Pão

*************************

11 Ana Yawe ere mogl, Moses yegl di togwa, 12 Israel yoba mudu ka kane kane digwa i prika. Ene na kana i pi ye yegl di tenatniwa, Ene we, min panan, ene taragl mie ta nebi, tagna kana bret nedre, dano erabuka. Ene nebi, ene na Yawe, ene Godno moglmedi pre pogl sinaiglmiwe di, Yawe yegl dume di to dugwa.

13 Ana Yawe yegl dugo, min paugo, kua mua mere kide u, Israel yoba sel yuguno kipaimara i, kau si meglko, tagna mogl makan magigl i waradarua erukwa. 14 Ade sugo, waradarua kugla dugo, taragl kruo ta makan mina waradarua erumara yogwa. Taragl i, kebra yei, ede yaudo kunabu ugla yomere yegl kunabu ugla yogwa. 15 Israel yoba taragl i kandre, ye okna kankrikwa pre yene kira pogl, I siragl ne? digwa. Ye yegl digo, Moses prisre, ye yegl di togwa, I bret ta yogwa. Yawe ene nenaiglmedi togwa.

*************************

31 Israel yoba ere mogl, taragl i kagie mana* we digwa. Mana i kugl mogo kebra mere yegl yedre, kruo yei, bisket brume nuglo wagle bekigwa dogon erumere yegl dogon erukwa.

32 Yegl digo, Jisas di ikne ede, yegl dugwa, Na ene ka kaima di teiga, bret heven ibo yei, ede atne ugwa i, ene prikwa, Moses ye kowano awano tomedi prikwa ba i ta manugwa. God yene togwa. Te, erme we, Na Nina bret ta ka kaima heven ibo yei, ede atne ugwa i, ene togwa. 33 God bret ene togwa i, heven ibo yei, ede atne udre, yoba mudu kor moraiglkwa tomiwe di, Jisas yegl dugwa.

34 Jisas ka yegl di kodugo, yoba ye di te, yegl digwa, Yagl Kade yo, ene bret i ege ege noro! digwa. 35 Yegl digo, Jisas aglke kor dugwa, Bret ta kor moraiglkwa togwa i, na moglka. Yoba ta na moglmara udre, na pre mediglbi, ye ege swara ta kidan goglkre, nigl goglkre, yegl eraiglmiwe dugwa.

48 I siragl pre bret ta yoba nedre, kor moraiglkwa i, na moglka. 49 Ene kowano awano dumo wau yomara wan meglkwa igne, ye bret ta mana we digwa i neigwa ba ye okuo geglkwa. 50 Yegl erikwa ba bret ta heven ibo yei, ede atne ume diga i, yoba bret i ta nenan, ye ta goglkrabuka. 51 Bret ta kor moglsre, heven ibo yei, ede atne ugwa i, na moglka. Yoba bret i nenan, ye aimadi kamin kor morabuka. Na bret we diga i, nana ogona nagna pre diga. Yoba uglo koglo koglo meglkwa i kor moraiglmedi, ogona nagna tenaluwe di, Jisas yegl dugwa.

4 Yegl dugwa ba Jisas di ikne ede te, yegl dugwa, God kamo mina yoba ta yegl boglkwa, Yoba bret keme i nedre, kor moglkraiglmiwa. Ye God kamo mudu swara swarade idre, kor kaima moraiglmiwe* di, yegl boglme dugwa.

19 Ana Jisas yegl didre, bret ta ake i mitna ede, God di wakai yei tedre, bret i ake buko dugwa. Ake buko di, ye duglo beglkwa yagl swara swarade nenaiglmedi tedre, yegl dugwa, Bret i, na nagna mere yegl yogwa. Na nagna ene kumapno pre tebo, ene okuo na goraglka i pre moramnedi ama bret yegl buko di neo di, Jisas yegl dugwa.

26 Ana ene akie bret ake buko di nedre, wain nuglo nedre, erikwa i, ene nono Yaglno Kade nono pre goglmiwe di, i nogugl edigwa. Ene aimadi yegl ere meglbi, Jisas okuo ede ikne unabuka.

