1 जब येशु सनर आ सिइयाङ यरुशलेमल नेराका जैतुन डान्डाला बेथफागेल ताप्‌रावाङ, तब येशुले नेलोअ सिइनेजन ऐढास्यु आपरिङौने, 2 "झेन नकाजिऊका नङ्गरल हिनचिन्ते। ओलं झेनटापौ चोएटै तोलोअ गडाहा सनर नाल पुङ नेसुरसिज्यान्या डोएनाङचिना। ओटन नानेजन पलाअस्यु ङाल्योङ होनचिन्ते। 3 काङ्काङै झेनजन कैयाए ढाचिनरकन, ‘प्रभुजन ईका चाहिज्याऔ’ ऐढोचिन्‌र ओटन नकाले ओभजाक्कै ना परिङन्या लेया।" 4 अगमबक्ताङ्ङन पान्सिन्या बचन ऐताइस्यु पुरा ग्याताइत्या लेस्यु ऐताहौ हो, 5 "सियोनल मेएमाज़ाजन ऐढोचिन्ते, खिम्ते, न रय जो बअनरम लेया, गडाहा सनर तोलोअ गडाहाल पुङयर्त सवार ताइस्यु नल्योङ रांज्याऔ।"✝ 6 तब सिइने हिनौने, ओटन येशुले आपरिमन्या अनुसार नकाने नेंढोव। 7 नकानेले गडाहा सनर नकाल पुङ नेंहोनौ, ओटन नकायर्त नेंक्वायाङ नेंठुङौ, ओटन येशु नकायर्त चुङौ। 8 हुलला भ्याउयाएले रांक्वा यमल रांठुङौ, ओटन अपुऱ्याङै सिङल हाङ्गाङ पलस्यु यमल रांठुङौ। 9 येशुल हाङन सनर छिन्ङन बाज्यान्या हुललन भ्याउयाएले ऐलेस्यु कलिऊवाङ, "दाऊदल ज़ाजन होसन्ना! बअचान्या हो, जो परमप्रभुल मिनतन रांज्याऔ! परमधामल होसन्ना!"✝

10 जब येशु यरुशलेमल पसिऊ, सोगल सहरल हलचल मच्चिऊ। ओटन रुयाङै गिनौ तअसिवाङ, "ईका काङ्का रैस?"

11 हुलला रुयाङै जबाक रांयोवाङ, "ईका गालील प्रदेसला नासरतङन रांन्या अगमबक्ता येशु दी।"

12 येशु मन्दिरलं हिनौ। ओटन ओले मन्दिरलं लङन्या, यएन्या सोगलैजन आचाहारवाङ, ओटन पैसा फिरिन्याङल डेस्क, सनर परेवा यएन्याङल खोर आपल्ताइस्योवाङ। 13 ओले नकाङजन ऐआढोवाङ, "ईका पबित्रशास्त्रलं सरसिन्या लेया, ‘ङा झिम प्रार्थनाल झिम ऐढान्या लेसिया।’ तर जे इकाजन गोएयाङल अड्डा जाएस्यु नाएच्या।"✝ 14 नका मन्दिरलं अन्ढलाङ सनर लुलाङ येशु ल्योङ रांवाङ, ओटन ओले नकाङजन आसबेल्वाङ। 15 तर जब मुख्या पुजाउरोयाङ सनर शास्त्रीयाङ येशुले आढान्या अचम्मला काम रांरङौ, ओटन लुलल्याङै मन्दिरलं "दाऊदल ज़ाजन होसन्ना" लेस्यु राचिचच्याइन्या राथटौ, तब नकाङ रायिङचोव, 16 ओटन नकाङै येशुजन ऐराढोव, "नठएज्यानु, इकाङै नै पानज्यावाङ?" तब येशुले नकाङजन ऐआढोवाङ, "औ ऐथएज्याङा। नैति जे परीस्यु जेमाल्चिऊ, ‘लुलल्याङ सनर नुन ओन्या बालअयाङल याह्‌लन नङ पुरा प्रसम्सा पलिईस्यु नाएना?’"✝

17 तब येशुले नकाङजन यरुशलेम सहरलन पलिईस्यु हिनौ, ओटन बेथानिया हिनस्यु नङं तरिऊ चुङौ।

