1 अन्तो दे राजा यहोशापात मरीगा ओर से तेसरे बुजुर्गा साथे दाऊदो रे शईरो दे दबाईता। ओर तेसरा पाऊ यहोराम तेसरी जगा पाँदे यहूदा पाँदे राजा बणीगा। 2 तेसरे पाई जो यहोशापातो रे पाऊ थे, मतलब अजर्याह, यहीएल, जकर्याह, अजर्याऊ, मीकाएल ओर शपत्याह; यो सब इस्राएलो रे राजा यहोशापातो रे पाऊ थे। 3 तिना रे बाओए तिना खे सूईना-चाँदी ओर कीमती चीजा ओर बड़े-बड़े दान ओर यहूदा रे गढ़वाल़े शईर दित्ते थे, पर यहोरामो खे तिने राज्य दित्तेया, कऊँकि से जेठा था।

4 जेबे यहोराम आपणे बाओ रिया जगा पाँदे राज करने लगेया ओर तागतबर बी ऊईगा, तेबे तिने आपणे सारे पाई ओर इस्राएलो रे कुछ हाकिम बी तलवारी साथे काये। 5 जेबे यहोराम राजा बणेया, तेबे से बत्तिया साला रा था ओर से आठ साला तक यरूशलेम शईरो पाँदे राज करदा रया। 6 तिने इस्राएलो रे राजेया जेड़ी चाल‍ चली, जिंयाँ अहाबो रा कराना चलो था, कऊँकि तेसरी लाड़ी अहाबो री बेटी थी। ओर से तेस कामो खे करो था, जो यहोवे री नजरा रे बुरा ए। 7 तेबे बी यहोवा आपणे तेस वादे रिया बजा ते दाऊदो रे कराने खे नाश करना नि चाओ था, कऊँकि तिने दाऊदो साथे वादा कित्तेया था कि तेसरे परिवारो रा कोई ना कोई माणूं सदा राजा बणी की राज करदे रणा।

8 तेसरे दिना दे एदोमे यहूदा री अधीनता छाडी की आपू पाँदे एक राजा बणाईता। 9 तेबे यहोराम आपणे परदानो ओर आपणे सारे रथा खे साथे लई की एदोमो खे गया ओर रथो रे परदान काये। 10 ईंयाँ एदोम यहूदा रे वशो ते छूटीगा ओर आजो तक तेड़ा ईए। तेस ई बखते लिब्ने तेसरे खलाफ ऊई की तेसरी अधीनता छाडी ती, ये इजी बजा ते ऊआ कि तिने आपणे पितरा रा यहोवा परमेशर त्यागी ता था। 11 तिने यहूदा रे पाह्ड़ो पाँदे ऊच्चिया जगा बणाईया ओर यरूशलेम शईरो दे रणे वाल़ेया ते पाप करवाया ओर यहूदा सच्चे परमेशरो ते दूर करिता।

12 एक दिन एलिय्याह नबीए एक चिट्ठी यहोरामो खे लिखी, "तेरे मूलमर्द राजा दाऊदो रा यहोवा परमेशर ईंयाँ बोलोआ कि तूँ जो ना तो आपणे बाओ यहोशापातो री चाला पाँदे चलेया ओर ना यहूदा रे राजा आसा री चाला पाँदे, 13 बल्कि इस्राएलो रे राजेया जेड़ा बुरा काम कित्तेया ओर अहाबो रे कराने जेड़ा यहूदा ओर यरूशलेम शईरो रे रणे वाल़ेया ते यहोवे रे खलाफ पाप करवाया ओर आपणे बाओ रे कराने बीचा ते आपणे पाई, जो तांते अच्छे थे, काई राखे, 14 इजी बजा ते यहोवा तां पाँदे पारी मुसीबत पड़नी, तेरी प्रजा, पाऊ, जवाणसा खे सजा देणी ओर सारी जायदात नाश करी देणी। 15 तूँ आंजा री बमारिया ते बऊत दु:खी ऊणा, एथो तक कि तेसा बमारिया रिया बजा ते तेरिया आंजा हर रोज निकल़दिया रणियां।"

16 यहोवे पलिश्तिया खे ओर कूशी लोका रे नेड़े रणे वाल़े अरबी, यहोरामो रे खलाफ पड़काये। 17 सेयो यहूदा पाँदे अमला करी की तेस पाँदे टूटी गे ओर राजमईलो रे जितणी सम्पत्ति मिली, तिना सबी खे ओर राजे रे पाऊ ओर जवाणसा खे बी लईगे, एथो तक कि तेसरे छोटे पाऊ यहोआहाजो खे छाडी की, तेसगे कोई बी पाऊ नि रया। 18 इना सबी ते बाद यहोवे तेसखे आंजा री बमारी लगाईती। 19 कुछ बखतो ते बाद, मतलब दूजे सालो रे अन्तो दे तेसा बमारिया रिया बजा ते तेसरिया आंजा बारे निकल़ी गिया ओर से बऊत पीड़ा रिया बजा ते मरी गा। ओर तेसरी प्रजे जेड़े खुशबूदार द्रव्य तेसरे बुजुर्गा खे बाल़ेया था, तेड़ा तेसखे कुछ नि बाल़ेया। 20 से जेबे राज करने लगेया, तेबे बत्ती साला रा था ओर यरूशलेम शईरो रे आठ साला तक राज्य करदा रया ओर सबी खे बुरा लगी की मरी गा ओर तेसरे लोके से दाऊदो रे शईरो दे यरूशलेम शईरो दे दबाईता। पर राजेया रे कब्रिस्तानो दे नि दबाया।