1 Rəbbee Mısayk'le eyhen:

– Ğu Yizın cuvab Harunule, yiğne çoculeğana, fironulqa hixhar ha'as. Mana yiğna peyğambar xhinne ixhes. 2 Zı vak'le uvhiyn gırgın kar yiğne çocus Harunus yuşan he'e. Hasre mang'veeyid fironuk'le eyhecen İzrailybı Misirğançe g'avkeva. 3,4 Zı fironuke hı't'iy ha'as, mang'vee, Zı Misir geed əlaamatbıyiy həşdilqamee g'ıdecuyn karbı he'eeyid, şol k'ırı alixhxhes deş. Manke Zı Misirılqa xıl alivka'as, yı'q'ı'n əq'übabı g'axıles, Yizın millet, İzrailybı, g'oşunbı xhinne Misirğançe qığaa'as. 5 Zı xıl alivkav'u, İzrailybı manbışde yı'q'neençe qığav'umee, Misirbışik'le Zı Rəbb ıxhay ats'axhxhes!

6 Mıseeyiy Harunee Rəbbee nəxüdiy uvhu həməxüdıd ha'an. 7 Manbı fironuka yuşan ha'ang'a Mısayka molyts'al (80), Harunukad molyts'ale xhebılle (83) sen ıxha.

8 Rəbbee Mısayk'leyiy Harunuk'le eyhen:

9 – Fironee şok'le uvhiyng'a: «Əlaamat hagveva», Mısee Harunuk'le eyhecen: «Yiğın əsaa alyaat'u fironne ögilqa dağetç'e». Əsaa manke xoçelqa sak'alas.

10 Mısayiy Harun fironusqa abı, Rəbbee uvhiyn xhinne ha'a. Harunee cun əsaa fironneyiy cune insanaaşine ögilqa dağetçumee, man xoçelqa siyk'al. 11 Manke fironee k'oran ək'elynanbıyiy cadu ha'anbı cusqa qoot'al. Misirne cadu ha'anbışisse cadubışika man kar ha'as əxən. 12 Gırgıng'vee con əsaabı ç'iyelqa dağa'a. Dağı'iyn əsaabı xoçebışilqa siyk'al. Harunnemee əsaan gırgın əsaabı k'öğənbı. 13 Rəbbee uvhiyn eyxhe, firon hı't'iyra ıxha, mang'vee manbışil k'ırı iliyxhe deş.

14 Rəbbee Mısayk'le eyhen:

– Firon hı't'iyra vor, mang'us millet g'aykkas ıkkan deşod. 15 G'iyqa miç'eer firon damaysqa ı'qqəmee xoçelqa siyk'alan əsaayid alyaat'u ğu mang'usqa hak'ne. Mana Niline mıglek gozete'e. 16 G'acumee fironuk'le eyhe: «Rəbbee, cühüt'yaaşine Allahee in eyhesva zı vasqa g'axuvu: Cun millet g'aykke sahree Cus ı'bəədat he'ecen! Ğu həşdilqamee k'ırı alixhxhı deş. 17 Rəbbevud eyhe: Həşde vak'le ats'axhxhesın Mana Rəbb ıxhay. Yizde xılene əsaaka zı Niline xhyanıs ı'xı'mee xhyan ebalqa sak'alas. 18 Nileedın baluğ ar hatt'asınbı, əq'ı'yn eva qales, misirğançenbışisse mançe xhyan ulyoğas əxəs deş».

19 Rəbbee meed Mısayk'le eyhen:

– Harunuk'le inəxüd eyhe: əsaa alyaat'u, xıl Misirne damabışilqa, arxbışilqa, g'oleeşilqa, gırgıne xhyan havacene cigabışilqa hotkecen. Maadın gırgın xhyan ebalqa sak'alas. Q'uvayned, g'ayeyned g'abbışee gırgınəəng'ə Misir eb vuxhes.

20 Mıseeyiy Harunee gırgın Rəbbee cok'le uvhiyn xhinne ha'a. Harunee fironneyiy cune insanaaşine ögil əsaa ooqa qı'ı Nileene xhines ı'xı'mee, gırgın xhyan ebalqa siyk'al. 21 Nileedın baluğar haat'anbı, mançe məxdun əq'ı'yn eva g'əə giyğal, Misirbışisse mançe xhyan ulyoğas əxə deş. Misir gırgınəəng'ə eb vuxha. 22 Misirne cadu ha'anbışissed caduyka man kar ha'as əxən. Firon hı't'iyra ıxha, Rəbbee uvhiyn xhinne, mang'vee Mısaylil Harunul k'ırı iliyxhe deş. 23 Fironee man yik'eeqa ıkkeka deş, sark'ıl cune sareeqa ayk'an. 24 Misirbışe Niline hiqiy-alla kahrızbı iliyk'ar ulyoğasın xhyan t'abal ha'a. Manbışisse dameençe ulyoğas əxə deş. 25 Rəbbee damalqa ver ablyav'uyn yighılle yiğ eyxhe.