1 "जे अपुऱ्याङल निया ताढोच्यो, ओटन जेमि बै निया माढासिदी। 2 दानाङभन्या जोमनलेस्यु जे अपुऱ्याङल निया ढोच्यो, ओमनलेस्युजै जे बै निया ढास्युनीच्या। जो मानले जे मानच्यो, नैलेस्युजै जे नाल्ट बै मानन्या लेसिया।"✝

3 दानाङ नङ नभाईल म्युउला धुलोल खाअ रङज्यान, नङ नम्युउल आलिज्यान्या मोन्दाअकने मासनन्दी? 4 अथाबा नम्युउल मोन्दाअ लिज्याकन नङ कैलेस्यु नभाईजन ऐढाऔ ढुदुन, ङाजन नम्युउला धुलोल खाअ हाटौ यांङते।

5 ऐ घुर्बी, हादेए नङ नम्युउलन मोन्दाअ हाएते, ओटन नङ नभाईल म्युउला धुलोल खाअ हाटौ नाल्ट बल्ल नङ चान्यासं रङौ ढुदुना। 6 "जो पबित्र लेऊ ना कांयाङजन तायोंचिर। जे मोटीयाङ वोअयाङ राहांल ताक्याइस्योचिर, मानकन्ता नकाङै रांखङले सिउरा ओटन वलस्यु जेजन धारीचिरा।"

7 "नीच्योकन जेजन यांन्यालेसिया, रोअच्योकन डोएन्यालेच्या, ध्वांध्वां जाएच्योकन जे नाल्ट झलाप फएन्यालेसिया।✝ 8 दानाङभन्या जोले नी, ओजन यांसिया, जोले रोंकौ, ओले डोएवा, जोले ध्वांध्वां जाटौ, नकाल नाल्ट झलाप फएन्यालेसिया।" 9 "जेमध्य काङ्का रु ताह, आज़ाले भरेई आनीउक नकाजन लुङ यांन्या?" 10 ओटन ङा:स्या आनीउक नकाजन डाङ योंवा? 11 नैताइस्यु जे दुस्ट ताइस्यु बै जे ज़ायाङजन चान्या जन्तु यांऔ सनच्योकन, स्वर्गत लेन्या जे बौले ओलसं नीन्याङजन ख्वाए भ्याई जाएस्यु चान्या जन्तु कैलेस्यु आमायोवाङ।✝ 12 रुयाङै जेस जोमनताइन्या ब्यबहार ग्याढोरत्या ऐलेन्या चाहिच्यो, जे बै नकाङसं ओमनटाइन्याई ब्यबहार ढोचिते, दानाङभन्या आका जै मोशाल ब्यबस्था सनर अगमबक्ताङल मुख्या सिक्छ्याल साराम्स हो।✝

13 "साङरो झलापलन भितरलं पसिचिते, दानाङभन्या बिनाशल सतापन्या झलाप वाङन्या सनर यम सजिलो ताहा, आकालन भितरलं पसिन्या रुयाङ तबर ताइरा।" 14 दानाङभन्या जिबनल सतापन्या झलाप साङरो ताहा, ओटन यम अक्कऱ्या ताहा, जोले जिबनल सतापवा, ओटन ना डोएन्याङ थोरै ताइरा।

15 "ग्वारवा अगमबक्ताङतन होसियार ताइचिते, जेजन रङस्यु जेल्योङ रांन्यालेरा, नकाङ बाहेरङन खिमौक भेडाङमन ताइन्याई ताइरा, भितरङन बअछ्याईला फ्याऊयाङमन ताइरा।" 16 जे नकाङल राज़ाएतन शईन्या लेच्या। ओक्या ज़ुल टुङतन अङ्गुर अथाबा धातन ड्यूल शई टिउसिऊका? 17 नैलेस्यु स्वाट्टै चान्या टुङले चान्याई शई शशैवा। तर माचान्या टुङले माचान्याई शई शशैवा। 18 चान्या टुङले माचान्या शई शशहौ माढुदुऊदी, न त माचान्या टुङले चान्या शई शशहौ ढुदुऊ। 19 चान्या शई माशशैन्या सोगल टुङ पलसिया, ओटन मील झोअसिया।✝ 20 नैताइस्यु ग्वारवा अगमबक्ताङजन नकाङल कामङन शईन्यालेच्या।✝

21 "ङाजन प्रभु, प्रभु लेन्याङ सोगलै स्वर्गल राज्यल पसिऊ डोएन्या मालेरदी। तर ङामि परमेस्वर बौल इच्छा मानिन्या रुयाङ याएज स्वर्गला राज्यल पसिऊ ढुदुरा। 22 ना छिम्क भ्याईले ङाजन ऐढाङरा, प्रभु, प्रभु नैति गे न मिनङन भबिस्यबानी गेमाछ्योङयिउ का? नमिनङन भूतयाङ गेमाधपाइयिउ का? ओटन नमिनङन अपुर अचम्मला काम गेमाढोयिउ का? 23 ओटन ‘ङा नकाङजन चान्यासकाए ऐढोङरा, ङा जेजन खकैज माशईचिदी। ए माचान्या काम ढान्याङ ङातन लोए ताइचिते।’✝

24 "नैताइस्यु जोले ङा ईका बचन थटौ, ओटन पालन ढोव, ङा तोलोअ बुद्दिमान रु सकाए दान्जिङा, जोले आझिम चमलयर्त आजाटौ। 25 ओटन जब नम वाऔ, ओटन भलं रांऔ, ओटन आन्ढी आढोव, ओटन ना झिमल यर्त ठुकिसिऊ, ओटन बै ना झिम मावङदा। दानाङभन्या ना चमलयर्त सचुन्सिन्या लेऊ।"

26 जोले ईका ङा बचन थएस्यु बै मामानिऊ, नकाजन तोलोअ मुर्खी रुसकाए दान्जिसिया, जोले आझिम बाल्वाल यर्त आजाटौ। 27 जब नम वाऔ, ओटन भलं रांऔ, ओटन घूईका आढोव ओटन ना झिमल यर्त ठुकिसिऊ, ओटन ना झिम ढलिऊ, ओटन नकाल घिन्या नोक्सान ताहौ।

28 येशुले ईका छेन पान्वापाइना रुयाङल हुल ओलं सिक्छ्या थएस्यु छक्कै परिवाङ।✝ 29 दानाङभन्या ओले नकाङल शास्त्रीयाङमन लेस्यु माङडी, तर अढिकार लेन्या रुमन लेस्यु आह्युउवाङ।