1 Sa paglabay da na pilangallaw, syumakay si Jisus sa balangay aw tyumalipag sa Danaw na Galiliya na pigngalanan uman na Danaw na Tibériyas. 2 Aw to-o madég ya manga utaw na dyumalug kan Jisus, kay kyinitaꞌ nilan ya manga milagru dun ni pagpangguliꞌ nan sa manga pyangkedelan. 3 Aw tyumukud si Jisus aw ya kanan manga umagakan adti kabuludan, aw nyingkud silan dun. 4 Na, agpet da ya pista na manga Judiyu na yan ya Pista na Paglabay na Anghil na Tyumanem. 5 Aw sa pagkitaꞌ ni Jisus sa madég to-o na manga utaw na migpasinan adti kanan, piglongan nan si Pilipi, "Ayin kitadun bayad sa makan pada makakan ya kadég na manga utaw ini?" 6 Na, maynan ya usip nan kay kaliman nan tanda-en ya pagpangintu-u ni Pilipi. Manang kya-ede-an ni Jisus kun unu ya un nan imo-un. 7 Aw tyumubag si Pilipi kanan, "Pangkay ya walumbulan na utaw talabahuwan, diliꞌ pa maka-umbaꞌ pagbayad sa makan na kadég na manga utaw ini, pangkay tagbiꞌ oloꞌ ya atag adti tagsambuksambuk kanilan." 8 Manang miglong ya inulug ni Simon Pédro na si Andrés na sambuk uman na umagakan ni Jisus, 9 "Awun iseꞌ asini na eseg na awun limallapid ya pan aw duwambulus ya isdaꞌ. Manang unun nan ya pagpaka-umbaꞌ sa kadég na manga utaw ini?" 10 Miglong si Jisus adti manga umagakan nan, "Pa-ingkuda mayu ya manga utaw." Dun ni banwa yan to-o madég ya sakati aw nyingkud silan dun. Na, ya kadég na manga eseg dun, manga limammalalan (5,000) silan.* 11 Pagkatigkas yan, pigkamang ni Jisus ya pan, aw pigpasalamatan nan adti Tyumanem, aw pyan-atped-atped adti kadég na nyan-ingkud dun. Aw maynan uman ya pig-imoꞌ nan sa manga isdaꞌ. Aw kyuman ya kadég nilan aw alag silan nyangkabiyag. 12 Pagkatigkas nilan kuman, miglong si Jisus adti manga umagakan nan, "Pan-imuna mayu ya nyangkasamaꞌ pada diliꞌ masapad." 13 Yanagaw pigpan-imun nilan ya kadég na nyasamaꞌ, aw sampuluꞌ tag duwa (12) ya be-en na dayaw nyangkatmuꞌ.Pig-imun na manga umagakan ni Jisus ya nyangkasamaꞌ na kakan.

14 Sa pagkitaꞌ na manga utaw sa milagru na pig-imoꞌ ni Jisus, miglong silan, "Yeiy saba ya Propita na pigtagadan tadun na un padala na Tyumanem asini tas na lupaꞌ!" 15 Aw kya-ede-an ni Jisus na kaliman nilan kamangen sakanan aw legesen imo-un hariꞌ. Yanagaw migpa-awat si Jisus kanilan aw tyumukud da uman adti kabuludan na oloꞌ nan sayda.

16 Na, sa pagkamagsiklep da, tyumubang ya manga umagakan ni Jisus pasinan adti ligad na danaw. 17 Manang pagkagabi la, walaꞌ pa dateng si Jisus, yanagaw syumakay silan sa balangay aw tyumalipag pasinan adti Kapirna-um. 18 Sa talana pa nilan adti danaw, dyumateng ya to-o mabandes na samet aw migbaled ya tubig. 19 Na, ya kawat na pigbegsayan da nilan sobla limangka kilomitro, aw kyinitaꞌ nilan si Jisus na nyanaw dun ni tas na tubig na migpasinan adti balangay. Aw to-o silan nyallek, 20 manang migtawag si Jisus kanilan, "Diliꞌ kamu magkallek! Aku saba ya ini!" 21 Aw migleya silan migpasakay kan Jisus dun ni tampid nilan aw maksay dyumateng ya balangay adti banwa na pigkadtuwan nilan.

