1 Pagkatigkas ni Jisus manawagtawag, nyanaw sakanan eped nan ya kanan manga umagakan. Tyumalipag silan sa gangaꞌ na Kidron aw syumeled silan dun ni kakawuyan na manga olibo. 2 Na, si Judas Iskariyoti na miglubid kan Jisus, kya-ede-an nan uman ya banwa yeiy kay malikit si Jisus magkadtu aw ya kanan manga umagakan. 3 Aw dyumateng si Judas na miggagad sa manga sundalu na Romanen aw manga magtatunggu-ay sa Témplo, kay pigsuguꞌ silan na manga mangkatas na magdadugsu-ay aw manga Parisiyo. Aw nyandala silan sa manga saleng aw manga kinis.

4 Na, kya-ede-an da ni Jisus dadan ya kadég na un ma-imoꞌ kanan. Yanagaw pigsungun nan silan aw nyusip sakanan, "Singalan ya pigpaninaw mayu?" 5 Aw tyumubag silan, "Si Jisus na taga Nazarit." Miglong si Jisus kanilan, "Aku saba ya pyaninaw mayu." Na, dun ni sayid nilan si Judas na yan ya miglubid kanan. 6 Sa paglong ni Jisus kun singalan sakanan, nyaka-udul silan aw nyangkalukad dun ni lupaꞌ. 7 Pigsalut nan pig-usip silan, "Singalan ya pyaninaw mayu?" Aw law nilan, "Si Jisus saba na taga Nazarit." 8 Aw miglong si Jisus kanilan, "Piglongan da ta kamu na aku saba si Jisus. Yanagaw kun aku oloꞌ ya pigpaninaw mayu, pabaya-i la ya manga eped ku ini na manaw silan." 9 Na, dun ni tubag nan, nyatuman ya piglong nan idtu muna na walaꞌ ya malagak pangkay sambuk na pigtaligu kanan na Ama. 10 Aw pigtagnus ni Simon Pédro ya kampilan nan aw pigtibas nan ya sugu-anen na pangulu na manga magdadugsu-ay. Aw dayaw nya-ilap ya kalintu na talinga nan. Ya ngalan na sugu-anen yeiy si Malku. 11 Aw miglong si Jisus kan Pédro, "Uli-an adti lumaꞌ ya kampilan mu! Pagaw mig-anenganeng kaw na diliꞌ ku mabatug ti-isen ya un pa-agiyan kanak na Ama."

12 Aw pagkatigkas yan, pigdakep si Jisus na manga sundalu na Romanen aw kapitan nilan, aw manga Judiyu na migtungguꞌ sa Témplo. Aw piggapus nilan si Jisus. 13 Pigpa-agad nilan una sakanan adti asdangan ni Anas na ugangan ni Kaypas. Na, si Kaypas ya pangulu na manga magdadugsu-ay adti Témplo dun ni umay yan. 14 Si Kaypas uman ya miglong idtu muna adti manga eped nan na magdadumala͡ay sa manga Judiyu, law nan, "Madyaw pa na sambuk oloꞌ ya utaw na matay pada sa manga Judiyu kay sa apnasen ya kadég na manga utaw asini nasud tadun."

15 Na, dyumalug si Simon Pédro kanilan adti mawatawat. Aw dyumalug uman ya sambuk na umagakan ni Jisus* na pigkilala la na pangulu na manga magdadugsu-ay, aw pyaseled nan adti kanan balay eped ni Jisus. 16 Manang si Pédro kenneꞌ nan mig-indeg-indeg adti luwaꞌ, malapit dun ni suwangan na pamanag. Yanagaw lyumuwaꞌ ya sambuk na umagakan na pigkilala na pangulu na manga magdadugsu-ay, aw migbalawbalaw silan ya sugu-anen na bubay na migtungguꞌ sa suwangan, aw pigpaseled nan si Pédro. 17 Aw miglong ya sugu-anen kan Pédro, "Endaꞌ, ikaw agaw ya sambuk na umagakan na utaw yan?" Aw tyumubag si Pédro, "Bekeꞌ ku."

18 Na, to-o manikiꞌ ya gabi yan. Yanagaw migsipanalang ya manga sugu-anen aw ya manga magtatunggu-ay dun ni duluk nilan. Aw si Pédro nyanalang uman adti sayid nilan.

19 Adti seled, pig-usip ni Anas si Jisus. Kaliman nan ka-ede-an kun singalan ya manga umagakan nan aw unu ya kanan pigpalna-u. 20 Aw tyumubag si Jisus kanan, "Walaꞌ ku tagu-a ya kanak pagpalna-u adti manga utaw. Kay dun aku pagpalna-u adti manga sinagoga aw adti manga pamanag na Témplo na alag pagkatipunan na kadég na manga Judiyu. Aw walaꞌ ya pigpalna-u ku kanilan na tagu-taguꞌ. 21 Anangaꞌ aku mayu usipen? Usipa mayu baling ya manga utaw ini na nyakadengeg kanak kay nyaka-edeꞌ silan kun unu ya pigpalna-u ku kanilan." 22 Sa paglong nan seiy, pigsampal sakanan na sambuk na magtatunggu-ay na nyinindeg malapit dun ni kanan, aw law nan, "Maynan kaꞌ ya pagtubag sa pangulu na manga magdadugsu-ay?" 23 Aw tyumubag si Jisus kanan, "Kun diliꞌ matinaw ya piglong ku, matinawa la na diliꞌ umbaꞌ ya piglong ku. Manang kun matinaw ya piglong ku, anangaꞌ aku mu sampalen?"

