Motivação

13 ज़ै मीं ताकत देते तैस मां अवं सब किछ केरि बटताईं।

29 तै थकोरे ताकत देते ते कमज़ोरे शक्ति देते। 30 नौजुवान भी थेकी गातन ते रेई गातन ते जुवान ठोकर खेइतां बिछ़ड़ी गातन; 31 पन ज़ैना यहोवा बलगतन; तैना नंव्वी ताकत हासिल केरते गाते, तैना उकाबा केरे ज़ेरे उडरेले, तैना दौड़ेले ते थकेले न, च़लेले ते थकावट मैसूस न केरेले।

10 अवं यहोवारे वजाई सेइं बड़ो खुशी रालो मेरे प्राण तैसेरे वजाई सेइं मघन रालो; किजोकि तैनी मीं छुटकारेरां लिगड़ां लुवेवरन, ते धार्मिकतारी च़ादर एन्च़रे लुवेवरीए ज़ेन्च़रे महराव फूड़ू केरि मालाई सेइं अपनो आप सज़ाते ते महारनी अपने गेहने सेइं शिंगार केरतीए।✝

13 किजोकि परमेशर ज़ै तुसन मां कम केरते, ते तुसन इच्छा ते शक्ति तैन केरनेरे लेई देते, ज़ैस सेइं तै खुशी भोते।

13 हे ढ्लाव ते बेइनव, मेरू इन गुमान नईं कि मीं ट्लाव, पन सिर्फ अक कम केरताईं, कि ज़ैना गल्‍लां पत्रोवं रेइ तैन बिसरतां, अग्री गल्‍लां केरे पासे गाताईं। 14 निशानेरे पासे दौड़तो च़लताईं, ताके मीं तैन इनाम मैल्हे, ज़ेसेरे लेई परमेशरे अवं मसीह यीशु मां बा कुजेवरोईं।

मसीही दौड़

24 कुन तुस न ज़ानथ, कि दौड़ी मां त सब दौड़तन, पन इनाम अक्‍के नेते, तुस तेरहु दौड़ा, कि ज़ींतथ। 25 ते हर अक पलवान हर किसमेरो परेज़ रखते, तै त अक शुकने बाले ताजेरे लेई इन सब किछ केरते, पन अस त तैस ताजेरे लेई केरतम ज़ैन कधी नईं शुकनू। 26 एल्हेरेलेइ अवं एन्च़रे दौड़ताईं, पन बगैर मकसदे नईं, अवं भी एन्च़रे मुकन सेइं लड़ताई, पन तैसेरो ज़ेरो नईं ज़ै हवाई मां लड़ते। 27 पन अवं अपने जानरी खुवैइशन मारताईं, ते कैबू मां केरताईं; एरू न भोए कि होरन प्रचार केरि, ते मीं इनाम न मैल्हेले।

बाजी परमेशरेरे ज़िरिये हदैइत

1 एल्हेरेलेइ ज़ैखन गवाहां केरे एत्रो बड्डो घाने असां घेरोरेम, त अस भी सैरी रुकावटां ते तैस पापे दूर केरम ज़ै असन उलझाते, ते तैस दौड़ी ज़ै असेईं दौड़नीए बल्हे सेइं दौड़म। 2 एज्जा अस विश्वासे मां पवित्र केरनेबाले यीशु पुड़ नज़र रखम, ज़ैनी तैस आनन्देरे लेई ज़ै तैसेरे सामने थियो, बेइज़्ज़तरी परवाह न की, बल्के क्रूसेरो दुख झ़ैल्‍लो ते परमेशरेरे तखतेरे देइने पासे गेइतां बिश्शो।

3 तुस एस गल्‍ली पुड़ खियाल केरा, कि अपने खलाफत केरनेबाले ज़ैनी पैपी केरि तरफां केत्रो दुख झ़ैल्‍लो, ताके तुस बेदिल भोइतां हिम्मत न हारथ।

23 ते ज़ैन किछ तुस केरतथ, तैन मने सेइं केरा, इन समझ़तां कि मैन्हु केरे लेई नईं पन प्रभुएरे लेई केरतथ।

11 किजोकि यहोवा एन ज़ोते, कि ज़ैन-ज़ैन अवं तुश्शे लेई सोचताईं तैन अवं ज़ानताईं, तैन नुक्सानेरे लेई नईं, बल्के सुखेरू आहे ते आखरी मां तुश्शी उमीद पूरी केरेलो।

13 ज़ैन किछ तुस मेरे नंव्वे सेइं मगेले अवं तुसन देलो कि बाजी केरि महिमा मट्ठेरे वजाई सेइं बांदी भोए। 14 अगर तुस मेरे नंव्वे सेइं किछ भी मग्गेले त अवं तैन केरेलो।"

19 एल्हेरेलेइ तुस गाथ ते सैरी कौमां केरे लोकन चेले बनाथ, ते तैन बाजी, ते मट्ठेरे, ते पवित्र आत्मारे नंव्वे सेइं बपतिस्मो देथ। 20 ते तैन तैना सब हुक्म मन्ने शिखाला ज़ैना मीं तुसन दित्तोरेन, ते हेरा, अवं दुनियारे आखरी तगर हमेशा तुसन सेइं साथी आईं।"

6 तू हिम्मत केर ते मज़बूत भो, तैन करां न डर ते न घबरा; किजोकि तीं साथी च़लनेबालो तेरो परमेशर यहोवा आहे; तै तीं धोखो न देलो ते न शारेलो।"

10 ज़ैन कम तीं मैल्हे, तैन एपनी शेक्ति सेइं केरां, किजोकि अधलोके मां ज़ैड़ी तू गाने बालोस, तैड़ी न कम्मे, न कोई योजना, ते न तैड़ी ज्ञान ते न अक्ले।

7 तेरे नेड़े हज़ार,

ते तेरे देइने पासे दश हज़ार बिछ़ड़तां मेरि गाले;

पन तै तीं कां न एज्जेलो।

29 ते एस फिक्रे मां न रेइयथ, कुन खामेले, या कुन पीमेले, या कुन लामेले, ते न शक केरथ। 30 किजोकि दुनियारी सैरी कौमां एस्से फिक्रे मां लेगोरी रेइचन, पन तुश्शो बाजी ज़ानते, कि तुसन कोनां-कोनां चीज़ां केरि ज़रूरते।

10 ज़ैखन अस तुसन सेइं साथी थिये तैखन असेईं तुसन हुक्म दित्तोरो थियो, कि अगर कोई कम केरने करां इन्कार केरे त तैस रोट्टी भी न देथ। 11 इश्शे शुन्ने मां एवरू आहे कि तुसन मां बड़े लोक एरे आन ज़ैना आलसी ज़िन्दगी ज़ीतन। तैना एप्पू कम न केरन, पन होरि केरे कम्मन मां दखल देतन। 12 एरे लोकन अस प्रभु यीशु मसीहेरे दित्तोरे अधिकारे सेइं हुक्म देतम ते समझ़ातम, कि च़ुपच़ाप कम केरतां अपनि ज़िन्दगी ज़ींनेरे लेई कमाई केरन। 13 ते तुस, ढ्लाव ते बेइनव, भलियाई केरने मां हिम्मत न हारा।