1 ओलं छिन्ट येशु मन्दिरलन पलिईस्यु आहिनज्याऔक आसिइयाङै ओलजन आराधना झिमयाङ थनस्यान्या लेस्यु आनेराक रांवाङ। 2 तर "ओले नकाङजन ऐआढोवाङ, ‘जे ईका सोगल ऐरङच्या, माङ का?’ ङा जेजन मछ्यु ऐढाच्या, इलं तोलोअ लुङयर्त छुट्टै लुङ लिज्यान्या माल्दी, सोगलै थाएस्यु क्याइन्यालेसिया।"

3 येशु जैतुन डान्डाल आचुङज्याऔक आ सिइयाङ रांबाठए आल्योङ रा:स्यु रांगिनौ, "गेजन पानस्यासिन्ते, आका छेन खक ताइङालिज्याऔ, ओटन न आगमन सनर आका जुगल आसापटा चिन्न नैति ताहौ होला?" 4 तब येशुले नकाङजन जबाक आयोवाङ, "होसियार ताइचिते, काङ्काङै जेजन भरमल ताप्‌राइचिरत्या। 5 दानाङभन्या तबर जना ङा मिनतन ‘ङा ख्रीस्ट ज्या’ ऐलेस्यु रांन्यालेरा, ओटन तबर झन बहकाइन्या लेरा। 6 जे नेराल खप्सिन्याङ सनर लोएङ खप्सिन्याङलं हल्ला थएन्यालेच्या। तर ताछ्याएच्यो, दानाङभन्या ईका ताइन्या आबस्यक जै लेया, तर नवाए बेलाकै खेमन्या माल्दी। 7 दानाङभन्या जातिल बिरोदत जाति, ओटन राज्यल बिरोदत राज्य च्याङन्या लेया, ओटन पोइ-पोइल अनिकाल सनर भुईचाल रांन्यालेया। 8 तर ईका ता सोगल जत्कालल सुरु याएज ज्या।"

9 तब नकाङै जेजन सज्युन्यालेचिरा ओटन सङ्कस्टल नाल्ट सुम्पिचिरा, ओटन ओटन ङा मिनल कारनले सोगलै जातियाङै सएन्यालेचिरा।✝ 10 नवाए बेला तबरले रा: बिस्वास राइस्यु तोलोअले तोलोअजन धोखा यांन्या लेरा ओटन रारांल सज्युसिरा। 11 तबर ग्वारवा अगमबक्ताङ च्याङन्या लेरा, ओटन तबर रुयाङजन बहकाइन्या लेरा। 12 छलकपट आबदिऊ कारनले तबरल प्रेम सेलाइन्यालेया 13 तर छिन्ट समन तनस्यु लिज्यान्याजन बचाइन्या लेसिया।✝ 14 ओटन राज्यल ईका चान्याथाई सोगल सङ्सारला सोगलै जातियाङल साचील नाल्ट प्रचार ढान्या लेसिया, नकाल छिन्ट खेमन्यालेया।

15 नैताइस्यु जब जे दानिएल अगमबक्ताङन छ्योङसिन्या बिनाशकारी सज्युसिन्या जन्तुजन पबित्र पोल आच्याङज्यान्या रङच्या जोल बारेल दानिएल अगमबक्ताले आपानौ (जोले परी नकाले ग्याबुजिऊत्या),✝ 16 तब यहूदियाल लिज्यान्याङ डान्डा देए ग्याढोङरत्या। 17 झिमल मैराअत लिज्यान्याङ समान पलिटौ नाल्ट वान्ल तालाइरत्या।✝ 18 जोयाङ खेएल लिज्यार ओयाङ वलस्यु रा: खाइटो ताचिनरांरत्या। 19 थयहय! नका दिनल ख्वाए छ्याइलागिया गुरभ्यानियाङ, सनर नुन ओइज्यान्याङजन। 20 तर हिउदाक या शबाथ छिम्क जे ढोङन्या ताटाइत्या ऐलेस्यु परमेस्वरसं प्रार्थना ढोचिते। 21 दानाङभन्या नका बेला ऐटाइन्या माहासङ्कस्ट ताइन्यालेया, जो जगतल सुरुकन आकअ समन ताइस्यु माल्दी, न त फरि खकै ताइन्या ले।✝ 22 यदि नका दिन परमेस्वरले माघटाइसिन्या ताहकन काङ्काई रु माबानचिन्या लेवाङ, तर छेल्सिन्याङलं नाल्ट ना दिन घटाइन्या लेसिया। 23 "तब नवाए बेला जेजन काङ्काङै ‘खिम्चिते, ख्रीस्ट इङ लिज्याऔ, या नङं लिज्याऔ’ ऐलेरकन बिस्वास ताढोच्यो। 24 दानाङभन्या ग्वारवा बिस्वासीयाङ, सनर ग्वारवा अगमबक्ताङ च्याङन्या लेरा, ओटन राढुदुउ समन छेल्सिन्याङजन बै बहकाहौ नाल्ट बडा-बडा अचम्मला कामयाङ ढास्यु थनन्यालेरा। 25 यांका नाएच्यो, नैताइस्यु थएचिते ङा जेजन हाकन्जै पानस्याज्याच्या।"

