1 Na, dakman enemengallaw magpalekat da ya Pista na Paglabay na Anghil na Tyumanem. Nyadtu si Jisus adti Bétaniya na pig-eya-an ni Lazaro na pigmataw nan lekat adti pagkamatay. 2 Aw pigtagilanan nilan si Jisus na pangiyambungay. Si Lazaro ya sambuk na kyuman dun ni sayid ni Jisus aw si Marta ya migsanggilaꞌ kanilan. 3 Aw kyumamang si Maria sa tengaꞌ ya litro na manimboꞌ na pigngalanan na nardo na walaꞌ ya nyakadaliꞌ, aw dakulaꞌ to-o ya alagaꞌ. Aw pig-asag nan adti siki ni Jisus aw piggalisan nan na kanan lugay. Aw nyalegeb na kanimboꞌ ya seled na balay. 4 Aw dun uman ya sambuk na umagakan ni Jisus na si Judas Iskariyoti, na yan ya un maglubid kanan. Sa pagkitaꞌ nan sa pig-imoꞌ ni Maria, miglong sakanan, 5 "Anangaꞌ walaꞌ baling galina ya manimboꞌ iyan aw ya kuwalta atag galu adti manga utaw na walaꞌ ya pagkamangan? Ya alagaꞌ nan maka-umbaꞌ saba sa sangka͡umay na utaw talabahuwan!" 6 Piglong yeiy ni Judas bekeꞌ na asuntu na nyallat sakanan sa manga walaꞌ ya pagkamangan, manang asuntu na matatiluꞌ sakanan. Kay yan ya pigtaliguwan sa kuwalta na manga umagakan ni Jisus manang gayed nan pag-uwa-an. 7 Aw tyumubag si Jisus kan Judas, "Pabaya-i la sakanan, kay ya pig-imoꞌ nan, yan ya pagtagilan sa lawas ku dun ni allaw na paglebeng kanak. 8 Ya manga utaw na walaꞌ ya pagkamangan gayed mayu pig-iyeped. Manang aku diliꞌ da gayed mayu pag-iyeped."

9 Pagdengeg na madég to-o na manga utaw na Judiyu na nyawun si Jisus adti Bétaniya, nyadtu uman silan. Aw ya kanilan pagkadtu bekeꞌ oloꞌ ni Jisus, manang peles nilan uman tanawun si Lazaro na pigmataw ni Jisus lekat adti pagkamatay. 10 Yanagaw migkatipun ya manga mangkatas na magdadugsu-ay adti Jérusalim aw pigbalawbalawan nilan na patayen uman si Lazaro, 11 kay madég ya manga Judiyu na walaꞌ da dalug kanilan kay nyangintu-u la silan kan Jisus asuntu na pigmataw nan si Lazaro.

12 Na, madég to-o ya manga utaw na dyumateng adti Jérusalim na un tumambung sa Pista na Paglabay na Anghil na Tyumanem. Pagkasalut na allaw, dyengeg nilan na migpasinan da si Jisus adti Jérusalim. 13 Yanagaw nyan-utud silan sa palwa na manga palma aw migleya silan na syumungun kan Jisus. Aw miglong silan, "Hosana! Ini la ya pigpadala na Tyumanem dun ni kanan ngalan. Yeiy ya Hariꞌ na Isra-él aw umbaꞌ sakanan deyen!"*

14 Na, dadan da kyinitaꞌ ni Jisus ya sambuk na nati na asnu, aw yan ya pigsakayan nan pasinan adti Jérusalim. Aw nyatuman da ya pigpasulat na Tyumanem asini muna:

15 "Kamu na manga utaw na taga Jérusalim,

diliꞌ kamu magkallek.

Tanawa! Dyumateng da ya hariꞌ mayu

na syumakay sa nati na asnu!"*

16 Idtu muna, walaꞌ pa na manga umagakan nan kalabeti ya kakawasan na kadég yeiy na nyangka-imoꞌ. Manang dun ni paglikuꞌ ni Jisus adti tas na langit, dun da nilan ka-anenganengi na ya kadég na nya-imoꞌ kanan alag yeiy pigpasulat dadan na Tyumanem.