24 Pagkatigkas yan, pigpa-ated ni Anas si Jisus na kenneꞌ piggapus adti kan Kaypas na yan ya pangulu na manga magdadugsu-ay.

25 Na, sa kenneꞌ pa ni Pédro nyanalang, pig-usip sakanan na manga utaw dun, law nilan, "Endaꞌ, ikaw ya sambuk na umagakan na utaw yan?" Aw pigbalyaw da uman ni Pédro, law nan, "Bekeꞌ ku!" 26 Pagkatigkas yan, ya sambuk na sugu-anen na pangulu na magdadugsu-ay, miglong sakanan kan Pédro, "Endaꞌ, ikaw ya utaw na pigkitaꞌ ku eped nan dun ni kakawuyan na manga olibo?" Na, ya sugu-anen yeiy, kadégan na utaw na nya-ilap ni Pédro ya talinga. 27 Manang uman da si Pédro migbalyaw. Aw tigkan tyumaga-uk ya manuk.

28 Na, to-o pa maselem, lekat adti balay ni Kaypas pigpa-agad si Jisus pasinan adti palasyo na gubirnador na si Pilato na taga Roma. Aw pigpaseled nilan si Jisus, manang walaꞌ seled ya manga magdadumala͡ay sa manga Judiyu na migpa-agad kanan, kay kun sumeled silan kalakadan nilan ya kanilan katanem na diliꞌ sumambuk sa manga Héntil, yanagaw diliꞌ da kanilan tumbay na sumambuk kuman dun ni Pista na Paglabay na Anghil na Tyumanem. 29 Yanagaw lyumuwaꞌ si Pilato aw nyusip kanilan, "Unu ya limanda mayu sa utaw ini?" 30 Aw tyumubag silan kanan, "Kun walaꞌ pa ya pig-imoꞌ nan na malatay, diliꞌ galu nami dala͡en asini kanmu!" 31 Aw miglong si Pilato kanilan, "Dala͡a mayu adti kamayu usayanan aw kamu ya mag-ukum kanan magi sa kamayu Uldin." Tyumubag ya manga magdadumala͡ay sa manga Judiyu, law nilan, "Dun ni kamayu bala-ud na Roma, walaꞌ saba ya katundanan nami magpapatay sa utaw." 32 Aw dun ni piglong nilan kan Pilato, nyatuman ya piglong ni Jisus idtu muna kun unu ya kamatayen na un nan ka-agiyan. 33 Yanagaw lyumikuꞌ si Pilato adti seled, aw pigpatawag nan si Jisus aw pig-usip nan, "Unu, ikaw ya hariꞌ sa manga Judiyu?" 34 Aw tyumubag si Jisus kanan, "Unu, tengteng yeiy kanmu usip aw kun oloꞌ kaw piglongan na manga utaw kun singalan aku?" 35 Aw miglong si Pilato kanan, "Unu kaꞌ ya pagtandaw mu kanak, Judiyu? Ya manga eped mu na Judiyu aw ya kamayu manga mangkatas na magdadugsu-ay, silan ya dyumala kanmu asini kanakeꞌ. Na, unu ya tengteng na nya-imoꞌ mu?" 36 Aw tyumubag si Jisus kanan, "Ya kanak pagkahariꞌ walaꞌ lekat asini tas na lupaꞌ. Kun asini pa ni tas na lupaꞌ ya pagkahariꞌ ku, tyumanam da galu ya manga sakup ku na un magtameng kanak pada diliꞌ aku tumbay adti manga magdadumala͡ay sa manga Judiyu. Manang ya kanak pagkahariꞌ walaꞌ lekat asini tas na lupaꞌ." 37 Aw miglong si Pilato kanan, "Kun maynan, hariꞌ kaw kadiꞌ!" Aw miglong si Jisus kanan, "Matinaw saba ya piglong mu na hariꞌ aku. Aw ya du-an na nya͡utaw aku asini tas na lupaꞌ pada ubat-ubat ku ya tengteng matinaw. Aw ya kadég na malim maka-edeꞌ sa matinaw, silan ya gayed magpakanyeg kanak." 38 Aw nyusip si Pilato kanan, "Unu kaꞌ ya tengteng na matinaw?"

Pagkatigkas ni Pilato maglong seiy, uman da sakanan lyumuwaꞌ aw piglongan nan salut ya manga Judiyu, law nan, "Walaꞌ ya kyinitaꞌ ku na un pagsalaꞌ kanan. 39 Manang awun katanem mayu na kada umay dun ni Pista na Paglabay na Anghil na Tyumanem, magsekat kamu sa sambuk na utaw na nyakalabusu na paluwa-en ku adti kamayu. Yanagaw unu ya kaliman mayu? Paluwa-en ku kamayu ya hariꞌ na manga Judiyu?" 40 Manang nyamansag ya manga utaw dun, miglong silan, "Bekeꞌ nan! Si Barabas da!" Na, si Barabas sambuk na ribildi.