1 Aw lyumikuꞌ si Jisus adti Buntud na Manga Olibo. 2 Manang sa pagkamaselem da, lyumikuꞌ uman sakanan adti pamanag na Témplo. Madég to-o ya manga utaw na migpalapit kanan, yanagaw nyingkud sakanan aw pigpalna-uwan nan silan. 3 Talana nan migpalna-u, dyumulud kanan ya manga magpalna-uway sa Uldin aw manga Parisiyo na migpa-agad sa sambuk na ka͡ubayan na kyadula͡an na miglakadenen. Aw pigpa-indeg nilan adti tenga-tengaꞌ na kadég na manga utaw. 4 Aw miglong silan kan Jisus, "Kay Magpalna-uway, ya ka͡ubayan ini kyadula͡an na miglakadenen. 5 Adti Uldin na pig-atag na Tyumanem kan Moysis, kun awun ka͡ubayan na kyadula͡an miglakadenen, umbaꞌ sakanan pamintuwun na batu mendaꞌ na matay. Na, unu ya kanmu mapaglong sa ka͡ubayan yeiy?" 6 Maynan ya usip nilan kay kaliman nilan tanda-en si Jisus pada kalitagan dun ni tubag nan aw awun kalimanda nilan kanan. Manang ya pig-imoꞌ ni Jisus, pigtuklungan nan baling ya lupaꞌ aw migsulatsulat sa tulluꞌ nan dun ni lupaꞌ. 7 Manang asuntu na gayed silan gyumelgel nyusip kanan, nyindeg si Jisus aw miglong adti kanilan, "Kun singalan kamayu ya walaꞌ ya salaꞌ, yan ya muna mintu kanan sa batu." 8 Aw pigtuklungan da nan uman ya lupaꞌ aw migsulatsulat pa sa tulluꞌ nan dun.

9 Aw sa pagdengeg nilan sa piglong nan, migbeklag ya tagsambuksambuk kanilan. Nyuna nyanaw ya manga bakleg mendaꞌ na nyabus silan nyanaw. Yan oloꞌ ya nyasamaꞌ si Jisus aw ya ka͡ubayan na kenneꞌ pa nan nyindeg dun. 10 Aw nyindeg si Jisus aw piglongan nan ya ka͡ubayan, "Kay Déꞌ, ayin da silan? Unu, walaꞌ da ya nyasamaꞌ na un mag-ukum kanmu?" 11 Tyumubag ya ka͡ubayan, "Walaꞌ kay Sir." Aw miglong si Jisus kanan, "Aku uman diliꞌ maka-ukum kanmu. Uliꞌ da kaw aw diliꞌ da kaw salut mag-imoꞌ sa salaꞌ."

12 Pagkatigkas yan, miglong pa si Jisus adti manga utaw, "Aku ya kalalamdag na maka-ilaw sa anenganeng na manga utaw. Pangkay singalan ya dumalug kanak, walaꞌ da sakanan dun ni kangitngitan kay awun da ni kanan ya kalalamdag na maka-atag sa tengteng ginawa." 13 Sa pagdengeg na manga Parisiyo sa piglong ni Jisus, miglong silan, "Ikaw oloꞌ ya migmatinaw sa kanmu pagka-utawun, yanagaw bekeꞌ na matinaw ya piglong mu!" 14 Aw law ni Jisus kanilan, "Pangkay kun yan ya piglong ku ya kanak pagka-utawun, alag saba matinaw ya kanak piglong. Kay kya-ede-an ku kun ayin aku lekat aw ayin aku pasinan. Manang kamu, walaꞌ kamu paka-edeꞌ kun ayin aku lekat aw ayin aku pasinan. 15 Ya indeganan na pag-ukum mayu sa utaw lekat oloꞌ adti pigkitaꞌ mayu. Manang bekeꞌ na maynan ya kanak pag-ukum adti pangkay singalan. 16 Kun mag-ukum aku, alag saba matinaw ya pagbayaꞌ ku. Kay bekeꞌ ku oloꞌ ya mag-ukum manang ya eped ku ya Ama na migpadala kanak. 17 Endaꞌ, nyakasulat dun ni Uldin mayu na ‘kun mig-unawa ya piglong na duwa ya utaw dun ni asdangan na mag-usayay, ya piglong nilan alag saba matinaw.’* 18 Yanagaw pigmatinaw ku ya kanak pagka-utawun. Aw ya sambuk uman na migmatinaw kanak, yan ya Ama ku na migpadala kanak." 19 Aw nyusip ya manga Parisiyo kanan, "Ayin kaꞌ ya Ama mu?" Aw tyumubag si Jisus kanilan, "Yeiy ya tengteng matinaw: Walaꞌ kamu paka-edeꞌ kanak aw walaꞌ mayu uman ka-ede-i ya Ama ku. Kun kya-ede-an pa aku mayu, ka-ede-an mayu uman ya kanak Ama."