22 Pagkasalut da na allaw, awun manga utaw na migpatagak adti dipag na danaw, aw kya-ede-an nilan na pigsakayan da na manga umagakan ni Jisus ya balangay na awun ni ligad na danaw. Aw kya-ede-an nilan uman na walaꞌ si Jisus paka-agad sa manga umagakan nan. 23 Walaꞌ kadugay, awun manga balangay lekat adti Tibériyas na nyakadanggay malapit adti pigpakanan ni Jisus sa madég na utaw sa pan na pigpasalamatan da nan adti Tyumanem. 24 Yanagaw sa pagka-edeꞌ da na manga utaw na walaꞌ da dun si Jisus aw ya manga umagakan nan, ya eped kanilan syumakay sa manga balangay aw syuminan adti Kapirna-um na un paninawun si Jisus.

25 Sa pagdateng nilan adti dipag, kyinitaꞌ nilan si Jisus, aw law nilan, "Kay Magpalna-uway, kanu kaw dateng asini?" 26 Aw tyumubag si Jisus kanilan, "Matinaw saba ya un ku paglongun kamayu: Pyaninaw aku mayu bekeꞌ na asuntu sa manga milagru na kyinitaꞌ mayu, manang asuntu saba sa pagpakan ku kamayu kagabi aw dayaw kamu nyangkabiyag. 27 Diliꞌ mayu oloꞌ pagtibagsegan ya pagkanen na maksay magkalat. Manang yan baling ya tibagsegi mayu ya palangad pagkanen na maka-atag sa ginawa na walaꞌ ya katigkasan. Aw aku na Iseꞌ na Utaw ya un matag adti kamayu. Kay pig-atag kanak na Tyumanem na Ama ya katulus mag-imoꞌ sa manga milagru yeiy na un magmatinaw kun singalan aku." 28 Yanagaw nyusip silan kanan, "Unu ya madyaw nami imo-un pada mabatug ya manga imo-unun na Tyumanem?" 29 Aw tyumubag si Jisus kanilan, "Ini ya umbaꞌ mayu imo-un pada mabatug ya manga imo-unun na Tyumanem: Pangintu-uwan mayu ya pigpadala nan." 30 Aw law nilan, "Unu ya pangilala na un mu kanami pakitaꞌ pada pangintu-uwan kaw nami? 31 Asini muna, talana na manga tyugbulan tadun miglegeblegeb adti kaligbinan, yan ya pigkan nilan ya pigngalanan na ‘mana.’ Yanagaw ini ya pigpasulat na Tyumanem: ‘Pig-atagan nan silan na pagkanen na lekat adti langit.’ "* 32 Aw tyumubag si Jisus kanilan, "Matinaw saba ya un ku paglongun kamayu: Bekeꞌ ni Moysis ya nyatag kanilan sa pagkanen na lekat adti tas na langit, manang yan saba ya nyatag kanilan ya Ama ku. Aw yan uman ya nyatag kamayu sa tengteng pagkanen na lekat adti tas na langit. 33 Kay ya pagkanen na lekat adti Tyumanem, yan ya nyanog lekat adti tas na langit aw gayed nyatag sa tengteng ginawa adti manga utaw."

