1 Na, dyengeg na manga Parisiyo na madég pa ya utaw na migpaba͡utismu aw dyumalug kan Jisus kay sa manga dyumalug kan Juan, 2 manang ya tengteng matinaw, bekeꞌ ni Jisus ya migba͡utismu manang kanan manga umagakan. 3 Pagka-edeꞌ da ni Jisus na dyengeg da na manga Parisiyo, pig-indegan nan ya probinsiya na Judiya aw lyumikuꞌ adti Galiliya.

4 Sa pagpasinan ni Jisus adti Galiliya, ka-ilangan sakanan magi adti Samariya. 5 Aw sa pagdateng nilan adti Samariya, nyaka-agi silan adti lunsud na Sikar malapit adti lupaꞌ na pig-atag ni Jakub sa iseꞌ nan na si José. 6 Na, dun ni banwa yan awun to-o malalem na tebbengan na pigkutkutan ni Jakub asini muna. Aw nyingkud si Jisus dun ni kilid na tebbengan kay to-o sakanan migkalug lekat adti panaw nan aw alas dosi la. 7,8 Sayda la nan oloꞌ ya dun kay ya manga umagakan nan nyadtu silan ni lunsud na un mayad sa makan.

Walaꞌ kadugay, dyumateng ya sambuk na ka͡ubayan na Samariyanen na un sumaluk. Aw miglong si Jisus kanan, "Pa-inema aku na tubig." 9 Aw miglong ya ka͡ubayan, "Anangaꞌ kaw magsekat adi kanak sa tubig? Judiyu kaw saba aw aku ka͡ubayan na Samariyanen." Yan ya piglong na ka͡ubayan kay ya manga Judiyu diliꞌ silan pagkasambukan na manga Samariyanen.Migbalawbalaw si Jisus aw ya ka͡ubayan na Samariyanen.

10 Aw miglong si Jisus kanan, "Kun pigka-ede-an pa mu galu kun unu ya ma-atag na Tyumanem aw kun singalan aku na migsekat kanmu sa tubig, ikaw baling ya magsekat kanak aw atagan ta kaw sa tubig na maka-atag sa tengteng ginawa." 11 Aw miglong ya ka͡ubayan kanan, "Kay Sir, walaꞌ ya sasaluk mu aw to-o malalem ya tebbengan ini. Ayin kaw kamang sa tubig na maka-atag sa ginawa? 12 Unu, matas pa kaw kaꞌ kay sa bakleg nami asini muna na si Jakub? Nyinem sakanan sa tubig ini aw nyinem uman ya mangayseꞌ nan, aw pigpa-inem nilan asini ya kanilan manga ayep. Aw yeiy ya ayawanan nan kanami na manga buwadbuwad nan." 13 Aw tyumubag si Jisus kanan, "Ya utaw na minem sa tubig ini, talaynemen pa salut, 14 manang pangkay singalan ya minem sa tubig na atag ku, diliꞌ da sakanan salut talaynemen. Kay ya palangad tubig na un ku atag, masiling saba na selep na gayed tyumugbul dun ni kanan anenganeng, aw matag kanan sa ginawa na walaꞌ ya katigkasan." 15 Yanagaw miglong ya ka͡ubayan, "Kay Sir, atagi aku na tubig yan pada diliꞌ da aku talaynemen salut, aw diliꞌ da aku magliku-likuꞌ sumaluk!" 16 Miglong si Jisus kanan, "Angaya ya eseg mu aw likuꞌ kaw adi." 17 Aw tyumubag ya ka͡ubayan, "Walaꞌ ya eseg ku." Aw miglong si Jisus, "Matinaw ya tubag mu na walaꞌ ya kanmu eseg, 18 kay idtu muna awun lima ya eseg mu aw ya sambuk na pig-iyeped mu adun bekeꞌ na kanmu tengteng eseg. Matinaw saba ya piglong mu." 19 Miglong ya ka͡ubayan, "Kay Sir, nya-edeꞌ aku na propita kaw! 20 Asini buntud ini, yeiy ya banwa na pagsimba͡an na kanami manga mangkabaklegay.* Manang miglong kamu na manga Judiyu na adtu oloꞌ ni Jérusalim ya umbaꞌ pagsimba͡an sa Tyumanem." 21 Aw tyumubag si Jisus kanan, "Pakanyegi ya un ku kanmu paglongun: Dumateng ya allaw na ya pagsimba na utaw sa Ama diliꞌ oloꞌ asini buntud ini aw diliꞌ uman oloꞌ adti Jérusalim. 22 Kamu na manga Samariyanen, walaꞌ mayu ka-ede-i kun singalan ya pigsimba mayu. Manang kami na manga Judiyu, kya-ede-an nami kun singalan ya kanami pigsimba, kay ya Magpaluwa-ay sa manga utaw lyumekat saba adti manga utaw na Judiyu. 23 Manang dumateng ya udas aw migpalekat da saba na ya manga tengteng mananimba͡ay magkasambuk ya kanilan anenganeng na un simba͡en ya Ama aw matibulluk ya kanilan anenganeng adti katinawan. Maynan ya umbaꞌ na mananimba͡ay na pigpaninaw na Tyumanem. 24 Ya Tyumanem, Ispiritu saba. Yanagaw pangkay singalan ya magsimba kanan, ka-ilangan simba͡en nilan dun ni kanilan ispiritu, aw matibulluk adti katinawan."