16 Nono wain nuglo toide kap mina edidre, God di wakai yei tedre, nomga i, nono mudu Krais bormaimo mina atne munedi i nogugl edumga. Te, nono bret ake buko didre, nomga i, Krais ogo nagie nono akie pre bagla dumedi, i nogugl edumga. 17 Bret swara keme yogo, nono mudu bret swara i mina nomga pre nono yugobuno swara kaima munga i, nogugl paugwa.

9 Ene kamage eraiglkwa i, kamage yegl erio,

Neno Kade, ene heven ibo motnga i,

Ene kagn pere kaima padre, mina kaima panabedi prumga.

10 Te, ene king moratnga igne i tabre plau dinabedi prumniwa.

Ene pitnere keme heven ibo, plau dumere yegl,

No makandigle munara i, ama yegl keme panabedi prumga.

11 No kaya mokna ege swara swarade ta nenamnere mere noro.

37 Yegl digo, Jisas di ikne ede yegl dugwa, Enene kaya mokna nenaiglmere teo dugwa. Dugo, ye di ikne ede, Yoba yegl mere meglkwa i, mige silva 200 mere ta i pi bret topo sumun, kuno erabedi pitno? di, yegl digwa. 38 Yegl digo, Jisas yegl di prukwa, Ene bret siramna yeigwa yomada? Pi kanio! dugwa. Yegl dugo, ye pi kandre, ede ikne u Jisas yegl di teigwa, Bret 5-pela yogo, buglo bagle suo ama yomiwe digwa.

39 Ana Jisas ye duglo beglkwa yagl di te, Ene yoba mudu di tebi, kugl wakai bogl moglmara ame dinaiglmiwe dugwa. 40 Dugo, ye bage bage ame di meglkwa. Bage tau yoba 50 mere ki yegl makai si meglko, bage tau 100 mere ki yegl makai si meglko, pere pere meglkwa. 41 Ame di meglko, Jisas ye bret 5-pela ya buglo bagle suo ikra idre, kan heven ibo ede, God di wakai yei togwa. Di wakai yei tedre, bret ake buko didre, ye duglo beglkwa yoba i pi tenaiglmedi togwa. Tedre, ye buglo bagle suo ikra ama ake buko didre, yoba mudu yubu si togwa. 42 Yubu si togo, yoba mudu neigwa, dano eruko, 43 ye bret ya buglo bagle kawa te yogwa i, gade makai sidre, degigl gagl 12-pela gre kau sigwa.

Jisas Farisi yoba ya Sadyusi yoba yisno pre ka ebrie dugwa

5 Ana Jisas ye duglo beglkwa yagl bogl ede nigl koglo ibo eigo, duglo beglkwa yagl kanigwa i, bret ta yukrikwa paugwa. 6 Ana Jisas ye di te, Farisi yoba ya Sadyusi yoba yisno i pre ene kan kun erio! dugwa. 7 Jisas yegl dugo, ye duglo beglkwa yagl wagle prikwa i, No bret ikrumga i pre dumedi drano digwa. 8 Ye yegl digo, Jisas pre kan ere, yegl dugwa, Siragl pre ene bret yukrikwa i pre ka drano dime? Ene na pre mediglkwa i, kebra paugwa paugwa. 9 Na bret 5-pela ake buko didre, yagl 5,000 teigo, bret yoko yomara i mina ene degigl gagl siramna mere gre kau sigwa i, ene pre meglmo mo pre moglkrime? 10 Ama yoba 4,000 kuno yegl mere ersre, bret 7-pela mina teigo, kawa togwa degigl gagl kade siramna girikwa ene pre meglmo mo pre moglkrime? 11 Na bret pre dikrika ba siragl eruko, ene pre pogl sikrime? Na Farisi yoba ya Sadyusi yoba yisno i pre ene kan kun erio diwe di, Jisas yegl dugwa. 12 Jisas yegl dugo, ye duglo beglkwa yagl yis yoko, yoba bret mina edigwa i pre dikrukwa ba Farisi yoba ya Sadyusi yoba ye ka siragl mere yoba beke teigwa i pre dumedi pre pogl sigwa.