34 Aw law nilan, "Kay Magpalna-uway, atagi kami gayed na pagkanen yeiy!" 35 Aw miglong si Jisus kanilan, "Aku saba ya pagkanen na nyatag sa tengteng ginawa. Pangkay singalan ya madi kanak, diliꞌ da sakanan magetem. Aw pangkay singalan ya mangintu-u kanak, diliꞌ da sakanan uman talaynemen. 36 Manang kasiling na piglong da ku kamayu idtu muna: Pangkay kyinitaꞌ da aku mayu, manang walaꞌ kamu pakalabet kun singalan aku, aw walaꞌ aku mayu pangintu-uwi. 37 Ya kadég na manga utaw na pig-atag kanak na Ama, un silan madi kanak, aw pangkay singalan ya madi kanak diliꞌ ku alilinan. 38 Kay nyanog aku lekat adti tas na langit na un imo-un ya pagkaliman na migpadala kanak, aw bekeꞌ na kanak pagkaliman. 39 Aw yan ya kanan pagkaliman na walaꞌ ya pangkay sambuk na malagak na manga pig-atag nan kanak. Manang adti kamoliyan na allaw matawun ku silan lekat adti nyangkamatay. 40 Kay ini saba ya pagkaliman na Ama ku: Ya kadég na nyaka-edeꞌ kun singalan ya Iseꞌ nan aw mangintu-u kanan, yan ya manga utaw na makatagtun sa ginawa na walaꞌ ya katigkasan aw matawun ku silan adti kamoliyan na allaw."

41 Na, migdiklamu ya manga eped na Judiyu sa piglong nan na "Aku ya pagkanen na nyanog lekat adti tas na langit." 42 Aw miglong silan, "Endaꞌ, si Jisus saba oloꞌ yeiy na iseꞌ ni José! Kya-ede-an tadun ya ama nan aw ya ina nan. Anangaꞌ sakanan makapaglong na nyanog kunu sakanan lekat adti tas na langit?" 43 Manang miglong si Jisus kanilan, "Diliꞌ kamu magdiklamu sa piglong ku. 44 Ya kanak Ama na awun ni tas na langit yan ya migpadala kanak asini. Yanagaw walaꞌ ya utaw na makakadi kanak kun diliꞌ sakanan paduludun na kanak Ama. Aw ya dyumalug kanak, matawun ku sakanan lekat adti nyangkamatay dun ni kamoliyan na allaw. 45 Awun pigsulat na propita asini muna: ‘Palna-uwan na Tyumanem ya kadég nilan.’ * Yanagaw ya kadég na migpakanyeg sa pigpasulat na Ama ku aw dyumalug sa piglong nan, silan ya dumulud kanak. 46 Bekeꞌ na kakawasan nan na awun kyumitaꞌ sa Ama. Walaꞌ saba ya utaw na kyumitaꞌ kanan. Yan oloꞌ ya kyumitaꞌ ya pigpadala na Tyumanem na lyumekat adti tampid nan.

47 "Matinaw ya un ku paglongun kamayu: Pangkay singalan ya nyangintu-u kanak, nyakatagtun da sa ginawa na walaꞌ ya katigkasan. 48 Aku ya pagkanen na nyatag sa tengteng ginawa. 49 Ya tyugbulan mayu asini muna, kyuman silan sa mana adti kaligbinan manang alag da silan nyangkamatay. 50 Manang pangkay singalan ya kuman sa pagkanen na lyumekat adti tas na langit, diliꞌ da sakanan pa-emel-emelen na Tyumanem na walaꞌ ya tyamanan. 51 Aku saba ya pagkanen na lyumekat adti tas na langit na matag sa tengteng ginawa. Pangkay singalan ya kuman seiy, makatagtun sakanan sa ginawa na walaꞌ ya katigkasan. Aw ya pagkanen na un ku atag pada sa manga utaw, yan ya kanaken lawas."

