1 सुलैमाने लगभग तीई फूट लाम्बी, तीई फूट चौड़ी ओर पन्द्रा फूट ऊच्ची पीतल़ी री एक बेदी बणाई। 2 तेबे तिने कअड़ेया रा एक अऊद बणाया; जो एकी कनारे ते दूजे कनारे तक पन्द्रा फुटा तक चौड़ा था, से गोल़ था ओर तेतेरी ऊचाई साडे सात फुट थी ओर तेतेरे चऊँ कनारला केरा पैंताल़ी फुटो रे नापो रा था। 3 तेते निठे, तेतेरे चऊँ कनारे, डेडी-डेडी फुटो रे दस-दस बल़दा री मूर्तिया बणी री थिया, जिने अऊद केरी राखेया था; जेबे से कअड़ेया, तेबे यो बल़द बी दूई पाल़िया दे कअड़े। 4 से बारा बणे रे बल़दा पाँदे राखेया, जिना बीचा ते तीन उत्तर, तीन पच्छमा, तीन दक्खण ओर तीऊँ पूर्वो रिया तरफा खे मूँ करी राखेया था ओर इना पाँदे अऊद राखी राखेया था ओर तिना सबी रे पिछले अंग पीतरले इस्से दे पड़ो थे। 5 अऊद मुट्ठी पर मोटा था ओर तेतेरा कनारा कटोरे रे कनारे जेड़ा था, जिदे सोसणो रे फूलो री नक्काशी करी राखी थी ओर तिदे लगभग 65,000 लीटर पाणी आओ था। 6 तेबे तिने बलिया रिया चीजा तोणे खे दस अऊदिया बणाई की, पाँज दाँणी तरफा खे ओर पाँज खूँजी तरफा खे राखिया। तिना अऊदिया दे होमबलिया री चीजा तोओ थे, पर पुरोईता खे नाह्णे-तोणे खे बड़ा अऊद था।

7 फेर तिने सूईने रे दस दिऊए बिधिया रे मुताबिक बणवाए ओर पाँज दाँणी तरफा खे ओर पाँज खूँजी तरफा खे मन्दरो दे रखवाई ते। 8 तेबे तिने दस मेजा बणवाई की पाँज दाँणी तरफा खे ओर पाँज खूँजी तरफा खे मन्दरो दे रखवाईया। ओर तिने सूईने रे 100 कटोरे बणवाए। 9 फेर तिने इस्राएलो रे पुरोईता रा आँगण ओर बड़ा आँगण बणवाया ओर एते आँगणो दे बड़े द्वार बणवाई की तिना रे दरवाजेया दे पीतल़ मढ़वाया। 10 तिने अऊद मन्दरो रे दाँणे कनारे, मतलब पूर्ब ओर दक्खणो रे कूणे पाँदे रखवाई ता। 11 हूरामे आण्डिया, फरूए ओर कटोरे बणाए। ईंयाँ हूरामे राजा सुलैमानो खे परमेशरो रे मन्दरो दे जो काम करना था से खत्म करी ता, 12 मतलब दो खम्बे ओर गोल़ाईया समेत सेयो काँगणिया जो खम्बेया रे सिरे पाँदे थिया ओर खम्बे रे सिरे पाँदले गोल़ेया खे टखणे खे दो-दो जाल़ीदार लाईनी बणाईया; 13 ओर दुँईं जाल़िया खे 400 अनार ओर जो गोल़े खम्बेया रे सिरे पाँदे थे, तिना खे टखणे वाल़ी एक-एक जाल़िया खे अनारा रिया दो-दो लाईनी बणवाईया। 14 तेबे तिने कुर्सिया ओर कुर्सिया पाँदलिया अऊदिया, 15 ओर तिना निठो खे बारा बल़द बणाए। 16 तेबे हूराम-अबीए आण्डिया, फरूए, कांडे ओर इना रा सारा सामान यहोवे रे मन्दरो खे राजा सुलैमानो री आज्ञा ते चमकाए रे पीतल़ी रे बणाए। 17 राजे सेयो यरदन नदिया री तराईया रे, मतलब सुक्कोत ओर सारतानो बीचे चिकणी माट्टिया री जमीना दे बणवाए। 18 राजा सुलैमाने यो सब पांडे बऊत बणवाए, एथो तक कि पीतल़ी रे तोलो रा साअब नि था। 19 तेबे राजा सुलैमाने परमेशरो रे मन्दरो रे सारे पांडे, सूईने री बेदी ओर सेयो मेज जिना पाँदे पेंटा री रोटी राखो थे, 20 तेबे दिऊए समेत शुद्ध सूईने री दीवटा, जो बिधिया रे मुताबिक पितरली कमरे सामणे बल़ेया करो थिया 21 ओर सूईने, बल्कि शुद्ध सूईने रे फूल, दिऊए ओर चिमटे; 22 ओर शुद्ध सूईने रिया कैंचिया, कटोरे, तूपदान ओर कड़छे बणवाए। तेबे मन्दरो रे द्वार ओर परम पवित्र जगा रे पीतरले दरवाजे ओर मन्दर, मतलब मन्दरो रे दरवाजे सूईने रे बणे।