Allahee g’attivxhan ha’as cuvab hele
1 Manke Rəbbee Mısayk’le eyhen:
– Həşde vak’le g’acesın, Zı hucooyiy fironuk ha’a. Yizde xənne gucune ögil, mang’vee manbı g’avkasınbıb, saccu cune ölkeençe hudooracenva vuk’lele haa’as.
2 Qiyğa Allahee Mısayk’le eyhen:
– Zı Rəbb vorna. 3 Zı İbrıhımıs, I’saq’ıs, Yaaq’ubıs Gırgın Əxəna Allah xhinne gyagu, Zıcar Zı manbışis YAHVE6:3 YAHVE: Cühüt’yaaşine mizel in do «Vuc vornava» cuvabık akar. xhinne qıvats’ı’ı deş. 4 Zı manbışika mugaavileniy hav’u, co menne cigaynbı xhinne aaxvan Kana’anğançenbışin cigabı cos helesva. 5 Zak’le İzrailybışe, Misirbışde xılençe ts’ıts’a’an uts’ur ats’an. Zasse şenbışika hav’una mugaavile yik’el hipxın deş. 6 Mançil-alla İzrailybışik’le eyhe: «Zı Rəbb vorna. Zı şole Misirbışda xamut g’avşesda. Zı Yizde xənne gucuka Misirbışis yı’q’na cazaa huvu, şu manbışde nukariyvalike g’attivxhan haa’asınbı. 7 Zı şoke Zasın millet ha’as, Zı vuşda Allah ixhes. Manke şok’le ats’axhxhesın, Zı şu Misireene əq’übeençe g’attivxhan hav’una vuşda Rəbb Allah vor. 8 Zı şu İbrıhımıs, I’saq’ıs, Yaaq’ubıs k’ın g’assır helesva uvhiyne cigabışeeqa quvkees. Man cigabı vuşunbı ixhes. Zı Rəbb vorna».
9 Mısee man uvhiynbı İzrailybışis yuşana’a. Manbı əq’übayn rı’hı’le g’av’uva, manbışe mang’ul k’ırı iliyxhe deş. 10 Manke Rəbbee Mısayk’le eyhen:
11 – Fironusqa, Misirne paççahısqa, hark’ın eyhe, İzrailybı cune ölkeençe g’avkecen.
12 Mısee Rəbbik’le eyhen:
– İzrailybışe zal k’ırı ilydiyxhe, fironee nəxüd zal k’ırı ilixheye? Zasse yugrar yuşana’as əxə deş.
13 Rəbb Mısaykayiy Harunuka yuşan hı’ı, manbı fironusqa Misirne paççahısqa g’uxoole, İzrailybı cune ölkeençe g’avkecenva.
Mısaynayiy Harunna nasıl
14 İzrailybışde nasılbışin ç’ak’ınbı inbı vob:
İzrailyne ts’erriyne dixen Ruvenın dixbı: Xanok, Pallu, Xetsroniy Karmi. İn xizanbı Ruvenıke g’adıynbı vod.
15 Şimonun dixbı: Yemuel, Yamin, Ohad, Yakin, Tsoxar. Sayir Kana’anğançene xhunaşşeykena dix Şaul. İn xizanbı Şimonıke g’adıynbı vod.
16 Xərıng’ule otçu k’ıning’ulqamene Leviyne dixbışin dobı: G’erşon, Qohat, Merari. Levee vəşşe xhebts’ale yighılle (137) sen ha’a.
17 G’erşonun dixbı: Livniyiy Şimey. Manbışqad xizanbı ıxha.
18 Qohatın dixbı: Amram, İtshar, Xevron, Uzziel. Qohatee vəşşe xhebts’ale xhebılle (133) sen ha’a.
19 Merariyn dixbı: Maxliyiy Muşi. İn xizanbı Leviyke g’adıynbı vod.
20 Amramee cuna mamasiy Yoxeved hee’e. Məng’ee Amramıs Haruniy Mısa vuxu. Amramee vəşşe xhebts’ale yighılle (137) sen ha’a.
21 İtsharın dixbı: Qorax, Nefeg, Zixri.
22 Uzzielin dixbı: Mişael, Eltsafan, Zıtri.
23 Harunee Amminadavna yiş Elişeeva hee’e. Mana Naxşonna yiçu yixha. Məng’ee Harunus Nadav, Avihu, Eliazar, İtamar vuxu.
24 Qoraxın dixbı: Assir, Elqana, Aviasaf. İnbı Qoraxın xizanbı.
25 Harunne dixee Eliazaree Putielyne yişbışda sa hee’e. Məng’ee Eleazarıs Pinxas uxu. Leviyne xizanbışin ç’ak’ınbı inbı vob.
26 İne nasılenbıniy vob Haruniy Mısa. Rəbbee manbışik’leniy uvhu, İzrailybı Misirğançe g’oşunbı xhinne qığee’ecenva.
27 Manbıniy fironuka Misirne paççahıka İzrailybı Misirğançe qığav’uyne hək’ee yuşan hav’u. İnəxbın insanar vuxha Mısayiy Harun.
Harun Mısayne cigee fironuka yuşan ha’a
28 Rəbb Mısayka Misir yuşana’ang’a 29 uvhiynniy:
– Zı Rəbb vorna! Zı vak’le uvhiyn gırgın kar fironuk’le, Misirne paççahık’le eyhe.
30 Mısee Rəbbik’le eyhen:
– Zasse yugrar yuşana’as əxə deş, nəxüdne fironee zal k’ırı alixhxhes?