26 "यदि नकाङै जेजन ‘खिम्चिते, नका हरहरताइन्या-पोल लिज्याया’ ऐलेरकन बाहेरल पलिईस्यु ताहिनच्यो। ओटन ‘ब्याएचिते, ओ भितरलं कोठाल मोअसिस्यु लिज्याऔ’ ऐलेरकन बै बिस्वास ताढोच्यो।"✝ 27 दानाङभन्या जोमनलेस्यु पुर्बङन बिजौलि चम्किस्यु पछिम समनजै रंनन्या ताह, रुल ज़ाल आगमन ओमनलेस्युई जै ताइन्यालेया। 28 दानाङभन्या जोल सिना लिज्या, गिद्दयाङ बै ओलै दुउसिरा।✝

29 नका दुखला दिनल छिन्ठक्कै, नम्युउ चिऊन्या लेया, ओटन ह्यावए होएन्या माल्दी, सनर हरवएयाङ नमतन तेइन्यालेरा, अथाबा नमता सक्तियाङ हल्लाइन्या लेसिया।✝ 30 तब ओवाए बेला रुल ज़ाल चिन्न नमत रंनन्या लेया, ओटन पिरथ्बीला सोगल जातियाङ व्‌रन्या चिचच्याइन्या लेरा, ओटन नकाङै रुल ज़ाजन नमता बादलसकाए सक्ति ओटन घिन्या महिमासकाए आरांज्यान्या रङन्या लेरा।✝ 31 ओले आमि स्वर्गदुतयाङजन तुरहील घिन्या ग़ा सकाए परिङौरा, ओटन नकाङै नमल तवङ्ङन छुट्टै वङ समन चारै दिसाङन ओले आछेलन्याङजन दुउन्या लेरा।

32 "तर ड्यूल टुङतन तोलोअ सिक्छ्या ह्युउसिचिते, जब नकाल हाङ्गाङ पिङपिङ सनर नारनार ताइर, ओटन टुङले ल्हापटा फेरिऊ, तब जे घाम साहा राढारैस लेस्यु सनच्या। 33 ओटन जब जे ईका स्वाट्टै छेन आताइरान्या रङच्यो, तब ओ बेला झलाप नेराकै लिज्याया ऐलेस्यु सन्चिते। 34 ङा जेजन मछ्यु ऐढाच्या, कि जब समन ईका सोगलै पुरा माताह, ना बेला समन ईका पुस्तालं अन्त ताइन्यामाल्दी। 35 स्वर्ग सनर पिरथ्बी टलिस्यु हिना, तर ङा बचन खकै टलिस्यु हिनन्यामाल्दी।"

36 "तर नका दिन सनर नका बेलाल बारेल न त स्वर्गला दुतयाङै, न ज़ाले तर परमेस्वर बौले बाहेक काङ्काईले मासनौदी। 37 रुल ज़ाल आगमन नोआल दिनमन जै ताइन्यालेया।✝ 38 दानाङभन्या जोमनलेस्यु जलप्रलय हादेए नोआ जहास भितरलं आपसिन्या दिन समन, रुयाङ रांज्याज्यान्या, रांओज्यान्या सनर ब्याहाभोस ढाज्यावाङ, 39 ओटन जलप्रलय रा:स्यु स्वाट्टैजन बगाइस्यु आमालाङौ समन नकाङ रा:मासनौ। नामन्जै रुल ज़ाल आगमन बै नैज ताइन्यालेया।✝ 40 नका बेला नेंलोअ खेएल काम नेंढाज्याऔक, तोलोअजन लाङन्यालेसिया, ओटन छुट्टैजन बनाएन्यालेसिया। 41 नेंलोअ मेएमाने चाखी नेंहेएज्यान्या ताहा, ओटन तोलोअजन लाङन्यालेसिया, छुट्टैजन बनाएन्यालेसिया।"

42 "नैताइस्यु सनसिस्यु लिज्याच्यो, दानाङभन्या खकाछिम जे प्रभु रांङालिज्याऔ, ना जे मासन्चिदी। 43 तर आका सनच्यो, कि झिमल खसमले गोए रिउल ईका बेला रांया ऐलेस्यु आसन्न्या ताहकन, सनर ना आसन्सिज्यान्या ताहकन आझिम पाकौ मायोव होला।✝ 44 नैताइस्यु जे बै तयार लिज्याच्यो, दानाङभन्या रुल ज़ा मायिङसिन्या बेला रांन्यालेया।

45 "बुद्दिमान बिस्वासी नोक्कर काङ्का लेऊ, जोजन नकाल साहूले अपुर आनोक्करयाङजन ठिक-ठिक समायत ज्यान्या योंवर ऐलेस्यु आपरिमौ? 46 नका नोक्कर बअचान्या हो, जो साहू आरांऔक इमानदारसं काम आढाज्यान्या डोएरिइवा। 47 ङा जेजन मछ्यु ऐढाच्या, साहूले नकाजन आमि इमानदारीले गर्दा स्वाट्टै सम्पतियर्त जिम्मा यांन्या लेया। 48 तर यदि नका दुस्ट नोक्करले ‘ङा साहू ढिलो रांया’ ऐलेन्या आयिङल यिङस्यु, 49 ओटन मंङवाङ सकाए ज्यास्यु ओस्यु सनर ओलसं काम ढान्या नोक्करयाङजन टुपन्या ढोदाभन्या, 50 ना नोक्करल साहू तयोअ आमायिङन्या दिन छिम्क रांया ऐलेस्यु नकाले मासनज्यादी। 51 ओटन साहूले नकाजन घिन्या सजायल नाल्ट घुर्बीयाङल खार्ल क्याइसिया, जोल रुयाङ व्‌रन्यालेरा ओटन ह्वा ज़िङ कैन्यालेरा।"