1 Sa walaꞌ pa dateng ya Pista na Paglabay na Anghil na Tyumanem, nya-edeꞌ si Jisus na malapit da ya allaw na pag-indeg nan asini tas na lupaꞌ aw ya paglikuꞌ nan adti tampid na Ama. To-o nan pigginawa͡an ya kanan manga umagakan aw pigpakitaꞌ nan kanilan ya kanan pagginawa na walaꞌ ya tyamanan.

2 Pagkagabi yan, nyangiyambung si Jisus aw ya kanan manga umagakan. Na, pigbetang dadan ni Satanas adti anenganeng ni Judas Iskariyoti na iseꞌ ni Simon na lubidan nan Jisus. 3 Nya-edeꞌ si Jisus na pig-atag da na Ama kanan ya katundanan sa kadég. Nya-edeꞌ uman na lekat sakanan adti Tyumanem aw un lumikuꞌ adti Tyumanem. 4 Yanagaw, talana nilan nyangiyambung, nyindeg si Jisus aw pigluwas nan ya sa-ul nan na malawig aw kyumamang sa dakulaꞌ na tuwalya aw pangawakan nan. 5 Pagkatigkas yan, kyumamang si Jisus sa palanggana aw pigseledan nan na tubig. Aw pigpalekat nan ya pag-ugas sa manga siki na tagsambuksambuk na umagakan nan aw piggalisan nan uman na tuwalya na pigpangawak nan. 6 Aw sa pagdateng nan adti kan Simon Pédro, miglong si Pédro, "Kay Magpalna-uway, unu, ikaw ya mag-ugas sa manga siki ku?" 7 Aw tyumubag si Jisus kanan, "Adun, diliꞌ pa mu yeiy kalabetan ya pig-imoꞌ ku. Manang diliꞌ madugay, kalabetan da mu." 8 Aw miglong si Pédro, "Kay Magpalna-uway, tengteng na diliꞌ aku malim na ugasan mu ya kanak siki!" Manang miglong si Jisus kanan, "Kun diliꞌ kaw magpa-ugas kanakeꞌ sa manga siki mu, bekeꞌ kaw na umagakan ku." 9 Aw miglong si Simon Pédro, "Kun maynan, kay Magpalna-uway, bekeꞌ oloꞌ na manga siki ku ya ugasan mu manang dala uman ya kanak manga tulluꞌ aw ulu ku!" 10 Manang miglong si Jisus kanan, "Ya utaw na migsugbu la, diliꞌ da ka-ilangan mag-ugas, kay malinis da ya kadakulaꞌ na lawas nan. Yan oloꞌ ya ugasan ya manga siki nan. Aw dayaw da kamu migkalinis asuntu sa pagpangintu-u mayu kanak, manang bekeꞌ na kadég mayu." 11 Maynan ya piglong ni Jisus asuntu na kya-ede-an da nan kun singalan ya un maglubid kanan.

12 Pagkatigkas da ni Jisus ugasan ya manga siki nilan, pigsut da nan uman ya kanan sa-ul aw lyumikuꞌ sakanan adti lamisa. Aw pig-usip nan silan, "Unu, kyalabetan mayu ya kakawasan na pig-imoꞌ ku kamayu? 13 Pigbasa͡an aku mayu dun ni pagtawag mayu kanak na ‘Magpalna-uway’ aw ‘Matas na Pangulu.’ Aw umbaꞌ ya pagtawag mayu kanak. 14 Kun aku ya kamayu Matas na Pangulu aw Magpalna-uway na mig-ugas sa manga siki mayu, kamu uman ka-ilangan mag-ugas-ugasay sa manga siki mayu. 15 Pig-imoꞌ ku yeiy pada imo-un mayu pundinganan. Yanagaw magpadalem kamu kasiling na sugu-anen, kasiling na pig-imoꞌ ku kamayu. 16 Matinaw ya un ku paglongun kamayu: Walaꞌ ya sugu-anen na matas pa sa amu nan. Aw walaꞌ ya pigsuguꞌ na matas pa sa migsuguꞌ kanan. 17 Na, asuntu na kya-ede-an da mayu yeiy, kun imo-un mayu, madyaw ya kamayu.

