1 नवाए बेला गालील प्रदेसला शासक हेरोदले येशुल बाए आथटौ। 2 नाले आमि नोक्करयाङजन ऐआढोवाङ, "नका बप्तिस्मा यांन्या यहुन्ना ज्या। नका सिस्यु जिङदा ताइस्यु लेया। नैताइस्यु सक्तिला ईका कामयाङ ओलङन ताइज्याऔ।" 3 दानाङभन्या हेरोदले आभाई, फिलिपल मेएमा हेरोदियासल कारनले यहुन्नाजन कोलोअस्यु पोअस्यु झ्यालखानाल झोअस्यु आनाटौ।✝ 4 यहुन्नाले हेरोदजन ऐढास्यु आनाटौ, "ब्यबस्थालं अनुसार नकाजन नङ नमेएमामन जाएस्यु नाएन्या ठिक माल्दी।"✝ 5 ऐआढाऔकाले हेरोदले ओलजन सएन्या यिङ आढोव, तर रुयाङ रङस्यु नका छ्याटौ, दानाङभन्या नकाङै येशुजन अगमबक्ता मानिज्यावाङ। 6 तर जब हेरोदल आजर्मिन्या दिन रांऔ, तब हेरोदियासल मेएमाज़ाले नकाङ खार्ल स्यास्यु हेरोदजन भ्याई खुशी आजाटौ। 7 नैताइस्यु हेरोदले नाजन जो जन्तु नीकन बै यांन्या बाचा आढोव। 8 तर नकाले आअमाले आह्युउन्या अनुसार ऐआढोव, "बप्तिस्मा यांन्या यहुन्नाल ङए ङाजन ईका थालल यांङते।" 9 ओटन रय आतिज्याकन बै आमि बाचा अनुसार पाहुनाङल नाल्ट नकाले सिपाइयाङजन नैताइन्याई ढान्या हुकुम आयोवाङ, 10 ओटन जब हेरोदले सिपाइयाङजन झ्यालखानाल हिनस्यु यहुन्नाल ङए पलस्यु होन्चिते ऐलेस्यु आपरिङवाङ। 11 तब नकाल ङए थालल होनस्यु नका मेएमालुलजन रांयोव, ओटन नकाले ना आअमाजन आयोव। 12 ओलं छिन्ट यहुन्नाल सिइयाङ रा:स्यु नकाल सिन्या बुल लाङस्यु री:ननिइस्यु, हिन्वाङ ओटन नकाङै येशुजन थाई रांयोव।

13 जब येशुले ईका आठटौ ओल डोङ्गा चरिस्यु नङंन अलक्कै बाठएका पोल हिनौ। आका थएस्यु रुल हुल सहरलन पाइदल जै ओलजन रापछ्याहौ। 14 येशु आवङल तापापाइना नका घिन्या रुयाङल हुलजन रङस्यु भ्याई यीङताए आमानिवाङ, ओटन नकाङल नाएबोरन्याङजन आसबेल्वाङ। 15 ओइ ताहापाइनाई येशुल सिइयाङ आल्योङ रा:स्यु ऐराढोव, "आका पोल काङ्काई रु माल्दी नमझ्याङा लेदा। आकाङजन बिदा योंवरते, ओटन इकाङै नङ्गरल हिनस्यु रांनाल्ट ज्यान्या जन्तु ग्यालङरत्या।" 16 तर येशुले नकाङजन ऐआढोवाङ, "नकाङ हिनन्या आबस्यक माल्दी। जे जै इकाङजन ज्याऔ योंचिरते।" 17 नकाङै येशुजन ऐराढोव, "इल गेसकाए पास पाटा भरेई सनर नेंलोअ ङा:स्या जाई लिज्याया।"

