1 Sa pagpanaw ni Jisus, pigkitaꞌ nan ya sambuk na utaw na buta lekat pa na pagka͡utaw nan. 2 Yanagaw nyusip ya manga umagakan nan, "Kay Magpalna-uway, anangaꞌ yan mabuta? Kanyan salaꞌ ya pagkabuta nan, kanan aw kana mangkatikadeng nan?" 3 Aw tyumubag si Jisus kanilan, "Ya kanan pagkabuta bekeꞌ na asuntu na nyakasalaꞌ sakanan aw mangkatikadeng nan. Manang magi dun ni pagkabuta nan, kita-en ya katulus na Tyumanem adti kanan. 4 Talana na allaw pa, ka-ilangan imo-un tadun ya imo-unun na Tyumanem na migpadala kanak. Kay diliꞌ madugay, dumateng ya kangitngitan kasiling na gabi aw diliꞌ da makatalabahu ya pangkay singalan. 5 Talana ini pa aku ni tas na lupaꞌ, aku saba ya kalalamdag na maka-ilaw sa anenganeng na manga utaw." 6 Tigkas ni Jisus maglong, pig-eleban nan ya kutu na lupaꞌ aw pig-imoꞌ nan pasak. Aw pigdamus nan adti manga mata na buta, 7 aw piglongan nan, "Kadtu kaw adti linaw na Silo-am aw pagkulamus kaw dun." Na, ya kakawasan na Silo-am: pigpadala. Yanagaw nyadtu ya utaw yan aw lyumikuꞌ sakanan na dayaw da kyumitaꞌ.Pigguliꞌ ni Jisus ya mata na utaw na buta.

8 Na, sa pagkitaꞌ da na manga sumbalay nan aw manga dadan da kyumilala kanan, miglong silan, "Endaꞌ, yan agaw ya utaw na gayed nyingkud aw magpangilalat magsekat sa kuwalta?" 9 Aw tyumubag ya manga eped, "E-e, yan saba sakanan!" Manang law na manga eped na utaw, "Bekeꞌ nan! Unawa oloꞌ ya gya nilan." Tigkas yan, miglong uman ya utaw na bagu kyumitaꞌ, "Aku saba ya utaw yan!" 10 Yanagaw pig-usip nilan sakanan, "Unu ya du-an na kyumitaꞌ da kaw?" 11 Aw miglong sakanan, "Ya utaw na pigngalanan na si Jisus mig-imoꞌ sa pasak aw pigdamus nan adi manga mata ku, aw pigsuguꞌ aku nan adti linaw na Silo-am pada magkulamus. Yanagaw nyadtu aku aw sa pagkulamus ku, dayaw aku kyumitaꞌ!" 12 Aw nyusip silan kanan, "Ayin da sakanan adun?" Tyumubag ya utaw yan, "Enday. Walaꞌ da ku ka-ede-i."

13 Pagkatigkas yan, pigpa-agad nilan adti asdangan na manga Parisiyo ya utaw na buta idtu muna. 14 Na, ya pag-imoꞌ ni Jisus sa pasak na pigdamus nan adti manga mata na buta, yan ya Allaw na Paglagdeng. 15 Yanagaw, pig-usip na manga Parisiyo ya utaw yan, "Anangaꞌ magkitaꞌ da kaw?" Aw piglongan nan silan, "Pigdamusan na utaw na pasak ya manga mata ku. Tigkas yan, migkulamus aku, aw dayaw da aku kyumitaꞌ." 16 Yanagaw miglong ya manga eped na Parisiyo, "Walaꞌ lekat adti Tyumanem ya utaw na mig-imoꞌ seiy. Kay walaꞌ nan daluga ya suguꞌ na Tyumanem na diliꞌ magtalabahu dun ni Allaw na Paglagdeng!" Manang miglong ya manga eped kanilan, "Kun makasasalaꞌ pa ya utaw yan, diliꞌ nan mabatug ya manga milagru na kasiling na maynan!" Aw nyatenga-tengaꞌ ya anenganeng nilan.

17 Yanagaw pigpadeleg nilan ya pag-usip sa utaw na buta idtu muna, law nilan, "Na, asuntu na pigpaguliꞌ nan ya manga mata mu, unu ya kanmu anenganeng sa utaw yan?" Aw tyumubag ya utaw na bayaꞌ kyumitaꞌ, "Propita sakanan!" 18 Na, walaꞌ pangintu-uwi na manga magdadumala͡ay sa manga Judiyu ya piglong nan na buta sakanan idtu muna aw adun magkitaꞌ da sakanan. Yanagaw pigpatawag nilan ya kanan ama aw ina 19 aw pig-usip nilan, "Endaꞌ, iseꞌ mayu ya utaw ini? Unu, matinaw na buta sakanan lekat pa na pagka͡utaw nan? Kun matinaw yeiy, anangaꞌ magkitaꞌ da sakanan adun?" 20 Aw tyumubag kanilan ya kanan mangkatikadeng, "Tengteng saba na iseꞌ nami sakanan aw kya-ede-an nami na buta sakanan lekat pa na pagka͡utaw nan, 21 manang walaꞌ nami ka-ede-i ya du-an na kyumitaꞌ da sakanan. Aw walaꞌ nami uman ka-ede-i kun singalan ya migpaguliꞌ sa manga mata nan. Usipa mayu baling sakanan! Kay unud da saba ya kanan ginawa aw mabatug da nan ya pagtubag kamayu." 22 Maynan ya piglong na mangkatikadeng nan kay nyallek silan sa manga magdadumala͡ay sa manga Judiyu. Kay dadan da migsambuk ya anenganeng nilan aw pigpa-edeꞌ da nilan adti manga utaw na diliꞌ da paseleden adti kanilan sinagoga kun singalan ya mag-ubat-ubat na si Jisus ya Misiyas. 23 Yan ya du-an na miglong ya mangkatikadeng nan, "Unud da saba ya ginawa nan. Usipa mayu sakanan!"

