1 Na, paglabay da na duwangallaw, awun kasal adti baranggay na Cana sakup na probinsiya na Galiliya. Aw nyadtu ya ina ni Jisus, 2 aw si Jisus sambuk uman na pyamilit aw ya kanan manga umagakan. 3 Sa pagka͡abus da na bino, miglong kan Jisus ya ina nan, "Nyabus da ya bino nilan." 4 Aw miglong si Jisus kanan, "Kay Neꞌ, anangaꞌ kaw maglong adi kanak na nyabus da ya bino nilan? Walaꞌ pa saba dateng ya allaw na pakitaꞌ ku ya kanak katulus adti manga utaw." 5 Manang miglong ya ina nan adti manga sugu-anen dun ni kasal, "Imo-a mayu ya pangkay unu ya paglongun nan kamayu."Pigbaluy ni Jisus bino ya tubig.

6 Na, dun ni balay yan, awun enem ya mangkabaklaꞌ na betanganan sa tubig na pag-unaw na manga Judiyu sa diliꞌ pa silan kuman, kasiling na pa-agi na pigdalug na kanilan mangkabaklegay. Ya manga betanganan yeiy alag batu, aw kun magpangkatmuꞌ da, ya seled na tagsambuk kanilan tag kaluwa͡an (20) kun bekeꞌ yan katluwan (30) ka galun. 7 Aw miglong si Jisus adti manga sugu-anen, "Pan-atmu-a mayu na tubig ya manga betanganan ini." Aw dayaw nilan pigpan-atmuꞌ ya kadég na manga betanganan. 8 Pagkatigkas yan, miglong si Jisus kanilan, "Na! Sagad kamu tagbiꞌ aw tigisi ya pigsaligan sa pista pada témtéman nan." Aw syumagad silan aw pigdala nilan adti pigsaligan. 9 Aw pigtémtéman nan ya tubig na nya-imoꞌ da bino, manang walaꞌ nan ka-ede-i kun ayin lekat ya bino yeiy. Yan oloꞌ ya nyaka-edeꞌ ya manga sugu-anen na syumagad. Yanagaw pigpatawag na pigsaligan ya eseg na bagu nyangugnan 10 aw piglongan nan, "Ya katanem tadun pagpa-inem una ya madyaw na bino, aw kun dakulaꞌ da ya ma-inem nilan, bagu la uman pa-inem ya diliꞌ to-o madyaw. Manang ikaw, bagu mu baling adun paluwa-en ya to-o madyaw na bino."

11 Yeiy ya nya-imoꞌ adti Cana, sakup na Galiliya, aw yan ya tagnaꞌ na milagru na pig-imoꞌ ni Jisus adti asdangan na manga utaw. Aw magi sa milagru yeiy, dun kita-a ni kanan ya katulus na pagka Tyumanem nan. Aw nyangintu-u kanan ya manga umagakan nan.

12 Pagkatigkas yan, tyumubang si Jisus pasinan adti lunsud na Kapirna-um eped nan ya kanan ina aw manga inulug nan, aw manga umagakan nan. Aw nyatingen pa silan dun seled na pilangallaw.

13 Na, ya Pista na Paglabay na Anghil na Tyumanem un da magpalekat. Aw nyadtu si Jisus ni Jérusalim na un tumambung sa pista eped nan ya madég na manga Judiyu. 14 Pagdateng nan dun, syumeled sakanan adti dakulaꞌ na pamanag na Témplo. Aw pigkitaꞌ nan na awun manga utaw na migbaligyaꞌ sa manga baka aw karniro aw kalupati. Aw kyinitaꞌ nan uman ya manga maglaliwanay sa kuwalta dun ni manga lamisa nilan. 15 Yanagaw mig-imoꞌ si Jisus sa lalabet na lubid, aw pigpalekat nan ya pag-alilin kanilan. Pig-alaw nan uman ya manga karniro aw manga baka pasinan adti luwaꞌ na pamanag na Témplo. Pigpambélét nan ya kuwalta aw pigpantuwad nan ya manga lamisa. 16 Aw piglongan nan ya manga mamaligya-ay sa kalupati, "Kamanga mayu ya kadég yeiy! Ya-i mayu pag-imo-a baligya-anan ya balay na kanaken Ama!" 17 Aw kya-anenganengan na manga umagakan nan ya pigpasulat na Tyumanem asini muna: "Asuntu na dakulaꞌ ya ginawa ku sa Balay na Tyumanem, yeiy saba ya un dumala kanak adti pagkamatay."*

18 Na, sa pagkitaꞌ na manga magdadumala͡ay sa manga Judiyu sa pig-imoꞌ nan, pig-usip nilan si Jisus, "Unu ya un mu kanami pakitaꞌ na pangilala na magmatinaw na awun katundanan mu mag-imoꞌ seiy?" 19 Aw tyumubag si Jisus kanilan, "Agba-a mayu ya Témplo ini aw seled na tulungallaw pa-indegen ku salut." 20 Aw tyumubag silan, "Ya Témplo ini, pig-imoꞌ na manga panday seled na kapatan tag enem (46) ya umay, aw miglong kaw na seled oloꞌ na tulungallaw pa-indegen mu salut?" 21 Manang ya pigpalabet ni Jisus na Témplo, yan ya kanan lawas. 22 Yanagaw adti moli na allaw na nyataw sakanan lekat adti pagkamatay, kya-anenganengan na manga umagakan nan ya piglong nan idtu muna, aw pyangintu-uwan nilan ya pigpasulat dadan na Tyumanem asini muna aw ya manga piglong ni Jisus.

23 Na, sa adtu pa si Jisus ni Jérusalim dun ni manga allaw na Pista na Paglabay na Anghil na Tyumanem, madég ya nyangintu-u kanan kay kyinitaꞌ nilan ya manga milagru na pigpan-imoꞌ nan. 24 Manang walaꞌ si Jisus salig sa pagpangintu-u nilan kanan, kay kya-ede-an nan ya kadég na awun ni anenganeng nilan. 25 Aw walaꞌ uman ya du-an na pa-edeꞌ kanan ya bet na manga utaw kay kya-ede-an da nan dadan silan.