Exemplos de oração na Bíblia que mudaram histórias

10 Yik' gyotxhan-gyotxhan Xannee Rəbbis hülöörəxə düə haa’a vuxha. 11 Məng’ee Rəbbis miz k’yav’u, inəxüd cuvab hele:

– Xəəna G’oşunbışda Rəbb, Vak’lecab Yiğne bendelqa abına ver g’oocena. Vasse, zı Yiğna bende yik’el hidirxınee, zas sa dix huvee, zınar mana gırgıne gahbışis Vas heles. Mana Rəbbis g’assırva, mang’una vuk’ul mısacab gyapxhas deş.

12 Xannee Rəbbis xıliyna düə haa’a vuxha, Eliyir gyu’ur məng’ı’ne ghaliqa ilyakka ıxha. 13 Xannee yik’eençe düə haa’ava, məng’ı’n saccu ghalycad ı’ğiykar eyxhe, ses g’iyxhe eyxhe deş. Eliysqa məxı’d qayle, məng’ee ulyodğuniyxan vod. 14 Mançil-allad mang’vee eyhen:

– Ğu mısılqameene ulyoğas? Mançıkana g’alepçe, valqa qeera!

15 Xannee eyhen:

– Yizda xərna, yizın yik' gyotxhan ıxhayke, zı Rəbbis yizın yik' q’əra qa’a. Zı çaxıriy p’iyva deş ulyodğu. 16 Vasqa məxüd qımaylecen, zı abır deşda zəiyfaniyxan. Zalqa xəbna ver abıva, yizın yik' gyotxhanva, zı düə məxı’b hav’u.

17 Eliyee alidghıniy qele:

– Yugna yəq vuxhena. İzrailyne Allahee, ğu heqqıyn vas helesın.

18 Xannee: «Ğu zaqa, yiğne bendeyqa, yugra eyxheva» uvhu, sark’ıl cene yəqqı’n ark’ın kar oyxhan. Mançile qiyğa məng’ee aq’va qa’a deş.

19 Qinne yiğıl manbı miç’eeb çakba oza qeepxha, Rəbbis ı’bəədat hı’ı Ramayeene, cone xaaqa, siviyk’al. Elkana cune xhunaşşeyka Xannayka g’ılexha, Rəbbeeyid məng’ı’s ıkkanan ha’an. 20 Sabara gah ılğevç’uyle qiyğa Xanna vuxhne ayxu sa dix uxooxa. Məng’ee «Mana Rəbbike heqqıva» uvhu, mang’un do Şamuel (Allahık’le g’ayxhı) giyxhe.

G’urax ç’əvexhen

41 İlyasee Axavık’le eyhen:

– İt’umne gyoğiyn sesıd qöö, mançil-alla hoora otxhun-ulyoğe.

42 Axav ayk’anna otxhun-ulyoğas. İlyasır Karmelyne suvayne q’omaqa ılqeç’e. Mana maa q’aratsabışilqa gyu’ur, vuk’ulyub g’elybışisqa giviyxhe. 43 Qiyğa cune nukarık’le eyhen:

– Həşde hark’ın yugra deryahne suralqa ilekke.

Nukar hark’ın ilyakkı eyhen:

– Vuççud deşod.

Məxür İlyasee mana yighne yəqqees ilyakkas g’ıxele. 44 Yighır’es hark’ınmee nukaree eyhen:

– Haaşe deryaheençe xhaxheeqa ooharasda sa k’ınna buludıb ı’lqəə.

İlyasee eyhen:

– Hark’ın Axavık’le eyhe, gyooğeeqa gixhasse balkanık daşk’a qı’ı giç’ecen. Deşxheene, əlyhəəs əxəs deş.

45 Mane gahıl xəəqə k’arın buludbı sadayle, mıts qavayle, it’umın gyoğiy gyoğa giyğal. Axavır daşk’eeqa gyu’ur İzre’el eyhene şahareeqa ayk’an.

I’sayna Gat-Şemanne bağeena düə

36 I’sa manbışika Gat-Şeman eyhene cigeeqa qarı, telebabışik’le eyhen:

– Zı hark’ın düə haa’as, şu inyaa gyuv’re.

37 Mang’vee Cukasana Pyoturiy Zavdayna q’öyre dix ıkkekka. Mang’un yik' sacuraycad qa’a giyğal.

38 Manke I’see manbışik’le eyhen:

– Yizın yik' qik’asde xhineene uts’urun gyatsts’ı. İnyaa aaxve, Zakasana muğurba gyuv’re.

39 Mana sık’ırra şaqana ark’ın, aq’vakkena ç’iyelqa g’alirxhu, düə haa’a:

– Dek Yizda! Hasre eyxhexhee, Zı mane əq’übayne k’oleençe ulydyoğas! Zas ıkkan xhinne deş, hasre, saccu Vas ıkkanan xhinne ixhecen!

40 I’sa telebabışisqa sak’ımee, g’ecen manbı g’alyapk’ı vob. Mang’vee Pyoturulqa onu’u, eyhen:

– Nya’a şosse Zakasana sa sə’ətna xheeyib muğurba gyuv’aras dəəxə? 41 Qopkune yəqqı’le sivmiyk’alcenva muğurba avxu düəbı he’e. Rı’h it’umda, canme guc deşin vodun.

42 I’sa q’ör’es ark’ın meeb düə haa’a:

– Dek Yizda! Zas mane əq’übayne k’oleençe ulydyoğas dexhexheene, hasre Vas ıkkanan xhinne ixhecen.

43 I’sa sark’ıling’a, manbı meeb g’alyapk’ı g’ooce. Manbı geeb obzur vuxhayke uleppı aaqas əxə ıxha deş. 44 Mang’vee manbı g’alyav’u xhebır’es manacab düə ha’as ayk’an. 45 Qiyğa I’sa telebabışisqa sak’ı eyhen:

– Şu g’alyapk’ı manzilybıne ha’a? Haane, gah k’ane quvxha, İnsanna Dix bınahnanbışde xılyaqa qele. 46 Oza əlyhəəs. Haane, Zı merıng’une xılyaqa qelesda qöö vor.