1 Ana Yawe Ninive ere kide erekrukwa i, Jona kide prisre, dem kubrukwa. 2 Dem kubrisre, ye Yawe kamage ere te, yegl dugwa, Yawe yo, na okna yugunamugl moglka igne, Yawe ye mitno goglsre, ere kide ere tekrabiwe diga. Na pre kan erika i, ene God yoba mitno goglsre, ye ere kide ere tenatnara aglke ere wakai ere tenga motnga. Ene den oglade kubrokre, den mudn ka kaima yoba tedre, ye ere kide ere tenatnga i kide kodinga. Mabuno i pre na teke ede dumo Tarsis we dimara enagledi eiga. 3 Yegl pre Yawe yo, na na si goglo! Na kor moraglka kide prika. Goraglka wakai priwe di, Jona yegl dugwa. 4 Jona ka yegl dugo, Yawe di ikne ede, yegl dugwa, Ene den kubutnga i, wakai pamo? dugwa.

5 Ana Jona ere mogl, dumo Ninive kide kodo, kuri ta ede ade umara kra pi, taun bina yugu teka ta sidre, bogume yomara atne ame dugwa. Ye siragl taragl dumo Ninive plau dinabuka i kanagledi atne ame di moglkwa. 6 Jona ame di moglko, ade dogwa pre Yawe God ere mogl, Jona ake ple dinagledi dr ta moginabedi ere edugo, mogo ede mitna pi, bogume togwa. Bogume togo, Jona dr i kandre, gun podo yogwa. 7 Gun podo yogwa ba tagugo i we, tagna kana, God kabo ta dr kane kigle keglu sinabedi ere edugo, kigle keglu sugwa. Kigle keglu sugo, dr kane ake yamunugo, goglkwa. 8 Yegl eruko, ade sugo, God ir niga dugwa ta ade umara mogl unabedi dedugo, ugwa. Ugo, Jona bre ade dedre, gumuglo magruko, ye goragledi prisre, yegl dugwa, Na goraglka, wakai prika. Kor moraglka, kide prie di, yegl dugwa.

9 Jona ka yegl dugo, God ere mogl, Jona yegl di prukwa, Dr goglkwa i pre ene den kubutnga i, wakai pamo? dugwa. Yegl dugo, Jona di ikne ede, yegl dugwa, Na mabuno pamara dena kubrika. Na dena kubrisre, goraglka, kuno erumiwe dugwa. 10 Yegl dugo, Yawe aglke kor dugwa, Dr i, ege swara mina pare yaudo sidre, ege swara mina goglkwa. Te, ene kogon etngo, ta pare yaudo sikrukwa. Yegl erukwa ba ene dr mirie goglnga. 11 Ana Ninive yoba we, na ye mitno goglkraglo? Ninive dumo podo yogwa. Yoba Ninive moglsre, mabuno wakai ya mabuno kide pre pogl sikrikwa i, 120,000 mogl ede mitna eigo, agl bugla ama mere kide meglkwa. I pre na mitno goglkrabedi pitno? di, Yawe yegl dugwa.