1 ईंयाँ सुलैमाने यहोवे रे मन्दरो खे जो-जो समान बणवाया से सारा पूरा ऊईगा। तेबे सुलैमाने आपणे बाओ दाऊदो रे पवित्र कित्ते रे सूईने, चाँदी ओर सब पांडे पीतरे पऊँचाई की परमेशरो रे पण्डारो दे रखवाई ते। 2 तेबे सुलैमाने इस्राएलो रे बुजुर्गा खे ओर गोत्रो रे सारे खास मर्द, जो इस्राएली लोका रे पितरा रे करानेया रे परदान थे, सेयो बी यरूशलेम शईरो दे इजी बजा ते कट्ठे कित्ते, ताकि सेयो यहोवे री वाचा रा सन्दूक दाऊदो रे शईरो ते, मतलब सिय्योनो ते ऊबे ल्याओ। 3 सारे इस्राएली मर्द सातुए मीन्ने दे त्योआरो रे बखते राजे गे कट्ठे ऊए। 4 जेबे इस्राएलो रे सारे बुजुर्ग यरूशलेम शईरो दे आए, तेबे लेविये सन्दूक चकी ला। 5 ओर लेवी पुरोईत सन्दूक ओर मिलणे वाल़े तम्बू ओर जितणिया पवित्र चीजा तेस तम्बूए रे थिया तिना सबी खे ऊबे लईगे। 6 राजा सुलैमान ओर सारे इस्राएली मण्डल़िया रे लोक जो तेसगे कट्ठे ऊए थे, तिने सन्दूको सामणे इतणी पेडा ओर बल़द बलि कित्ते कि जिना री गिणती ओर साअब बऊत जादा ऊणे रिया बजा ते नि ऊई सकेया था। 7 तेबे पुरोईते यहोवे री वाचा रा सन्दूक तेसरी जगा दे, मतलब मन्दरो दे पीतरले कमरे दे जो परम पवित्र जगा थी, पऊँचाई की करूबा रे पंखा निठे राखी ता। 8 सन्दूको री जगा पाँदे करूबे पंख फैलाई राखे थे, जेते साथे तिने पाँदा ते सन्दूक ओर तिजी रे डण्डे टखी राखे थे। 9 डण्डे तो इतणे लाम्बे थे कि तिना रे सिरे सन्दूको ते निकल़े रे पीतरले कमरे दे सामणे दिखो थे, पर सेयो बारा ते नि दिखो थे। सेयो आजके दिनो तक तेथी ए। 10 सन्दूको रे तिना दूई तख़्तिया खे छाडी की ओर कुछ नि था, जो मूसे होरेबो दे तेते दे पीतरे तेस बखते राखिया थिया, जेबे यहोवे इस्राएली लोका रे मिस्रो ते निकल़ने ते बाद तिना साथे वाचा बानी थी।

11 जेबे पुरोईत पवित्र जगा ते निकल़े, जितणे पुरोईत आजीर थे, तिने सबी तो आपू-आपू खे पवित्र करी राखेया था ओर लग-लग दलो रे ऊई की सेवा नि करो थे; 12 ओर जितणे लेवी गाणे वाल़े थे, सेयो सारे के सारे मतलब पाऊ ओर पाई-बन्दुआ समेत आसाप, हेमान ओर यदूतून रेशमो रे टाल्ले पईनी की छाज, सारंगिया ओर बीणा लई की बेदिया रे पूर्वो रिया तरफा खे खड़ी रे थे ओर तिना साथे 120 पुरोईत तुरहिया बजाणे लगी रे थे। 13 ओर जेबे तुरहिया बजाणे वाल़े ओर गाणे वाल़े कट्ठे ऊई की यहोवे री स्तुति ओर तन्यवाद करने लगे ओर तुरहिया छाज बगैरा बाजे बजांदे ऊए यहोवे री ये स्तुति ऊच्ची आवाजा दे करने लगे, "यहोवा पला ए ओर तेसरी करूणा सदा री ए" तेबे यहोवे रा मन्दर तेसरी महिमा रे तेजो ते परीगा, 14 ओर तेजो रिया बजा ते पुरोईत लोक सेवा-टईल करने खे खड़े नि रई सके, कऊँकि यहोवे रा तेज मन्दरो दे परी गा दा था।