1 ओलं छ दिन छिन्ट येशुले पत्रुस, याकूब सनर नकाल आभाई यहुन्नाजन ओलसं रांबाठए तोलोअ झेनन्या डान्डात आलाङवाङ।✝ 2 ओटन नकाङल हार्मै येशुल अनवार फिरिसिऊ ओटन आक्वा नमिउमन तरवर चम्किऊ, 3 ओटन येशु सकाए मोशा सनर एलिया नेंछ्योङज्यान्या रांरङौ। 4 पत्रुसले येशुजन ऐआढोव, "औ प्रभु, गे आल चुङन्या ठिक लेया। यदि न इच्छ्या लेकन ङा इल तिनगोटा चुङन्या छाप्रा जाएङा, तोलोअ न नाल्ट, तोलोअ मोशाल नाल्ट ओटन तोलोअ एलियाल नाल्ट।" 5 नका आछ्योङज्याऔ आछ्योङज्याऔकै, पलन्या बादलले नकाङजन आकपवाङ, ओटन नका बादललन तोलोअ ग़ा थहौ, "ईका ङायिङ्का ज़ा हो, ङा इकास भ्याई ङाहेसाङ्‌ङु, इकाल छेन थएचिते।"✝ 6 जब सिइयाङै नका ग़ा राथटौ, तब नकाङ भ्याई छ्याएस्यु नामल फलुपसिवाङ। 7 तर येशुले नकाङजन छुस्यु ऐआढोवाङ, "सोचिते, ताछ्याएच्यो।" 8 जब नकाङै राम्युउ रांखिमौ, तब येशु बाहेक अपुर काङ्काईजन मारङदुरा। 9 जब ओयाङ डान्डालन लांइज्यावाङ, येशुले नकाङजन आग्या आयोवाङ, "जब समन रुल ज़ा सिन्यातन जिङदा ताइस्यु मासो, तब समन जे ईका दर्शनल छेन काङ्काईजन तापानस्योचिर।" 10 ओटन आसिइयाङै येशुजन ऐलेस्यु रांगिनौ, "वन दानाङ शास्त्रीयाङै हादेए एलिया रांन्यालेया ऐलेर?"✝

11 येशुले नकाङजन ऐआढोवाङ, "एलिया मछ्युजै रांया ओटन नकाले फरि सोगलै छेन सुढारन्यालेया। 12 तर ङा जेजन ऐढाच्या, ‘एलिया हादेए जै रा:स्यु लेया, ओटन रुयाङै नकाजन रामाशहौ, तर नकाजन नकाङै कोबाअमन रांढोव। नैलेस्यु जै रुल ज़ाले बै नकाङल कुईतन दुख भुगिऊपरिया।’"✝

13 तब ओले बप्तिस्मा यांन्या यहुन्नाल बारेल पानज्याऔ रैस ऐलेस्यु सिइयाङै राबुजिऊ।

14 जब येशु सनर आ सिइयाङ रुयाङ हुल लेन्या पोल ताप्‌रांरापाइना तोलोअ रुले आल्योङ रा:स्यु घुन्डा टेकिस्यु ऐलेऊ, 15 "औ प्रभु, ङा ज़ाजन दया ढोते, दानाङभन्या नका चरिफाई लागिस्यु बअ दुख डोएज्याऊ। नका खयाङ्क मील परिया, खयाङ्क रील बुदिया। 16 ङा नकाजन न सिइयाङल्योङ ङाहोन्ङु, तर नकाङै सबेलौ रांमाढुदुऊ।"

17 तब येशुले आढोवाङ, "ऐ अल्प बिस्वासीयाङ सनर भ्रस्ट पुस्ताङ, खक समन ङा जेसकाए लिज्याङ का? ङा जेजन खक समन सहिच्यो? नकाजन अदेए ङालेऊदेए होन्चिते।" 18 जब नाजन येशुल ल्योङ राहोनौ, तब नकात लेन्या भूतजन आहकारिउ ओटन नका केटातन पलिईस्यु हिनौ, ओटन नका ओचोएटै बेलौ। 19 जब आसिइयाङै येशुजन आबाठएक रा:स्यु ऐराढोव, "गे दानाङ नकाजन पलिटौ माढुदुई?" 20 येशुले नकाङजन ऐआढोवाङ, "जेमि अबिस्वासलं कारनले हो। ङा मछ्यु जेजन ऐढाच्या, कि जेल्योङ तोलोअ काथ्याल जाए यांयन्या जे बिस्वास आलन्याताहकन आका डान्डाजन ‘आटन हटिन्ते’ ऐढोच्योकन नका हटिन्यालेया। ओटन जे नाल्ट नैज असम्भब ताइन्यामाल्दी।✝ 21 नैताइस्यु ऐटाइन्या किसिमला भूत ता प्रार्थना सनर बर्त बिना मापलिईदी।"

22 येशु सनर आ सिइयाङ गालील प्रदेसलं रादुउसिऊक ओले नकाङजन ऐआढोवाङ, "रुल ज़ा रुयाङल कुईत सुम्पिन्यालेसिया। 23 ओटन नकाङै ओजन सएन्यालेरा, ओटन तिन दिन छिम्क ओ जिङदा ताइस्यु सोन्यालेया।" ओटन सिइयाङ भ्याईज दुखी ताइवाङ।

24 जब येशु सनर आ सिइयाङ कफर्नहुमलं रांवाङ, आराधना झिमल तिरो उठाइन्याङै पत्रुस ल्योङ रा:स्यु ऐलेवाङ, "नैति जे गुरुले तिरो आमाफोकौ?"✝

25 पत्रुसले ऐलेऊ, "औ ऐफोअवा।" पत्रुस झिमल पसियापाइना येशुले नकाजन हादेए ऐआढोव, "सिमोन, न बिचार नैलेव? पिरथ्बीला रययाङै तिरो अथाबा तिरो काङ्का ल्योङन रांउठाहौ? रा: ज़ायाङल्योङन सन् अपुऱ्याङ ल्योङन?" 26 पत्रुसले जबाक आयोव, "अपुऱ्याङ ल्योङन," येशुले नकाजन ऐआढोव, "नै ताहकन ज़ायाङले ता छुट ऐडोएर रैस। 27 तर रुयाङ गेसं रायिङताचोत्या ऐलेन्या यिङस्यु दहल हिनस्यु बल्छी होर्ते, ओटन पैला परिन्या ङा:स्या होनस्यु। नकाल याह् नफटौक तोलोअ चान्दील सिक्का डोएना। ओटन ना रएस्यु न नाल्ट सनर ङा नाल्ट नकाङजन तिरो योंवरते।"