1 Talana ni Jisus aw manga umagakan nan nyanaw, migpadeleg sakanan miglong adti kanilan, "Aku ya tengteng na punu-an na balagen na paras, aw ya Ama ku, yan ya magsanggila-ay. 2 Ya kadég na sanga ku na walaꞌ pakabunga, utudun nan. Aw ya manga sanga na nyamunga, panalingsingan nan pada to-o pa mamunga. 3 Aw kamu, kyalinisan da magi sa palna-u ku na pigdawat da mayu. 4 Katingen kamu asini kanak kasiling uman na awun aku ni kamayu. Diliꞌ makabunga ya sanga kun walaꞌ dun ni punu-an. Maynan uman diliꞌ kamu makabunga kun diliꞌ kamu matingen asini kanak.

5 "Aku ya punu-an na balagen na paras, aw kamu ya manga sanga. Ya utaw na gayed nyatingen asini kanak aw aku uman awun ni kanan, yan ya utaw na to-o pa mamunga. Kay kun walaꞌ aku, walaꞌ ya mabatug mayu. 6 Manang ya utaw na walaꞌ katingen adi kanak, kasiling sakanan na sanga na pig-utud aw pig-agbel adti ligad aw magdang da. Aw tigkas yan, panimunun aw agbel adti atulun. 7 Manang kun matingen kamu adi kanak, aw kun kenneꞌ pa adti kamayu anenganeng ya pigpalna-u ku, na, pagsekat kamu sa pangkay unu ya kaliman mayu aw imo-un saba kamayu. 8 Aw magi sa pagpamunga mayu na to-o madég, madeyen ya Ama. Aw yeiy ya magmatinaw na kamu ya kanak manga umagakan. 9 Kasiling na pagginawa kanak na Ama, maynan uman ya pagginawa ku kamayu. Yanagaw katingen kamu dun ni kanak pagginawa. 10 Kun dalugun mayu ya kanak manga suguꞌ, tengteng na awun kamu ni kanak pagginawa, kasiling na dayaw ku pigtuman ya manga suguꞌ na Ama ku, aw gayed aku awun ni kanan pagginawa.

11 "Piglong ku yeiy adti kamayu pada ya kanak pagleya awun ni kamayu aw ya pagleya mayu dayaw malingeb. 12 Ini ya kanak suguꞌ: Paggaginawa͡ay kamu kasiling na pagginawa ku kamayu. 13 Kun awun utaw na mag-atag sa kanan pagka-utawun pangkay pa adti pagkamatay pada sa manga ubaybay nan, yan ya pagginawa na walaꞌ ya maka-unawa. 14 Kun imo-un mayu ya pigsuguꞌ ku, kamu ya tengteng na ubaybay ku. 15 Diliꞌ da ta kamu tawagen na sugu-anen, kay ya sugu-anen diliꞌ maka-edeꞌ sa imo-unun na amu nan. Manang pigtawag da ta kamu na kanak tengteng manga ubaybay, kay pigpa-edeꞌ ku kamayu ya kadég na piglong na kanak Ama. 16 Bekeꞌ mayu ya nyamalliꞌ kanak. Aku saba ya nyamalliꞌ kamayu. Aw pigtani ta kamu na un magpa-edeꞌ sa palna-u ku adti manga utaw pada mangintu-u silan, aw yeiy ya palangad bunga mayu na diliꞌ magkalat. Aw yanagaw pangkay unu ya sekaten mayu adti Ama magi sa kanak ngalan, atag nan kamayu. 17 Ini ya kanak suguꞌ kamayu: Gayed kamu paggaginawa͡ay."

18 Miglong pa uman si Jisus, "Kun dumutan kamu na madég na manga utaw asuntu kanak, anenganenga mayu na aku ya muna nilan pigdumutan. 19 Kun kenneꞌ pa mayu nyaka-akup sa manga utaw na walaꞌ pangintu-u, ginawa͡an kamu galu nilan. Manang asuntu na pigpamalliꞌ da ta kamu, walaꞌ da kamu paka-akup dun ni kanilan. Yanagaw yan ya du-an na pigdumutan kamu nilan. 20 Anenganenga mayu ya piglong da ku kamayu: Walaꞌ ya sugu-anen na matas pa sa amu nan. Kun pigpamulayaman aku nilan, kamu uman pamulayaman nilan. Kun pigdalug nilan ya palna-u ku, dalugun uman nilan ya palna-u mayu. 21 Manang ya du-an na pamulayaman kamu nilan, kay nyangintu-u kamu kanak, aw walaꞌ nilan ka-ede-i ya migpadala kanak. 22 Kun walaꞌ aku kadi asini tas na lupaꞌ aw pagpalna-u kanilan, walaꞌ galu ya tubagenen nilan. Manang adun, diliꞌ da silan makapaglong na walaꞌ ya salaꞌ nilan. 23 Pangkay singalan ya migdumut kanak, pigdumutan nan uman ya Ama ku. 24 Kun walaꞌ ya pigpan-imoꞌ ku dun ni kanilan na milagru na diliꞌ mabatug na eped, diliꞌ galu silan pasala-en. Manang kyinitaꞌ da nilan ya manga pig-imoꞌ ku, aw pigdumutan aku baling nilan aw ya kanak Ama. 25 Aw adti pig-imoꞌ nilan, nyatuman da ya nyakasulat adti kanilan Uldin: ‘Pigdumutan aku nilan na walaꞌ ya indeganan.’*

26 "Manang padala ku kamayu ya mag-apitay na yan ya Ispiritu Santo na lekat adti Ama. Aw yan ya magpalna-u kamayu sa tengteng matinaw. Lekat sakanan adti Ama, aw yan ya magmatinaw kun singalan aku. 27 Aw kamu uman ya magmatinaw kun singalan aku, kay nyaka-iyeped kamu saba kanak lekat pa adti pagpalekat ku migpalna-u.