17 Madég ya manga utaw na nyagad kan Jisus lekat adti Bétaniya, aw silan ya kyumitaꞌ sa pagtawag nan kan Lazaro lekat adti lebeng aw ya pagmataw kanan. Aw silan uman ya gayed mig-ubat-ubat sa manga nya-imoꞌ ni Jisus. 18 Aw yeiy ya du-an na syumungun kan Jisus ya madég pa na utaw kay kyadenggan nilan ya ubat-ubat sa pig-imoꞌ nan na milagru. 19 Yanagaw migbalawbalaw ya manga Parisiyo, law nilan, "Inunuwa mayu! Diliꞌ da naten mabanggang ya kadég na manga utaw na dyumalug da kanan!"

20 Na, awun uman manga utaw na Grigo na dyumateng dun ni Jérusalim na un tumambung sa pista pada magsimba sa Tyumanem adti Témplo. 21 Aw dyumulud silan kan Pilipi na taga Bétsayda, sakup na Galiliya. Aw miglong silan kanan, "Kay Sir, kaliman nami galu kilala͡en si Jisus." 22 Piglongan ni Pilipi si Andrés sa tud nilan, aw migdengan silan nyadtu ni kan Jisus aw piglongan nilan sakanan. 23 Aw yanagaw miglong si Jisus, "Dyumateng da ya udas na patasen ya dengeg na Iseꞌ na Utaw. 24 Matinaw saba ya piglong ku kamayu: Walaꞌ ya un ma-untung adti sambuk na biniꞌ na trigu kun diliꞌ matanem. Manang kun matanem una dun ni lupaꞌ aw malandak, diliꞌ madugay gumitiꞌ aw tumulin mendaꞌ na to-o mamunga.* 25 Kun singalan ya gyuminawa sa kanan pag-eyaꞌ asini tas na lupaꞌ, kalagakan baling sa ginawa na walaꞌ ya katigkasan. Manang kun singalan ya magtibulluk dumalug kanak pangkay pa adti pagkamatay, matagtun nan ya ginawa na walaꞌ ya katigkasan. 26 Aw pangkay singalan ya malim ma-imoꞌ kanak sugu-anen, ka-ilangan una sakanan dumalug kanak. Kun ayin aku, adtu uman sakanan. Aw ya utaw na nya-imoꞌ sugu-anen ku, patasen uman na kanak Ama.

27 "Na, to-o nyasagunut ya anenganeng ku. Manang unu, paglongun ku ya kanak Ama na paluwa-en aku nan galu lekat adti pagti-is na un ku ka-agiyan? Diliꞌ saba! Kay yeiy ya du-an na dyumateng aku asini udas ini." 28 Aw miglong pa si Jisus adti Ama nan, "Kay Ama, pakita͡an beg ya kanmu pagka Tyumanem adti manga utaw pada basa͡an kaw nilan." Aw awun tingeg na lyumekat adti tas na langit na miglong, "Pigpakitaꞌ da ku ya kanak pagka Tyumanem, aw pakitaꞌ pa ku uman salut."

29 Na, madég ya manga utaw na mig-indeg-indeg na malapit dun, aw dyengeg nilan ya tingeg yan, aw law nilan, "Migdadaneg!" Aw miglong ya manga eped, "Pagaw piglongan sakanan na anghil!" 30 Manang miglong si Jisus kanilan, "Kamu saba ya ka-untungan sa tingeg na pigpadengeg na Tyumanem aw bekeꞌ ku ya un ka-untungan. 31 Migpalekat da ya pag-ukum sa manga utaw asini tas na lupaꞌ, aw degen da uman ya migdumala sa kadakulaꞌ na banwa na yan si Satanas. 32 Aw sa pagpatas da kanak adti krus, paduludun ku ya kadég na manga utaw adi kanak aw mangintu-u silan." 33 Aw dun ni paglong ni Jisus, pigpa-edeꞌ nan kun unu ya un nan ka-agiyan na pagti-is sa pagkamatay nan. 34 Yanagaw miglong ya madég na manga utaw, "Pigsulat dun ni Uldin tadun na walaꞌ ya tyamanan na pagdumala na Misiyas. Anangaꞌ kaw maglong na ka-ilangan patasen ya Iseꞌ na Utaw adti krus? Singalan kaꞌ utawa ya pigpalabet mu na Iseꞌ na Utaw?" 35 Aw miglong si Jisus kanilan, "Ini pa ni kamayu ya kalalamdag manang diliꞌ da magkadugay. Talana na asini pa, daluga mayu ya kalalamdag pagaw kasaban kamu na kangitngitan. Kay ya utaw na nyanaw dun ni mangitngit, walaꞌ nan ka-ede-i kun ayin sakanan pasinan. 36 Yanagaw talana ini pa ni sayid mayu ya kalalamdag, pangintu-uwi mayu sakanan pada ma-imoꞌ kamu manga utaw na kalalamdag."

