Pão

32 येशुले नकाङजन ऐआढोवाङ, "ङा जेजन मछ्यु ऐढाच्या, स्वर्गङन भरेई यांन्या मोशा माङडी," तर "जेजन स्वर्गङन मछ्युका भरेई यांन्या ङा बौ हो। 33 दानाङभन्या परमेस्वरलं भरेई नकाई ज्या, जो स्वर्गङन लांइस्यु रांया, ओटन सङ्सारजन जिबन योंवा।" 34 ओयाङै येशुजन ऐराढोव, "प्रभु, गेजन सदाई ईका भरेई यांसिन्ते।" 35 येशुले नकाङजन ऐआढोवाङ, "जिबनल भरेई ङाई ज्या। ङाल्योङ रांन्या करेन्या माल्दी ओटन ङाजन बिस्वास ढान्या खकै री ओइन्या माल्दी।

48 ङा जिबनल भरेई हो। 49 जे शाखापुर्खाङै हरहर ताइन्या पोल मन्न रांज्योव ओटन बै नकाङ सिस्यु हिन्वाङ। 50 तर स्वर्गङन लांइस्यु रांन्या भरेई आकाई ज्या, जोले कयौ ना मासिदी। 51 स्वर्गङन लांइस्युरांन्या जिङदा भरेई ङाईज ज्या। काङ्काङै आका भरेई कैदुराभन्या नकाङ सदाई बान्चिन्या लेरा। ओटन जो भरेई ङा सङ्सारला रुयाङल जिबनल नाल्ट योंङा, ना ङा बुल हो।"

4 तर येशुले जबाक आयोव, "सरसिन्या लेया, ‘रु भरेईले याएज माङडी, तर परमेस्वरलं याह्‌लन पलिईन्या सोगल बचनले जिङदा लिज्याया’।"✝

9 "तर जे ऐलेस्यु प्रार्थना ढोचिते,

‘औ, स्वर्गल लिज्यान्या गे बौ,

नमिन पबित्र ग्यामानिसित्या।

10 न राज्य ग्यारांत्या। नइच्छ्या स्वर्गल जोमनताइन्या ले, नामन्ज ईका पिरथ्बील पुरा ग्याताइत्या।

11 गेजन आछिम दिनभरिका गे जेए यासिन्ते।

37 तर येशुले जबाक आयोवाङ, "जेईज नकाङजन कोबाअ ज्यान्या योंचिरते।" नकाङै ओजन ऐराढोव "नैति गे हिनस्यु नें सय चान्दील ध्याअले* भरेई लाङस्यु नकाङजन ज्यान्या यांन्याङ?" 38 येशुले नकाङजन आढोवाङ, "जे सकाए ख्वाए गोटा भरेई लेऊ? हिनस्यु ब्याएचिते।" ओटन ब्याएबिई ढास्यु ऐलेवाङ, "पास गोटा भरेई सनर नेंलोअ ङा:स्या।"

39 ओटन येशुले सोगलैजन बाङला पिङन्या छील यर्ल बगाल बगाल ताइस्यु चुङन्या हुकुम आयोवाङ। 40 नकाङ सय-सय सनर पचास-पचासला बगाल ताइस्यु चुङवाङ। 41 येशुले ना पास गोटा भरेई सनर नेंलोअ ङा:स्या आहोनौ, ओटन नमदेए खिमस्यु धन्याबाद आयोव, ओटन ना भरेई कलाएस्यु आ सिइयाङ आयोवाङ, ओटन सिइयाङै नकाङजन राभाअस्योवाङ, ओटन ना नेंलोअ ङा:स्या बै राभाअस्योवाङ। 42 ओटन सोगलैले रांकयौ ओटन पटिपन्न ताइवाङ। 43 ओटन रांकयौ छिन्ङ आसिइयाङै रा:सयलन्या भरेईल कलाए सनर ख्वाए ङा:स्या बारं घोन फाङ रादुकौ।

सदुकीयाङ सनर फरिसीयाङ सोडा

5 येशु सिइयाङ सकाए दहल हुदिफन्ट राटापौक नकाङै भरेई होनन्या राम्योकौ रैस। 6 ओटन येशुले नकाङजन ऐआढोवाङ, "ध्यान ढोच्यो, फरिसीयाङ सनर सदुकीयाङल सोडातन होसियार ताइच्यो।"✝ 7 नकाङ रारांल छ्योङौ तअसिवाङ, "गे भरेई माहोन्दुया, नैताइस्यु ओले नैलिज्याऔ।" 8 येशुले ईका सनस्यु ऐआढोवाङ, "ऐ, अल्पबिस्वासीयाङ! गेसं भरेई माल्दी ऐलेस्यु दानाङ जे जेल छ्योङज्याच्यो? 9 नैति जे अझ बै जेमाबुजिचिऊ? ङा पास हजार रुयाङ नाल्ट पास गोटा भरेई ङाकलाटौक जे ख्वाए घोन जेदुउचिऊ जेजन यांका मालेऊ?✝ 10 ओटन चार हजार रुयाङल नाल्ट साट पाटा भरेई ङाकलाटौक, जे ख्वाए घोन जेदुउचिऊ?✝ 11 ङा जेसकाए भरेईल बारेल ङाछ्योङज्याङु माङडी ऐलेस्यु जे दानाङ माबुजिच्यो? जे फरिसी सनर सदुकीयाङल सोडातन होसियार ताइचिते।" 12 तब नकाङै सोडावाला भरेईल बारे माङडी रैस, नका ता फरिसी सनर सदुकीयाङ सिक्छ्यातन होसियार ताइच्यो ऐलेऊदी रैस लेस्यु राबुजिऊ।