18 तयोअका छकाल्याई यरुशलेम सहरदेए आवलज्याऔक येशु करेव। 19 यमल वङक ओले तोलोअ ड्यूल टुङ आरङौ। ओटन नका टुङ लेऊक रांऔ, तर नकाल ल्हापटा बाहेक अपुर नैज मारङदा। तब नकाजन आढोव, "आब आटनपार नङत खकै शई तासैईत्या" ओटन ना ड्यूल टुङ ओचोएटै राङौ। 20 नका रङस्यु आ सिइयाङ अचम्म मानिस्यु ऐलेवाङ, "ईका ड्यूल टुङ कडाई ओचोएटै राङौ?" 21 येशुले नकाङजन ऐआढोवाङ, "ङा मछ्यु जेजन ऐढाच्या, यदि जेल्योङ बिस्वास लेकन सनर खकै सङ्का माढोच्योकन, ड्यूल टुङजन जोमन जाएसिऊ नवाए याएज माङडी, तर ईका डान्डाजन बै ‘भोइस्यु समुन्दरल तेहन्ते’ ऐढोच्योकन नैजै ताइन्यालेया।✝ 22 यदि बिस्वास ढास्यु प्रार्थनाल जो नीच्यो ना जे डोएन्यालेच्या।"

23 येशु मन्दिरलं पसिऊ, ओटन सिक्छ्या आयांज्याऔक मुख्या पुजाउरोयाङ सनर जनताङल सेरयाङ आल्योङ रांवाङ, ओटन ऐराढोव, "नै अधिकारले नङ आका कामयाङ नढाज्यानु, ओटन काङ्काले नङजन ईका अढिकार आयानु?" 24 येशुले नकाङजन जबाक आयोवाङ, "ङा बै जेजन तोलोअ छेन गिनच्या। ङाजन नाल उत्तर यांङच्योकन, ङा नै अढिकारले ईका काम ङाढोङु, नका जेजन पानस्याच्या। 25 यहुन्नाल बप्तिस्मा काङ्काङन ताहौ? स्वर्गला परमेस्वरङन सन् रुयाङ्ङन?" नकाङ रारांल ऐलेस्यु छ्योङौ तअसिवाङ, "गे स्वर्गला परमेस्वरङन ऐलेऊक, इकाले ‘ओमनटाहकन जे नकाजन दानाङ बिस्वास माढोच्यो?’ ऐढाइवा। 26 यदि रुयाङ्ङन ऐलेऊक, गेजन रुयाङल छ्याइ लेया। दानाङभन्या सोगलैले यहुन्नाजन अगमबक्ता मानिरा।" 27 नैताइस्यु नकाङै ओलजन जबाक रांयोव, "गे मासनैदी।" येशुले नकाङजन आढोवाङ, "ङा बै नै अढिकारले ईका काम ङाढाज्याङु, नका जेजन मापानस्याचिदी।"

28 "जे कैताइन्या बिचार जेढोचिऊ? तोलोअ रुल नेंलोअ ल्हेपाज़ानें लेऊने। ओले सेरवालाजन रा:स्यु ऐआढोव, ‘ज़ा, हिनस्यु आछिम अङ्गुर बारील काम ढोते।’ 29 नकाले जबाक आयोव, ‘ङा माहिनङदी।’ तर ओलं छिन्ट पस्ताइस्यु हिनौ।" 30 "नकाल छिन्ट बौ छुट्टै आज़ा ल्योङ हिनस्यु नैज आढोव, ओटन नाले जबाक आयोव, हो ‘ङा हिन्ङा ऐलेऊ।’ तर ना माहिन्दा। 31 आब नका नेंलोअनेंतन काङ्का वालाले नेंबौल छेन नेंमानिऊ?" नकाङै जबाक रांयोव, "सेरवालाले।" येशुले नकाङजन ऐआढोवाङ, "ङा मछ्यु जेजन ऐढाच्या, तिरो उठाइन्याङ सनर बेशस्याङ जेतन हादेए परमेस्वरलं राज्यल पसिऊ डोएरा। 32 दानाङभन्या बप्तिस्मा यांन्या यहुन्ना जेल्योङ धार्मिकताल यम ठनराऔ, ओटन जे नकाजन बिस्वास माढुदुच्या। तर तिरो उठाइन्याङ सनर बेशस्याङै नकाजन बिस्वास रांढोव। जे नका रङस्यु बै पस्चाताप माढुदुच्या ओटन नकायर्त बिस्वास माढुदुच्या।"✝

