1 Ana buglo bagle Jona mebigl si meda makan mina edugo, Yawe aglke kor Jona di te, yegl dugwa, 2 Ene ede pi dumo podo Ninive we dimara pidre, na ka siragl mere ta ene di tenaglka i, Ninive yoba di tenatniwe di, yegl dugwa. 3 Yegl dugo, Jona ye dumere ede dumo Ninive ogwa. Ana Ninive we, dumo podo kide yogwa. Yoba ta dumo mudu kanabuka i, ege suota wan winabo di mogl, kanabuka. 4 Ana Jona ede dumo Ninive pi plau didre, ege swara ta konbauna wan ede suna pi, Ninive yoba agle didre, yegl di togwa, Yawe ege 40-pela de mogl, Nineve ere kide ere kodinabiwe di, yegl dugwa. 5 Yegl dugo, Ninive yoba God kamo i pre mediglsre, ye yoba kade meglkwa ya yoko meglkwa i mudu tadaglme eunedi prikwa i, i nogugl edinamnedi kaya mokna mawagl ersre, lap gagle yaglkwa prikwa.

6 Ana Ninive yoba yegl eriko, Ninive king we, ye Jona kamo prukwa igne ye siamo king kide kodo, gagl suna olto edugwa i, gugl ede, lap gagle yaglkwa prisre, ye yugum pere edimara bolamugl ame di moglkwa. 7 Ame di moglko, ye yobamo kade bogl ka di padiglsre, yoba tau Ninive yoba di tenaiglmedi dedigo, ye pi, yoba mudu yegl di teigwa, Nono kingno yobamo kade bogl we, yegl digwa, Ninive yoba ya te, ye kau ya meme ya sipsip kiglkwa i ya te, aglno buglano mudu kaya mokna mawagl ere, nigl pra ta nekraiglkwa. 8 Nekribi, yoba mudu lap gagle yaglkwa prisre, aglno buglano ama lap gagle yaglkwa were tedre, eraiglkwa. Te, ene mudu God agle didre, kamage giglede ere teo! Ene mabuno kide erikwa i kide kodo, kuda beglkwa i ama kide kodo, yegl erio! 9 Nono yegl eun, God no sinabo mo no sikrabo mo i ta kiurumga. God nono mitno ta goglsre, dem kubrukwa kide kodinan, nono ta goglkramniwe di, king yaglmo kade bogl yegl dime digwa.

10 Ana ka yegl digo, Ninive yoba ye mabunono kide beglkwa i, kide kodigo, God kanugwa. God kandre, ye ere kide ere tenagle dugwa i, kide kodidre, erekrukwa.