18 तब येशुले ऐलेऊ, "नका सोगल ङाल्योङ होन्चिते।" 19 ओटन येशुले रुयाङजन छील चुङन्या हकुम आयोवाङ, ओटन नका पास पाटा भरेई सनर नेंलोअ ङा:स्या छेन्स्यु नमदेए खिमस्यु परमेस्वरजन धन्याबाद आयोव, ओटन भरेईजन कलाएस्यु सिइयाङजन आयोवाङ, ओटन सिइयाङै रुयाङजन रांयोवाङ। 20 नकाङ सोगलैले ज्यास्यु पटिपन्न ताइवाङ, ओटन सिइयाङै येलन्या बारं घोनफाङ रादुकौ। 21 मेएमाङ सनर लुलयाङ बाहेक ज्यान्याङ याएज जम्मा पास हजार ल्हेपाङ लेवाङ।

22 येशुले यांहौरा पाइना सिइयाङजन डोङ्गाल चराइस्यु दहल हुदिफन्ट छिटो हिन्चिते लेस्यु आपरिङवाङ, ओटन ओवाए बेलाई रुयाङजन बिदा आयोवाङ। 23 रुयाङजन बिदा योंवरा पाइना प्रार्थना ढाऔ नाल्ट डान्डात वूमौ। ओटन ओइ आताहौक ओल नङं आबाठए लिज्याऔ। 24 तर डोङ्गा नकाए बेला समन दहल वङतन भ्याई लोए हिनस्यु लेऊ। ओटन उलत्या आन्ढी आढाऔकाले डोङ्गा रील छालले हल्याङहल्याङ लिज्याऔ। 25 छकाल्या तिन बजेकन छ बजेदेए येशु दहला रीयर्त बास्युकने सिइयाङल्योङ रांऔ। 26 जब सिइयाङै येशुजन दहला रीयर्त आबाज्यान्या रांरङौ, तब छ्याएस्यु ऐलेवाङ, "इकाता भूत दी कान्देए!" ऐलेस्यु नकाङ राछ्याहै चिचच्याइवाङ। 27 तर येशुले ओचोएटै नकाङजन ऐआढोवाङ, "ताआतिच्यो हिम्मत ढोचिते, ङा दी ताछ्याएच्यो।" 28 पत्रुसले येशुजन ऐआढोव, "औ प्रभु, मछ्यु नङजै ताहनकन, ङाजन नल्योङ री यर्त बास्यु रांन्या आग्या यांङते।" 29 येशुले ऐआढोव, "रांन्ते" पत्रुस डोङ्गातन लांइस्यु तब पत्रुस येशु ल्योङ हिनौ नाल्ट री यर्त बाऔ तअसिऊ। 30 तर आन्ढी जोरसै आढाज्यान्या सनस्यु छ्याटौ, ओटन जब रीले डुबिङाई लेयापाइना नाले चिचच्याइस्यु ऐलेऊ, "औ प्रभु ङाजन बचाहङते।"

31 तब येशुले ओचोएटै आकुई पारिस्यु नाजन आकोलोकौ, ओटन नकाजन आढोव "ऐ अल्पबिस्वासी*, दानाङ सङ्का ढोन?"

32 जब नकाने डोङ्गाल चुङौने तब आन्ढी थामिसिऊ। 33 डोङ्गाल लिज्यान्याङै येशुजन ढोक यांस्यु ऐराढोव, "नङ मछ्युजै परमेस्वरलं ज़ा ज्या।"

34 येशु सनर आ सिइयाङ दहजन कटाइस्यु गनेसरेतला पोल ताप्‌रावाङ। 35 ओटन जब नका पोला रुयाङै येशुजन रांशहौ, तब नकाङै हुङा आङा सोगल इलाकाल थाई रांपरिङौ। ओटन सोगल नाएबोरन्या रारुयाङजन आल्योङ राहोन्वाङ। 36 नकाङै आक्वाल टुप्पा याएज छुऊ डोटैकनबै बेलौ डोएयाहोला ऐलेस्यु येशुजन बिन्ति रांढोव, ओटन ज्वाएले रांछुऊ नकाङ बेल्वाङ।