33 "येशुले आढोवाङ, तोलोअ छुट्टै आहान थएचिते। तोलोअ किसानी लेऊ, ओले तोलोअ अङ्गुरल बारी आलाहौ, ओटन नकाले हुङआङन बार कराप्स्यु, ओलं खादा किस्यु तोलोअ अङ्गुर प्योअन्या कोंल आजाटौ, ओटन तोलोअ यिउबाइ बै आजाटौ। ओटन अढिया वालाङजन ठेक्काल यांस्यु ओल परदेस देए हिनौ।"✝ 34 जब शई ट्युकौ बेला नेरा ताइरा:औ, तब नकाले आनोक्करयाङजन अढियावालाङ ल्योङ शैल बठा चिनाऔ आपरिङवाङ।

35 "तर अढियाढान्याङै नकाल नोक्करयाङजन कोलोअस्यु तोलोअजन राटुपौ, छुट्टैजन रासटौ, ओटन तोलोअजन लुङले राटुपौ। 36 फरि नकाले हाकाङतन भ्याई नोक्करयाङजन आपरिङवाङ, ओटन नकाङै नकाङसं बै नैताइन्याईज ब्यहोरा रांढोव। 37 ‘ङा ज़ा झनता नकाङै ऐमानिरा होला’ ऐलेन्या यिङस्यु, आसापट ओले आज़ाजन नकाङ ल्योङ आपरिङौ।" 38 "तर अढियाढान्याङै आज़ाजन रङस्यु रारांल ऐलेवाङ, ‘ईका ता हकदार दी। रांचिते, इकाजन सएया, ओटन इकाल हक गेकुईत होन्‌या’।" 39 तब नकाङै ओजन राकोलोकौ ओटन अङ्गुरल बारीलन घिसारस्यु बाहेर देए लाङस्यु रासटौ। 40 "येशुले ऐआढोवाङ, जब अङ्गुर बारील खसम रांऔ, तब नकाले नका अढिया वालाङजन कै आढोवाङ होला?" 41 नकाङै ओलजन ऐराढोव, "ओले नका दुस्टयाङजन सटौरा, ओटन अङ्गुरल बारी छुट्टै अढियाढान्याङजन ठेक्काल यांन्या लेया, जोयाङै ओलजन शैल बठा समायत बुझाईन्या लेरा।"

42 येशुले नकाङजन आढोवाङ, "नैति जे पबित्रशास्त्रला बचन खकै जेमापरीचिऊ? ‘जो लुङजन झिम कुर्मियाङै बिकामला रांजाटौ नकाई कोनाअता सुरलुङ ताहौ, ईका परमप्रभुङन ताइन्या हो, ओटन गे नजरत ईका अचम्मला लेया।’✝

43 "नैताइस्यु ङा जेजन ऐढाच्या, परमेस्वरलं राज्य जेल्योङन न्हानन्या लेसिया, ओटन तोलोअ ऐटाइन्या जातिजन यांन्यालेसिया, जोले नकाल शई शशैवा। 44 ईका लुङयर्त टेईन्या पाअ-पाअ ताइन्यालेया, तर जोलयर्त नका लुङ टेह, आकाले नकाजन हेएन्या लेया।"✝ 45 जब मुख्या पुजाउरोयाङ सनर फरिसीयाङै येशुल आहान राथटौ, तब इकाले गे बारेलै छ्योङज्याऔ रैस ऐलेस्यु राबुजिऊ। 46 नैताइस्यु नकाङै येशुजन कोलोकौ रारोकौ, तर नकाङ हुलजन रङस्यु छ्याएवाङ, दानाङभन्या रुयाङै ओलजन ईका तोलोअ अगमबक्ता हो ऐलेस्यु मानिज्यावाङ।