25 Miglong ya ka͡ubayan kan Jisus, "Kya-ede-an ku na dumateng ya Misiyas na pigtawag uman na Kristu. Aw sa pagdateng nan, bangalen nan kanaten ya kadég." 26 Aw miglong si Jisus kanan, "Aku saba ya piglong mu na un dumateng."

27 Sa kenneꞌ pa ni Jisus miglong, dyumateng ya manga umagakan nan. Aw nyabelengbeleng silan kay migbalawbalaw sakanan sa ka͡ubayan. Manang walaꞌ ya sambuk kanilan na nyusip sa ka͡ubayan kun unu ya tud nan aw walaꞌ silan uman usip kan Jisus aw anangaꞌ sakanan magbalawbalaw sa ka͡ubayan yeiy.

28 Aw pig-ayawan na ka͡ubayan ya betanganan nan sa tubig aw maksay lyumikuꞌ adti lunsud. Aw pig-ubatan nan ya manga utaw na nyeyaꞌ dun, 29 law nan, "Panamal kamu! Tanawa mayu ya utaw na mig-ubat kanak sa kadég na nya-imoꞌ ku! Pagaw yeiy da gya ya Misiyas?" 30 Yanagaw ya manga utaw lyumekat adti lunsud yan aw nyadtu silan adti kan Jisus.

31 Sa walaꞌ pa dateng ya manga utaw, miglong kan Jisus ya manga umagakan nan, "Kay Magpalna-uway, kan da kaw!" 32 Manang miglong si Jisus kanilan, "Awun pagkanen ku na walaꞌ mayu ka-ede-i." 33 Yanagaw mig-usip-usipay silan, law nilan, "Pagaw awun dyumala kanan sa kakan?" 34 Manang miglong si Jisus kanilan, "Yan ya kanak pagkanen, ya pagtuman sa pagkaliman na migpadala kanak aw ya paglingeb sa imo-unun na pya-imoꞌ nan kanaken. 35 Endaꞌ, miglong kamu na awun pa upatembulan bagu ya pag-ani? Manang paglongun ta kamu na adun da saba ya umbaꞌ na pag-ani. Inunuwa mayu ya madég na utaw na nyandateng! Kun sa aniyenen pa yeiy, dayaw da nya-inug aw umbaꞌ da aniyen. 36 Yanagaw madyaw kun palekaten da mayu ya pag-ani adun. Aw awun saba madawat mayu lekat adti Tyumanem na palangad bunga na yan ya manga utaw na un mangintu-u aw makatagtun sa ginawa na walaꞌ ya katigkasan. Aw ya manga utaw na migtanem aw ya manga utaw na mig-ani, alag silan magleya. 37 Matinaw ya paglongun: ‘Awun migtanem, aw eped ya mig-ani.’ 38 Pigsuguꞌ ta kamu na un mag-ani sa walaꞌ mayu kapagudi. Ya eped na manga utaw migtalabahu aw to-o dakulaꞌ ya pagud nilan. Aw kamu ya kya-untungan sa kanilan kyapagudan."