20 Ya kadég yeiy, piglong ni Jisus dun ni pagpalna-u nan adti pamanag na Témplo malapit adti manga uluganan sa kuwalta. Manang walaꞌ ya migdakep kanan kay walaꞌ pa dateng ya allaw na dakepen sakanan.

21 Aw miglong pa si Jisus kanilan, "Manaw aku, aw diliꞌ da aku asini sayid mayu. Paninawun aku mayu, aw kamatayan pa mayu ya pagpadeleg mag-imoꞌ sa salaꞌ na diliꞌ lanasen na Tyumanem ya manga salaꞌ mayu. Diliꞌ kamu makakadtu adti kanaken kadtuwan." 22 Yanagaw mig-usip-usipay ya manga magdadumala͡ay sa manga Judiyu, law nilan, "Unu ya kakawasan na piglong nan na diliꞌ kunu kitadun makakadtu adti kanan kadtuwan? Unu, tumuyuꞌ sakanan?" 23 Aw miglong si Jisus kanilan, "Asini tas na lupaꞌ ya kamayu pig-eya-an, manang aku lyumekat adti tas na langit. Aw ya anenganeng mayu asini oloꞌ ni tas na lupaꞌ. Manang aku diliꞌ taga asini. 24 Yeiy ya du-an na piglong ku na kamatayan mayu ya pagpadeleg mag-imoꞌ sa salaꞌ na diliꞌ lanasen na Tyumanem ya manga salaꞌ mayu. Kay kun diliꞌ kamu mangintu-u na matinaw ya piglong ku na aku ya pigpadala na Tyumanem, kamatayan mayu saba ya pagpadeleg mag-imoꞌ sa salaꞌ." 25 Miglong silan, "Singalan kaw kaꞌ?" Aw tyumubag si Jisus, "Piglongan da ta kamu saba lekat pa asini muna kun singalan aku. 26 Madég pa galu ya un ku diklamu kamayu. Manang yan oloꞌ ya pigpa-edeꞌ ku adti manga utaw ya dyengeg ku adti migpadala kanak. Aw alag matinaw ya piglong nan."

27 Manang walaꞌ nilan kalabeti na yan ya pigpalabet nan ya kanan Ama. 28 Yanagaw miglong pa uman si Jisus kanilan, "Pagdateng na allaw na patasen aku mayu na Iseꞌ na Utaw adti krus, dun da mayu ka-ede-i kun singalan aku. Aw ka-ede-an da mayu na walaꞌ ya pig-imoꞌ ku na walaꞌ lekat adti Ama, manang yan oloꞌ ya piglong ku ya pigpalna-u nan kanak. 29 Aw ya migpadala kanak, gayed sakanan nyagad kanaken. Walaꞌ aku nan pabaya-i. Kay kun unu ya makatutuk kanan, yan ya gayed ku pig-imoꞌ." 30 Aw sa pagpakadengeg na manga utaw sa piglong ni Jisus, madég kanilan ya nyangintu-u kanan.

31 Yanagaw piglongan ni Jisus ya manga Judiyu na nyangintu-u la kunu kanan, "Kun padelegen mayu ya pagdalug sa palna-u ku, kamu saba ya tengteng na umagakan ku, 32 aw ka-ede-an mayu ya tengteng matinaw, aw magi sa pagka-edeꞌ mayu sa katinawan, paluwa-en kamu lekat adti pagka-allang mayu." 33 Aw law nilan, "Buwadbuwad kami ni Abraham! Walaꞌ kami allanga na pangkay singalan. Anangaꞌ kaw maglong na paluwa-en kami?" 34 Aw tyumubag si Jisus kanilan, "Matinaw ya un ku paglongun kamayu: Pangkay singalan ya migpakasalaꞌ, allang saba na salaꞌ. 35 Ya utaw na allang diliꞌ sakanan maka-akup gayed dun ni ka-epedanan dun ni balay na tagtun kanan na walaꞌ ya tyamanan, manang ya iseꞌ na tagtun sa balay maka-akup sakanan na walaꞌ ya tyamanan. 36 Yanagaw, kun ya Iseꞌ na Tyumanem ya magpaluwaꞌ kamayu dun ni pagka-allang mayu, makaluwaꞌ kamu saba. 37 Kya-ede-an da ku na manga buwadbuwad kamu ni Abraham. Manang ya eped kamayu gayed migpalpa na patayen aku. Kay kyele͡an mayu ya kanak palna-u. 38 Yan ya kanak pigpalna-u adti kamayu, ya pigkitaꞌ ku adti tampid na Ama ku. Aw ya kamayu pig-imoꞌ, yan ya pigdengeg mayu lekat adti kamayu ama."

