18 Ini ya nya-imoꞌ dun ni pagka͡utaw ni Jisu-Kristu: Ya ina nan si Maria na tawas ni José. Manang sa walaꞌ pa silan pag-ipid, kya-ede-an da ni Maria na nyabdes sakanan magi sa Ispiritu Santo. 19 Na, si José gayed sakanan dyumalug sa Uldin na manga Judiyu.* Aw diliꞌ sakanan malim na mulamula͡en ya tawas nan adti asdangan na manga utaw. Yanagaw migpalpa sakanan na atagan nan na papilis sa pag-ayaw na walaꞌ ya utaw na maka-edeꞌ. 20 Manang sa gayed pa nan yeiy pig-anenganeng, awun anghil na Tyumanem na migpakitaꞌ kanan magi sa tagaynep aw law nan, "We… José na buwadbuwad ni Dabid. Diliꞌ kaw magduwaduwa magpanga͡ubayan kan Maria. Kay ya pagkabdes nan, magi saba sa Ispiritu Santo. 21 Aw ka͡utawan sakanan sa iseꞌ na eseg. Aw ngalanan mu ya iseꞌ na ‘Jisus’ kay un nan paluwa-en ya kanan manga utaw lekat adti manga salaꞌ nilan."

22 Na, dun ni kadég yeiy na nya-imoꞌ, nyatuman da ya pigpasulat na Tyumanem magi sa propita nan asini muna: 23 "Pakanyegi! Awun sambuk na dalaga na mabdes pangkay walaꞌ pa ka-ilabeti, aw mag-iseꞌ sakanan sa iseꞌ na eseg aw pagtawagen nilan sakanan na Imanwél na ya kakawasan: Ya Tyumanem asini sayid tadun."*

24 Sa pagmata ni José, pigtuman nan ya piglong kanan na anghil, aw pigpanga͡ubayan nan si Maria. 25 Manang walaꞌ pa nan ipidi mendaꞌ na kya͡utawan da si Maria sa iseꞌ nan na eseg. Aw pigngalanan ni José ya iseꞌ yeiy na "Jisus."

26 Na, sa enemembulan da na pagkabdes ni Élisabét, pigsuguꞌ na Tyumanem ya anghil na si Gabriyél adti lunsud na Nazarit, sakup na Galiliya, 27 na madtu ni sambuk na ka͡ubayan na walaꞌ pa ka-ilabeti na eseg. Ya ngalan nan si Maria. Ya tawas nan si José na buwadbuwad ni Dabid na hariꞌ asini muna.

30 Aw miglong ya anghil kanan, "Diliꞌ kaw magkallek, kay Maria, kay kyatutukan ya Tyumanem kanmu. 31 Pakanyegi ya un ku paglongun kanmu: Diliꞌ madugay, mabdes kaw aw mag-iseꞌ sa eseg, aw ngalanan mu sakanan na Jisus. 32 To-o sakanan dengganen, aw pagtawagen sakanan na Iseꞌ na Tyumanem na To-o Matas, aw imo-un sakanan na Tyumanem hariꞌ kasiling na tyugbulan nan na si Dabid. 33 Aw maghariꞌ sakanan sa manga buwadbuwad ni Jakub* na walaꞌ ya tyamanan. Aw ya Kasakupan na un nan hari-an, walaꞌ ya katigkasan."

34 Aw nyusip si Maria sa anghil, "Unun ya pagka-imoꞌ na kadég yeiy na walaꞌ pa ya eseg ku?" 35 Aw tyumubag ya anghil, "Ya Ispiritu Santo un lumugsad dun ni kanmu aw kalandungan kaw na katulus na Tyumanem na To-o Matas. Yanagaw ya iseꞌ na un ma͡utaw dun ni kanmu, walaꞌ ya salaꞌ dun ni kanan, aw pagtawagen sakanan na Iseꞌ na Tyumanem.

14 Yanagaw miglong si Jisus, "Pakadiya kanak ya manga mangayseꞌ aw ya-i mayu silan pagtageni! Kay ya manga utaw na dyumawat kanak kasiling na manga mangayseꞌ ini, silan saba ya maka-akup adti Kasakupan na Pighari-an na Tyumanem."

4 Manang pangkay singalan ya magpadalem kasiling na iseꞌ ini, yan ya utaw na to-o matas dun ni Kasakupan na Pighari-an na Tyumanem. 5 Aw pangkay singalan kamayu ya dumawat sa utaw na madalem kasiling na iseꞌ ini asuntu sa pagdalug mayu kanak, dun da aku nan uman dawata.

16 Pagkatigkas yan, pigsipit nan ya manga mangayseꞌ aw pandungi nan na kanan palad aw pig-atagan nan silan na manga kadyawan magi dun ni kanan pagpanawagtawag.

3 Tyumubag si Jisus kanan, "Matinaw ya un ku paglongun kanmu: Diliꞌ mabatug na utaw kita-en ya Kasakupan na Pighari-an na Tyumanem kun diliꞌ sakanan ma͡utaw salut."

21 Kasiling na ka͡ubayan na migti-is pyetesan. Manang sa pagka͡utaw da na iseꞌ nan, kalingawan da nan ya pagti-is asuntu na magleya sakanan kay nya͡utaw da ya kanan iseꞌ.

9 Ya kadég tadun na nya-imoꞌ da iseꞌ na Tyumanem, diliꞌ da magpadeleg sa pag-imoꞌ sa salaꞌ. Kay ya bet na Tyumanem awun da ni kanaten. Aw asuntu na pigbagu la kitadun na Tyumanem, yanagaw diliꞌ da mabatug na magpadeleg kitadun mag-imoꞌ sa salaꞌ.