1 Na, awun utaw na Parisiyo na pigngalanan na si Nikodimo, aw sambuk uman sakanan na magdadumala͡ay sa manga Judiyu. 2 Sambuk na gabi, nyadtu sakanan ni sayid ni Jisus aw piglongan nan, "Kay Magpalna-uway, kya-ede-an nami na sambuk kaw na magpalna-uway na pigpadala na Tyumanem. Kay awun manga milagru na pigpan-imoꞌ mu na diliꞌ mabatug na utaw kun walaꞌ ya Tyumanem dun ni kanan." 3 Tyumubag si Jisus kanan, "Matinaw ya un ku paglongun kanmu: Diliꞌ mabatug na utaw kita-en ya Kasakupan na Pighari-an na Tyumanem kun diliꞌ sakanan ma͡utaw salut." 4 Aw nyusip si Nikodimo kanan, "Unu ya imo-un na utaw pada ma͡utaw sakanan salut? Kun unud da ya ginawa nan, unun nan ya paglikuꞌ aw pagseled adti buntit na ina nan pada ma͡utaw salut?" 5 Aw tyumubag si Jisus kanan, "Matinaw saba ya un ku kanmu paglongun: Walaꞌ ya utaw na makaseled adti Kasakupan na Pighari-an na Tyumanem kun diliꞌ sakanan una ma͡utaw magi sa tubig aw sa Ispiritu Santo. 6 Kay ya pig-iseꞌ na utaw, utaw saba, aw ya nya͡utaw magi sa Ispiritu Santo, pig-atagan saba sakanan na bagu na anenganeng na lekat adti tas na langit. 7 Diliꞌ kaw magkabelengbeleng sa piglong ku kanmu na ka-ilangan ya kadég mayu ma͡utaw salut. 8 Ya samet tumambel pangkay ayin pasinan, aw dengegen tadun ya pagtambel nan manang diliꞌ tadun ka-ede-an kun ayin lekat aw ayin uman pasinan. Kasiling uman na maynan, diliꞌ ka-ede-an kun pig-unu na utaw ya pagka͡utaw magi sa Ispiritu Santo." 9 Aw nyusip pa uman si Nikodimo, "Unu ya pagkabatug na kadég yeiy?" 10 Tyumubag si Jisus kanan, "Sambuk kaw saba na pigkilala na magpalna-uway sa Uldin asini banwa na Isra-él. Anangaꞌ walaꞌ mu ka-ede-i ya kadég yeiy? 11 Matinaw saba ya un ku kanmu paglongun: Pig-ubat nami ya kanami kya-ede-an aw pigmatinaw nami ya kanami kyinitaꞌ, manang walaꞌ mayu dawata. 12 Kun walaꞌ kamu pangintu-u sa piglong ku sa manga asini tas na lupaꞌ, unun mayu ya pagpangintu-u kun ubat ku kamayu ya adti tas na langit? 13 Walaꞌ ya utaw na nyaka-edeꞌ kun unu ya adti tas na langit kay walaꞌ ya utaw na nyakakadtu aw lyumikuꞌ asini. Aku oloꞌ na Iseꞌ na Utaw ya nyaka-edeꞌ kay lyumekat aku adti tas na langit."

14 "Ya un ma-imoꞌ kanaken, kasiling na nya-imoꞌ adti kaligbinan dun ni pagbetang ni Moysis sa inutaw na kamugung adti aligi aw patasa nan pada kita-en na manga utaw aw mataw silan.* Ka-ilangan maynan uman ya ma-imoꞌ kanak na Iseꞌ na Utaw, pakalabu aw patasen adti krus, 15 pada pangkay singalan ya mangintu-u kanak, makatagtun sa ginawa na walaꞌ ya katigkasan." Yeiy ya piglong ni Jisus adti kan Nikodimo.