24 Yanagaw pigpatawag pa nilan salut ya utaw na kyumitaꞌ da, aw law nilan, "Pagsapaꞌ kaw adti asdangan na Tyumanem na ubat mu ya matinaw. Kya-ede-an da nami na makasasalaꞌ ya utaw na migpaguliꞌ kanmu." 25 Aw tyumubag ya utaw yan, "Walaꞌ ku ka-ede-i kun makasasalaꞌ sakanan aw diliꞌ. Yan oloꞌ ya kya-ede-an ku, idtu muna buta aku manang adun kyumitaꞌ da aku!" 26 Aw pig-usip pa nilan, "Unu ya pig-imoꞌ nan kanmu? Pig-unu nan ya pagpaguliꞌ sa kanmu manga mata?" 27 Aw tyumubag ya utaw yan, "Pig-ubatan da ta kamu! Manang walaꞌ mayu kadiꞌ pangintu-uwi ya pig-ubat ku. Anangaꞌ kamu gayed gumelgel musip kanak? Unu, kaliman mayu uman na ma-imoꞌ umagakan nan?" 28 Aw pigsupla nilan sakanan, law nilan, "Umagakan kaw nan saba! Manang kami, yan ya kanami pigdalug ya palna-u ni Moysis. 29 Kay kya-ede-an nami na si Moysis piglongan na Tyumanem asini muna. Manang ya utaw yeiy na migguliꞌ kanmu, walaꞌ nami ka-ede-i kun ayin sakanan lekat!" 30 Aw tyumubag ya utaw yan kanilan, "Nyabelengbeleng aku! Pigpaguliꞌ nan ya manga mata ku manang walaꞌ mayu ka-ede-i kun ayin sakanan lekat! 31 Nya-edeꞌ kitadun na diliꞌ pakanyegan na Tyumanem ya manga makasasalaꞌ. Manang pangkay singalan ya migsimba kanan aw mig-imoꞌ sa pagkaliman nan, pakanyegan nan saba sakanan. 32 Lekat pa na pagka-imoꞌ na kadakulaꞌ na banwa, walaꞌ pa ya dyengeg tadun na utaw kasiling nan na migguliꞌ sa utaw na buta lekat pa na pagka͡utaw nan. 33 Kun ya utaw yan walaꞌ lekat adti Tyumanem, na, diliꞌ nan galu mabatug ma-imoꞌ ya kasiling na maynan!" 34 Manang tyumubag silan, "Unu kaꞌ, nyaka-eles kaw migpalna-u kanami? Makasasalaꞌ kaw saba lekat pa na pagka͡utaw mu!" Aw tigkas yan, miglong pa silan kanan, "Diliꞌ da kaw makaseled adti manga sinagoga nami!"

35 Sa pagdengeg ni Jisus na diliꞌ da paseleden ya utaw yan na manga magdadumala͡ay sa manga Judiyu adti sinagoga nilan, yanagaw pyaninaw sakanan ni Jisus. Aw sa pagkitaꞌ da nan, pig-usip nan, "Unu, pyangintu-uwan da mu ya Iseꞌ na Utaw?" 36 Aw tyumubag sakanan, "Ubati aku kay Sir kun singalan sakanan, pada mangintu-u aku kanan." 37 Aw miglong si Jisus, "Kyinitaꞌ da mu saba sakanan aw yan ya migbalawbalaw kanmu adun." 38 Aw miglong ya utaw yan, "Kay Matas na Pangulu, nyangintu-u la aku kanmu!" Aw lyumuhud sakanan aw pigsimba nan si Jisus.

39 Aw miglong si Jisus kanan, "Ya pagkadi ku asini tas na lupaꞌ, ya sampetan nan un ukuman ya manga utaw. Ya manga utaw na walaꞌ paka-edeꞌ sa Tyumanem, kasiling silan na manga buta, aw ilawan ku ya anenganeng nilan. Manang ya manga utaw na iman nilan aw nyaka-edeꞌ silan sa Tyumanem, masiling silan baling na buta." 40 Na, awun manga Parisiyo na malapit dun na nyakadengeg sa piglong ni Jisus, aw pig-usip nilan sakanan, "Unu ya kakawasan na piglong mu? Unu, kasiling kami uman na buta?" 41 Aw tyumubag si Jisus kanilan, "Kun buta pa kamu, walaꞌ galu ya un pagsalaꞌ kamayu. Manang miglong kamu, ‘Nyabangal nami ya katinawan.’ Yanagaw, kenneꞌ pa na salaꞌ mayu."