39 Manang miglong silan, "Si Abraham ya kanami ama!" Aw tyumubag si Jisus kanilan, "Kun matinaw na manga buwadbuwad kamu ni Abraham, imo-un mayu galu ya manga pigpan-imoꞌ nan. 40 Manang adun, pigbetang da mayu adti kamayu ginawa ya pagpatay kanak asuntu na pig-ubat-ubat ku ya matinaw. Bekeꞌ na maynan ya bet ni Abraham! Ya pig-ubat-ubat ku, alag lyumekat adti Tyumanem. 41 Manang ya kamayu pig-imoꞌ kasiling uman na pig-imoꞌ na kamayu ama." Aw law nilan, "Bekeꞌ kami na kasiling na manga iseꞌ adti luwaꞌ! Sambuk da ya Ama nami, aw yan ya Tyumanem!" 42 Aw miglong si Jisus kanilan, "Kun matinaw pa na tengteng Ama mayu ya Tyumanem, ginawa͡an aku mayu galu kay lekat aku adti sayid nan. Walaꞌ aku kadi asuntu sa kanak pagbayaꞌ, manang kanan pagbayaꞌ. 43 Anangaꞌ diliꞌ mayu pagkalabetan ya kakawasan na piglong ku? Ya tengteng matinaw, diliꞌ mayu mati-is ya pagpakanyeg sa palna-u ku. 44 Si Satanas ya kamayu ama, aw pangkay unu ya kanan pagkaliman, yan uman ya kaliman mayu imo-un. Migpatay sakanan lekat pa asini muna. Pagkele͡an nan ya matinaw kay walaꞌ dun ni kanan ya katinawan. Galu-un sakanan asuntu na yan ya kanan bet aw yan ya lyekatan sa kadég na galuꞌ. 45 Manang asuntu na alag matinaw ya piglong ku, yan baling ya du-an na walaꞌ kamu pangintu-u kanak. 46 Na, singalan kaꞌ kamayu ya makamatinaw na nyakasalaꞌ aku? Walaꞌ saba! Pig-ubat ku kamayu ya matinaw, yanagaw anangaꞌ diliꞌ kamu mangintu-u kanak? 47 Pangkay singalan ya kana Tyumanem utaw, magpakanyeg aw mangintu-u sa ubat-ubat na lekat adti kanan. Manang kamu, walaꞌ mayu kalabeti asuntu na bekeꞌ kamu na utaw na Tyumanem."

48 Tyumubag ya manga eped na Judiyu kan Jisus, "Matinaw saba ya piglong nami na utaw kaw na Samariyanen aw syeledan kaw na busaw!" 49 Aw piglongan silan ni Jisus, "Walaꞌ aku seledi na busaw. Pigbasa͡an ku ya kanak Ama manang pigmulamula aku mayu baling. 50 Bekeꞌ na tud ku ya pagpakadengeg sa kanak pagka-utawun. Manang ya Ama ku, yan ya magpatas kanak, aw yan ya mag-ukumay. 51 Matinaw ya un ku paglongun kamayu: Ya utaw na dyumalug sa palna-u ku, diliꞌ da saba matay." 52 Pagkatigkas yan, miglong kanan ya manga Judiyu, "Adun tengteng na kya-ede-an da nami na syeledan kaw na busaw! Pangkay si Abraham nyatay da, aw maynan uman ya manga propita, manang miglong kaw baling na kun singalan ya gayed dyumalug sa palna-u mu diliꞌ da matay. 53 Unu kaꞌ, mig-anenganeng kaw na matas pa kaw kay sa tyugbulan tadun na si Abraham na nyatay da aw sa manga propita na nyangkamatay da uman? Singalan kaw kaꞌ?" 54 Aw tyumubag si Jisus kanilan, "Kun aku oloꞌ ya migpakadengeg sa kanaken pagka-utawun, walaꞌ ya guna na dengeg ku. Manang ya kanak Ama, yan ya migpatas kanak. Aw piglong mayu na yan ya Tyumanem na kamayu pigpangintu-uwan. 55 Walaꞌ mayu ka-ede-i kun singalan sakanan. Manang aku, kya-ede-an ku sakanan. Kun maglong aku na walaꞌ ku ka-ede-i kun singalan sakanan, na, ma-imoꞌ aku baling galu-un kasiling mayu. Manang kya-ede-an ku ya Tyumanem aw dayaw ku pigtuman ya piglong nan. 56 Ya kamayu tyugbulan na si Abraham, to-o sakanan migleya kay pig-iman nan na kita-en pa nan ya pagkadi ku. Aw kyinitaꞌ da nan saba, aw to-o sakanan migleya." 57 Aw miglong ya manga Judiyu, "Walaꞌ pa kaw saba dateng adti kalima͡an (50) ya umay! Pig-unu mu kaꞌ ya pagkitaꞌ kan Abraham?" 58 Aw miglong si Jisus kanilan, "Matinaw saba ya un ku paglongun kamayu: Sa walaꞌ pa si Abraham ka͡utaw, awun da aku." 59 Aw asuntu sa piglong ni Jisus, nyamulut silan sa manga batu kay un nilan sakanan pamintuwun. Manang nyanaw si Jisus aw migpalagaklagak dun ni kadégan na utaw aw lyumuwaꞌ adti pamanag na Témplo.