1 Jona buglo bagle dane wagle pai moglsre, Yawe, ye Godmo moglkwa i, kamage ere togwa. 2 Ye yegl dugwa, Yawe yo, na yubun podo idre, na ene agle digo, ene na ake ple di natnga. Na ede atne kaima pi, yoba geglkwa pai meglmara mere yegl eiga ba ene na agle diga i prisre, na ake ple di natnga. 3 Ene ere mogl, yoba na pia si nigl atne edinaiglmedi etnga. Erse, ene ama nigl si pepigl di, na i yobugl suna edidre, na i atne edenabedi etnga. Etngo, na nigl atne kaima eiga. 4 Na nigl atne kaima pi, nomana wagle ene yegl di teiga, Ene ere mogl, na ene motnara si pi eglke edinga. Edinga ba na aglke kor yugunen i pere edinga yomara i kan enagle diga. 5 Na nigl atne kaima pidre, goraglka magigl erukwa. Mudi nigl na i atne edugo, nigle kugl kan na bitna yobuglkwa. 6 Na ede atne eiga i, makan muglo yei, ede nigl atne ime eimara mabunomugl pidre, dumo ta aimadi panaglka mere yegl moglka. Na yoba geglkwa pai meglmara mere yegl moglka ba Yawe, ene na Godna motnga i, ene na kor morabedi na i kor edidre, i ede egli uniwe di, yegl dugwa.

7 Jona ka yegl didre, ka ta ama yegl dugwa, Yawe yo, na goragledi ere, ene poglo di prisre, kamage ere teiga. Kamage ere teigo, na kana ede pi ene yugunen i pere edinga i yugugl motnara ogo, ene pitnga. 8 Yoba ere mogl, god kibi, kogon swara ta erekrikwa godno i, ye bekidre, kamage ere teigwa i, ene ye ere wakai ere tenatnga ba ye ta ikraiglkwa. 9 Ba na we, na ene wakai we di tenagledi giglage didre, ene tawa tenaglka. Na yegl eragledi ene ka giglede di te padiglka i, na dimere eragle dugwa. Ene swara yoba ere inga motniwe di, Jona yegl dugwa.

10 Ana Yawe we, ye ere mogl, buglo bagle i di togo, buglo bagle ede nigle bina pi, Jona mebigl si makan mina edugwa.