39 Aw madég ya manga Samariyanen dun ni lunsud yan na nyangintu-u la kan Jisus asuntu sa pig-ubat kanilan na ka͡ubayan. Law nan, "Piglong nan saba kanak ya kadég na pig-imoꞌ ku!" 40 Yanagaw sa pagdateng da na manga Samariyanen adti kan Jisus, nyanginayuꞌ silan kanan na matingen pa adti tampid nilan. Aw nyeyaꞌ pa sakanan dun seled na duwangallaw.

41 Aw asuntu sa pagpalna-u ni Jisus kanilan, to-o pa madég ya nyangintu-u kanan. 42 Aw miglong silan adti ka͡ubayan, "Nyangintu-u la kami adun kanan bekeꞌ oloꞌ na asuntu sa piglong mu kanami manang asuntu na kami la ya tengteng dyumengeg sa piglong nan. Aw kya-ede-an da nami na yan saba ya Magpaluwa-ay sa kadég na manga utaw!"

43 Pagkatigkas da na duwangallaw, migpadeleg si Jisus sa panaw nan pasinan adti Galiliya. 44 Na, idtu muna miglong si Jisus na diliꞌ pagbasa͡an ya propita dun ni kanan banwa. 45 Manang sa pagdateng da ni Jisus adti banwa na Galiliya, madég na Galiliyanen ya dyumawat kanan. Kay kyinitaꞌ da nilan ya pigpan-imoꞌ ni Jisus dun ni pista adti Jérusalim.

46 Aw lyumikuꞌ uman si Jisus adti Cana sakup na Galiliya na yan ya banwa na pig-imo-an nan sa milagru na ya tubig migbaluy bino. Na, adti Kapirna-um pag-eyaꞌ ya sambuk na pagsaligan na gubirnu, aw to-o kyatigda-an ya iseꞌ nan na eseg. 47 Pagdengeg nan na dyumateng si Jisus adti Galiliya lekat adti Judiya, nyadtu sakanan adti Cana aw nyanginayuꞌ na magad kanan si Jisus adti Kapirna-um aw guli-en nan ya iseꞌ na kamatayenen da. 48 Miglong si Jisus kanan, "Kun walaꞌ pa kamu kitaꞌ sa manga pangilala aw milagru na pig-imoꞌ ku, diliꞌ kamu mangintu-u kanak." 49 Manang miglong ya pagsaligan, "Kay Sir, agad kaw beg kanakeꞌ talana walaꞌ pa kamatay ya iseꞌ ku!" 50 Miglong si Jisus kanan, "Uliꞌ da kaw, kay kyaguli-an da ya iseꞌ mu!" Aw pigpangintu-uwan na pagsaligan ya piglong ni Jisus, aw nyaksay sakanan nyuliꞌ adti Kapirna-um. 51 Aw sa talana pa nan dun ni dalan, pigsungun da sakanan na manga sugu-anen nan aw piglongan nilan na kyaguli-an da ya iseꞌ nan. 52 Yanagaw pig-usip nan silan kun unu udasa ya pagpakaguliꞌ kanan. Aw tyumubag silan, "Kagabi ambung na manga ala una ya pag-uwas sa kapasu-an nan." 53 Aw kya-anenganengan na ama na iseꞌ na yan ya udas na miglong si Jisus kanan na "Kyaguli-an da ya iseꞌ mu!" Yanagaw ya pagsaligan aw ya kadég na ka-epedanan nan dun ni balay alag silan nyangintu-u kan Jisus. 54 Na, yeiy ya kadwa na milagru na pig-imoꞌ ni Jisus adti Galiliya pagkatigkas nan adti Judiya.