Êxodo 5

Mısayiy Harun fironusqa abayle

1 Mançile qiyğa Mısayiy Harun fironusqa abı, eyhen:

– İzrailyne Allahee, Rəbbee, inəxüdud eyhe: «Yizın millet g’aykke Zas sahree bayram he’ecen!»

2 Fironee eyhen:

– Rəbb vuşune vor, zı mang’ul k’ırı alixhxhı İzrailybı g’avkvas? Zak’le Rəbbir ats’a deş, İzrailybıb g’ooka deş.

3 Manbışe eyhen:

– Şas cühüt’yaaşina Allah gyagu. Şi g’avkke, inçe xhebne yiğna yəq apk’ın sahree, yişde Allahıs, Rəbbis, q’urbanbı allya’as, Mang’vee şalqa yı’q’ı’n ık’arbı g’ıxmelecen, gılıncıka gimabat’acen.

4 Misirne paççahee manbışik’le eyhen:

– Mısayiy Harun, nya’a şu millet işike ha’a? Hudoora, vuşda iş g’avce! 5 Həşdiylee millet geed qıxha, şosmee manbışe iş hidyav’u vukkan.

6 Mane yiğılycab fironee milletne vuk’lel ulyobzurinbışik’leyiy iş haa’as ulyokanbışik’le eyhen:

7 – G’iyniyle şaqa mane milletıs karpıç ha’asın balybiy himele, havaasre hapk’ın cocad se’ecen. 8 Karpıçıd manbışike şene ögilinmencad qeqqe. K’ıl qıma’a. Manbı tanbalar vuxhal-alla ts’irbı ha’a: «Hapk’ın yişde Allahıs q’urbanbı alya’as». 9 Manbışda iş hexxee’e iş hee’ecen, horbışil k’ırı ilymiyxhecen.

İzrailybışin dağamiyvallabı geed qeedaxhe

10 Milletne vuk’lel ulyobzurinbıyiy, iş haa’as ulyookanbı g’aqa qığeepç’ı İzrailybışik’le eyhen:

– Fironee inva vod eyhe: «Zı şos balybiy heles deş. 11 Havak’ne balybiy şos nençeyiy ıkkan se’e. İşib vuşda k’ıl qaa’as deş».

12 Millet Misirvolle ehekkı gidyotxuyn balybiy sa’a eyxhe. 13 Vuk’lel ooab ulyozrav’uynbışe manbı iş haa’as ulyooka eyhenniy:

– Şi şenke şos balybiy heleng’ameena iş hee’e.

14 Vuk’lelqa gyuvxhuyne İzrailybışkene ç’ak’ınbışike, fironne insanaaşe gyoota-gyoota qiyghan ıxha:

– Nya’a şu sanıxhayiy g’iyna şene ögilinmeen karpıç hıdi’ı?

15 İzrailybışiken ç’ak’ınbı fironusqa abı gyaaşenbı:

– Nya’a ğu yiğne g’ulaşilqa ina ver ooxa? 16 Balybiy yiğne nukaraaşis hele deş, karpıçmee ha’as ilekkan. İlekke yiğın nukarar nəxübiy gyoota! Bınah yiğne milletıl vob.

17 Fironee eyhen:

– Şos işcab haa’as devkan! Mançil-allad şu eyhen: «Şi hapk’ın Rəbbis q’urban ablyaa’as». 18 Hudoora işlemişepxhe. Şos balybiy heles deş, şumee ögilinmeen karpıç ha’asıncad.

19 İzrailybışiken ç’ak’ınbışik’le «Yiğısiysın karpıç k’ıl qıma’ava» g’ayxhımee manbışis hayexhen, co dağamiyvaleeqa gyapk’ıva. 20 Fironusse qığeepç’ımee manbışik’le Mısayiy Harun g’avcu, 21 eyhen:

– Hasre Rəbbik’le şu hucooyiy hı’ıva g’acecen, şosda cazaa g’ats’ak’vnecen. Şu şi fironusiy cune insanaaşis g’umooce qav’u. Şi gyapt’ecenva, şucad vuşde xıleqa manbışisqa gılınc huvu.

22 Mısee Rəbbilqa aq’va aqqı eyhen:

– Xudaavanda, nya’a Ğu milletılqa ina balyaa ablyav’u? Nişil-allane Ğu zı g’axuvu? 23 Yiğne doyule fironusqa hark’ınne yiğıle, mana milletıka sık’ırar yugra dexhe giyğal. Ğumee vuççud hı’ı deş, Yiğın millet g’attixhan ha’asdemee.