16 Pigginawa͡an to-o na Tyumanem ya kadég na manga utaw, aw yan ya du-an na pig-atag nan ya kanan Iseꞌ na tamisa pada pangkay singalan ya mangintu-u kanan diliꞌ sakanan pa-emel-emelen, manang makatagtun baling sa ginawa na walaꞌ ya katigkasan. 17 Kay ya pagpadala na Tyumanem sa Iseꞌ nan asini tas na lupaꞌ, bekeꞌ na kaliman nan na ukuman ni Jisus ya manga utaw asuntu sa manga salaꞌ nilan, manang yan baling ya tud na Tyumanem na paluwa-en silan magi sa Iseꞌ nan. 18 Yanagaw, pangkay singalan ya mangintu-u kanan, diliꞌ saba ukuman. Manang pangkay singalan ya diliꞌ mangintu-u kanan, pig-ukuman da sakanan kay walaꞌ nan pangintu-uwi ya Iseꞌ na Tyumanem na tamisa. 19 Ini ya du-an na un silan ukuman: Dyumateng ya kalalamdag asini tas na lupaꞌ na un mag-ilaw sa anenganeng na manga utaw. Manang yan baling ya pigginawa͡an nilan ya kangitngitan aw bekeꞌ na kalalamdag kay malatay ya manga imo-unun nilan. 20 Kay ya kadég na manga utaw na gayed mig-imoꞌ sa malatay, pigkele͡an nilan ya kalalamdag aw walaꞌ silan pagpalapit dun pagaw kabukasan ya imo-unun nilan na malatay. 21 Manang ya manga utaw na gayed dyumalug sa tengteng matinaw, kaliman nilan magpalapit adti kalalamdag pada kita-en ya manga imo-unun nilan na madyaw kay nyabatug nilan yeiy magi sa tabang na Tyumanem.

22 Pagkatigkas yan, nyadtu si Jisus aw manga umagakan nan ni probinsiya na Judiya. Aw sa talana nilan dun, awun manga utaw na pigba͡utismuwan nan. 23 Aw si Juan uman migba͡utismu adti Énun malapit adti lunsud na Salim kay madég ya linaw dun ni banwa yan. Aw madég ya nyangkadtu adti kanan na un magpaba͡utismu, 24 kay dun ni manga allaw yan, walaꞌ pa kalabusuwa si Juan.

25 Na, migbalawbalaw ya sambuk na Judiyu aw manga umagakan ni Juan, aw pigbilingbilingan nilan ya katanem na paglinis na manga Judiyu. 26 Yanagaw nyadtu silan ni kan Juan aw pig-usip nilan sakanan, "Kay Magpalna-uway, kya-anenganengan mu ya utaw na pigpakilala mu kanami adti dipag na Jordan? Migba͡utismu la uman sakanan! Tanawa! Nyadtu la baling ni kanan ya kadég na manga utaw!" 27 Manang tyumubag si Juan kanilan, "Walaꞌ ya un mabatug na utaw pangkay sambuk kun diliꞌ tumbay na Tyumanem. 28 Kamu saba ya makamatinaw sa pigpa-edeꞌ ku idtu muna na bekeꞌ ku ya Misiyas manang pigsuguꞌ aku oloꞌ na Tyumanem na muna kanan pada ubat-ubat ku ya kanan pagdateng. 29 Kasiling na awun pigkasal, yan oloꞌ ya tagtun sa panga͡ubayanen ya eseg nan. Manang ya ubaybay na pigpamalliꞌ na pangesegenen na migtagad kanan, to-o magleya sa pagdengeg nan na dyumateng da ya pangesegenen. Yanagaw aku uman, to-o aku migleya asuntu na nyangkadtu la ya manga utaw adti kan Jisus. 30 Ka-ilangan na magkatas to-o ya kanan dengeg aw ka-ilangan na diliꞌ da aku sa kanak magkadengganen." Yeiy ya piglong ni Juan na Magba͡utismuway.

31 Ya lyumekat adti tas na langit, matas pa sakanan kay sa kadég. Kitadun na manga utaw, taga asini kitadun ni tas na lupaꞌ, yanagaw yan oloꞌ ya pigkasampetan tadun ya asini tas na lupaꞌ. Manang ya lyumekat adti tas na langit, matas pa kay sa kadég, 32 aw ya manga kyinitaꞌ nan aw ya manga dyengeg nan adti tas na langit, pig-ubat-ubat nan, manang tabay ya nyangintu-u. 33 Manang pangkay singalan ya mangintu-u sa piglong nan, yan ya magmatinaw sa kadég na pigpa-edeꞌ kanan na Tyumanem. 34 Kay si Jisus ya pigpadala na Tyumanem na un maglong sa manga tingeg nan, aw pig-atag kanan na Tyumanem ya kadakulaꞌ na katulus na Ispiritu Santo. 35 Pigginawa͡an na Ama ya kanan Iseꞌ aw pig-atag adti kanan ya kadég. 36 Pangkay singalan ya mangintu-u sa Iseꞌ na Tyumanem, nyatagtun nan ya ginawa na walaꞌ ya katigkasan. Manang kun singalan ya diliꞌ dumalug sa Iseꞌ nan, diliꞌ nan matagtun ya ginawa na walaꞌ ya katigkasan, aw dun baling ni kanan ya kadaman na Tyumanem.