18 "Manang bekeꞌ na kadég mayu ya pigpalabet ku. Kya-ede-an ku ya anenganeng na tagsambuksambuk na kanak manga pigpamalliꞌ. Aw matuman ya pigpasulat na Tyumanem asini muna na maglong, ‘Ya ubaybay ku na syumambuk kanak kyuman, yan pa baling ya miglubid kanak.’* 19 Pig-ubat ku yeiy dadan kamayu talana walaꞌ pa ka-imoꞌ, pada kun ma-imoꞌ da yeiy, ka-ede-an mayu na aku ya Misiyas. 20 Matinaw ya un ku paglongun kamayu: Pangkay singalan ya dumawat sa utaw na pigsuguꞌ ku, dun da aku nan uman dawata. Aw kun singalan ya dumawat kanak, dun da nan uman dawata ya Ama na migpadala kanak."

21 Pagkatigkas ni Jisus maglong seiy, to-o nyasagunut ya anenganeng nan, aw miglong sakanan, "Matinaw ya un ku paglongun kamayu: Awun sambuk kamayu na un maglubid kanak." 22 Aw migpan-inunuway ya manga umagakan nan kay to-o nyasagunut ya anenganeng nilan kun singalan kanilan ya pigpalabet nan. 23 Na, awun sambuk kanilan na pigginawa͡an ni Jisus na tyumangkil kanan.* 24 Aw pigpulingenan sakanan ni Simon Pédro na usipen nan si Jisus kun singalan ya pigpalabet nan. 25 Yanagaw ya umagakan na tyumangkil kanan, nyangunsalig dun ni aba ni Jisus aw pig-usip nan sakanan, "Kay Magpalna-uway, singalan ya utaw yan?" 26 Tyumubag si Jisus, "Ya utaw na atagan ku sa pan na un ku tugmuk, yan ya maglubid kanak." Yanagaw kyumamang si Jisus sa pan aw pigtugmuk nan aw pig-atag nan kan Judas Iskariyoti na iseꞌ ni Simon. 27 Sa pagpakadawat da nan sa pan, syeledan sakanan ni Satanas. Aw miglong si Jisus kan Judas, "Maksay da imo-a ya awun ni anenganeng mu." 28 Na, walaꞌ ya pangkay sambuk dun ni lamisa na nya-edeꞌ kun unu ya du-an na piglong yeiy ni Jisus kan Judas. 29 Iman na eped aw pigsuguꞌ nan si Judas na un mayad sa makan pada sa Pista, aw kun bekeꞌ yan, matag adti manga utaw na walaꞌ ya pagkamangan. Kay si Judas yan ya pigtaliguwan sa kuwalta. 30 Aw sa pagkatigkas da ni Judas kuman sa pan, nyaksay sakanan nyindeg aw lyumuwaꞌ, aw gabi la.

31 Sa adtu la si Judas ni luwaꞌ, miglong si Jisus, "Dyumateng da ya udas na pakitaꞌ da ya kadyaw na Iseꞌ na Utaw, aw magi sa un ma-imoꞌ kanak ka-ede-an na manga utaw ya kadyaw na Tyumanem. 32 Aw asuntu na ka-ede-an da nilan ya kadyaw na Tyumanem magi kanak, pakitaꞌ uman na Tyumanem ya kadyaw na Iseꞌ nan. Aw un da nan imo-un. 33 Kamu na kanak palangad mangayseꞌ, dakman tagbiꞌ ya manga udas na pag-iyagad tadun. Paninawun aku mayu. Manang paglongun ku adun salut ya piglong da ku adti magdadumala͡ay tadun: ‘Diliꞌ kamu makakadtu ni kanaken kadtuwan.’ 34 Awun bagu na suguꞌ na un ku atag kamayu: Paggaginawa͡ay kamu. Kasiling saba na pagginawa ku kamayu, maynan uman maggaginawa͡ay ya kadég mayu. 35 Kay kun maggaginawa͡ay kamu, ka-ede-an na kadég na manga utaw na kamu ya kanaken manga umagakan."

36 Pagkatigkas yan, nyusip si Simon Pédro kan Jisus, "Kay Magpalna-uway, ayin kaw kadtu?" Aw tyumubag si Jisus kanan, "Diliꞌ pa kaw maka-agad kanak adti un ku kadtuwan, manang kagaya adti kamoliyan makadalug da kaw adtu." 37 Aw miglong si Pédro kanan, "Kay Magpalna-uway, anangaꞌ diliꞌ aku maka-agad kanmu adun? Atag ku ya kanak pagka-utawun pangkay pa adti pagkamatay asuntu kanmu!" 38 Aw tyumubag si Jisus kanan, "Unu, tengteng na atag mu ya kanmu pagka-utawun asuntu kanak? Matinaw ya un ku paglongun kanmu: Sa diliꞌ pa tumaga-uk ya manuk, balyaw aku mu na makatlu."