Pagkatigkas ni Jisus maglong seiy, malakwat da sakanan pagkita-en adti madég na manga utaw. 37 Pangkay madég da ya milagru na pigpakitaꞌ nan kanilan, manang walaꞌ silan pangintu-u kanan. 38 Yanagaw nyatuman da ya pigpasulat na Tyumanem magi sa propita nan na si Isayas, law nan,

"Kay Tyumanem, singalan kaꞌ ya nyangintu-u sa pig-ubat-ubat nami?

Aw singalan manga utawa ya pigpakita-an da mu sa kanmu katulus?"*

39 Yan ya du-an na walaꞌ nilan kabatug ya pagpangintu-u, kasiling na pigpasulat uman kan Isayas, law nan,

40 "Pigtampeng na Tyumanem ya kanilan mata pada diliꞌ nilan kita-en ya katinawan.

Aw pigpakategel nan ya kanilan anenganeng pada diliꞌ nilan kalabetan ya ubat-ubat ku,

kay kun kalabetan nilan pagaw magselsel silan, aw lanasen ku ya manga salaꞌ nilan."*

41 Piglong yeiy ni Isayas asini muna kay dadan da pigpakitaꞌ kanan ya katulus na pagka Tyumanem ni Jisus na yan ya pigkasampetan nan.

42 Pangkay maynan ya piglong ni Isayas, manang awun pa uman madég na manga Judiyu na nyangintu-u kan Jisus. Pangkay adti manga magdadumala͡ay sa manga Judiyu, awun eped na nyangintu-u la kanan, manang asuntu na nyallek silan sa manga eped na Parisiyo, walaꞌ nilan ubat-ubatan pagaw alilinan silan lekat adti manga sinagoga. 43 Kay to-o pa nilan pigkaliman na sayaꞌ silan na manga utaw kay sa katutukan ya Tyumanem kanilan.

44 Na, miglong si Jisus magi sa mabagseg na tingeg adti madég na manga utaw na migkatipun dun, law nan, "Pangkay singalan ya mangintu-u kanak, pangintu-uwan nan uman ya migpadala kanak. 45 Aw kun singalan ya kyumitaꞌ kanak, kyinitaꞌ nan uman ya migpadala kanak. 46 Nyadi aku asini tas na lupaꞌ na un mag-ilaw sa anenganeng na manga utaw. Aw ya utaw na mangintu-u kanak, walaꞌ da sakanan adti kangitngitan. 47 Kun awun nyakadengeg sa ubat-ubat ku aw pigpalipaslipasan nan, diliꞌ aku ya mag-ukum kanan. Yan saba ya kanak pigkadi ya pagpaluwaꞌ sa manga utaw. Aw bekeꞌ na kanak tud ya pag-ukum. 48 Manang ya utaw na gayed kyumele kanak aw diliꞌ dumawat sa palna-u ku, ya manga tingeg na pig-ubat-ubat ku, yan ya mag-ukum kanilan kagaya adti kamoliyan na allaw. 49 Kay ya pigpalna-u ku, walaꞌ lekat adi kanak, manang lyumekat adti Ama na migpadala kanak. Aw yeiy ya migsuguꞌ kanak kun unu ya un ku palna-u. 50 Aw kya-ede-an ku na ya palna-u na pigsuguꞌ nan kanak, yan ya maggagad sa utaw adti ginawa na walaꞌ ya katigkasan. Yanagaw ya kadég na piglong ku kamayu, alag yeiy lekat adti Ama."