि करने! 7 ओ याकूबो रे कराने रे लोको, क्या कोई ये बोली सकोआ, परमेशर धीरज तरने वाल़ा ए, इजी री खातर तेस एड़ा नि करना?" परमेशर ज्वाब देओआ, "आऊँ जो वादा करूँआ, से तिना लोका खे खरिया चीजा ल्याओआ जो ईमानदारिया रा जीवन जिओ ए। 8 पर तुसे दुश्मणा जेड़े मेरे आपणे लोका रे खलाफ खड़ी रे। जो चगड़े री इच्छा पनि राखदे, जो तुसा पाँदे परोसा करी की बाटा रिये जाओए, तिना शान्त लोका रे टाल्ले तुसे खोली देओए। 9 मेरी प्रजा री जवाणसा खे तुसे तिना रे कअरा ते निकयाल़ी देओए ओर तुसे मेरी महिमा तिना रे छोटे-छोटे बच्चेया ते हमेशा खे छुड़ाई ली री ए। 10 उठो, ओर एथा ते नठो! कऊँकि ये तुसा रे राम करने री जगा नि ए। कऊँकि ये जगा अशुद्ध ए, ये नाश ऊईगी! ये खतरनाक विनाश ए। 11 जे कोई चूठी आत्मा दे चलदा ऊआ चूठी ओर बेकार गल्ला बोलो ओर बोलो कि मां ताखे रोज शराब ओर नशे वाल़ी शराबो रिया तँईं प्रचार सुणांदे रणा, तो सेई तिना लोका रा भविष्यबक्ता ठईरना।"
12 ओ याकूब, मां तुसे सब जरूर कट्ठे करने, मां इस्राएलो रे बचे दे लोक जरूर कट्ठे करने ओर बोस्रा री पेडा-बाकरिया जेड़े कट्ठे राखणे। तेस चूण्डो जेड़े जो अच्छी चराईया दे ओए, तिना जादा माणूं ऊणे रिया बजा ते शोर-शराबा करना। 13 मां तुसारे वापस आऊणे री बाट खोली देणी। मां तुसा ते आगे-आगे चलणा। तुसे शईरो रे बड़े द्वारो खे तोड़ी की आजाद ऊई जाणे। आऊँ तुसा रा राजा ए। मां तुसा ते आगे-आगे बड़े द्वारो ते जाणा। मां, यहोवे, तुसा खे बाट दखाणी।