52 Sa pagdengeg na manga Judiyu sa piglong ni Jisus, migbilingbiling silan kun unu ya kakawasan na piglong nan, aw law nilan, "Unun na utaw yeiy ya pag-atag sa unud na lawas nan kanaten pada kanen tadun?" 53 Yanagaw miglong si Jisus kanilan, "Matinaw saba ya un ku paglongun kamayu: Kun diliꞌ kamu kuman sa unud na lawas na Iseꞌ na Utaw aw minem sa duguꞌ nan, walaꞌ adti kamayu ya tengteng ginawa. 54 Pangkay singalan ya kuman sa unud na lawas ku aw minem sa duguꞌ ku, yan ya utaw na makatagtun sa ginawa na walaꞌ ya katigkasan, aw matawun ku sakanan adti kamoliyan na allaw. 55 Kay ya kanaken unud, yan saba ya tengteng pagkanen, aw ya kanaken duguꞌ, yan saba ya tengteng inemenen. 56 Aw pangkay singalan ya kuman sa kanaken unud aw minem sa kanaken duguꞌ, nyakasambuk da sakanan kanaken, aw aku awun uman ni kanan. 57 Ya Ama na migpadala kanak, yan ya lyekatan sa tengteng ginawa. Aw asuntu kanan, awun ginawa ku. Yanagaw pangkay singalan ya kuman sa unud na lawas ku, matagtun nan uman ya tengteng ginawa magi kanak. 58 Ya tyugbulan mayu asini muna kyuman silan sa mana manang alag da silan nyangkamatay. Manang aku saba ya pagkanen na lyumekat adti tas na langit, aw pangkay singalan ya kuman sa pagkanen yeiy makatagtun sa ginawa na walaꞌ ya katigkasan." 59 Na, pigpalna-u ni Jisus ya kadég yeiy talana nan adti seled na sinagoga dun ni lunsud na Kapirna-um.

60 Madég ya manga utaw na gayed dyumalug kan Jisus. Sa pagdengeg nilan sa piglong nan, migpan-usip-usipay ya eped kanilan, law nilan, "To-o malug ya kanan pigpalna-u! Singalan ya utaw na makalabet seiy?" 61 Manang kya-ede-an ni Jisus ya piggumudgumud nilan, yanagaw pig-usip nan silan, "Unu, nyakapalumay sa ginawa mayu ya piglong ku? 62 Na, kun maynan, unu ya anenganeng mayu kun kita-en da aku mayu na Iseꞌ na Utaw na ma-engat adti tas na langit na piglekatan ku? 63 Ya Ispiritu Santo, yan ya nyatag sa ginawa na walaꞌ ya katigkasan, aw diliꞌ yeiy mabatug na utaw. Aw ya ubat-ubat ku na dyengeg mayu, yan ya magbagu kamayu magi sa Ispiritu Santo aw matag sa tengteng ginawa na walaꞌ ya katigkasan. 64 Manang awun manga eped kamayu na walaꞌ pangintu-u sa piglong ku." Maynan ya piglong ni Jisus kay kya-ede-an da nan dadan kun singalan ya walaꞌ pangintu-u kanan, aw kya-ede-an nan uman kun singalan ya un maglubid kanan. 65 Aw miglong pa uman si Jisus kanilan, "Yeiy ya du-an na miglong aku kamayu na walaꞌ ya utaw na makakadi kanak kun diliꞌ tumbay na kanak Ama."

66 Yanagaw lekat dun ni allaw yan, asuntu sa pigpalna-u ni Jisus, madég ya manga utaw na walaꞌ da dalug kanan. 67 Aw nyusip si Jisus adti sampuluꞌ tag duwa (12) ya umagakan nan, "Unu, kaliman mayu uman mayaw kanak?" 68 Aw tyumubag si Simon Pédro kanan, "Kay Matas na Pangulu, kun ayawan kaw nami, ayin da kami pasinan? Ikaw oloꞌ ya migpa-edeꞌ sa ubat-ubat na maka-atag sa tengteng ginawa na walaꞌ ya katigkasan. 69 Nyangintu-u la kami kanmu, aw kya-ede-an da nami na ikaw ya walaꞌ ya salaꞌ na pigpadala na Tyumanem na lekat adti tas na langit." 70 Pagkatigkas yan, miglong si Jisus kanilan, "Endaꞌ, kamu na sampuluꞌ tag duwa (12), aku ya nyamalliꞌ kamayu? Manang awun sambuk kamayu na piggagad ni Satanas!" 71 Na, yan ya pigpalabet nan si Judas Iskariyoti na iseꞌ ni Simon na taga Kariyot probinsiya na Judiya. Pangkay sambuk sakanan dun ni sampuluꞌ tag duwa (12) ya umagakan nan, manang sakanan ya un maglubid kan Jisus.